حكاية قطة التوأم للكاتب محمد شعبان قصة رعب

عم سمير الورداني.. ده كان راجل طيب وغلبان، كان فاتح محل بقالة على قده كده بيسترزق فيه؛ يعني كان بيبيع جبنة وحلاوة وكل الحاجات اللي كانت بتتباع عند البقالين الغلابة بتوع زمان، المهم إن الراجل ده بقى، كان متجوز مراته بعد قصة حب طويلة، بس للأسف.. الراجل ده مراته ماكانتش بتخلف، لكنه من الأخر كده كان بيحبها اوي، ف ماسمعش لكلام أهله اللي قالوا له طلقها واتجوز غيرها، وفضل باقي على الست وسمع كلام الدكاترة اللي راحلهم هو وهي، وفضلوا ماشيين على العلاج وعلى الدعا لربنا على أمل يعني انه يرزقهم بحتة عيل ينور عليهم حياتهم، ولأن الراجل كان أصيل وكان بيحبها بجد واستحملها، ف ربنا كافئه بعد حوالي ٨ سنين جواز ومراته بقت حامل.. وقتها بقى يا ابني لا كان في سونار ولا كان حد بيقدر يعرف نوع المولود ايه الا لما يتولد.. والغريب في الموضوع بقى ان الست مرات عمك سمير وقت ما كانت حامل، بطنها كانت كبيرة بشكل ملحوظ.. وده اللي خلى جوزها وعيلتها وكمان عيلة جوزها، يقلقوا على الست ويجروا بيها عند الدكاترة.. بس الدكاترة اللي هي راحت عندهم، كلهم كانوا بيأكدوا ان الست سليمة وان حملها كويس جدًا، بس ماحدش كان يعرف هي بطنها كبيرة اوي كده ليه، وفضل الموضوع ده غامض وغريب، لحد ما عدى تسع تشهر.. والست خلفت، وساعتها بقى الراجل كان طاير من الفرحة لأن ربنا بعتله هدية كبيرة اوي، والهدية دي كانت عبارة عن تؤام.. بنتين.. سمى واحدة منهم أميرة على اسم مراته، والتانية سماها سميرة على اسمه يعني..

كان طاير بيهم من كتر الفرحة هو ومراته، وعاوزة اقولك بقى ان الراجل فعلًا رباهم أحسن تربية، وكان بيشتغل شغلانة تانية الصبح جنب محل البقالة اللي كان بيفتحه على العصرية كده، عشان يقدر يأمن لهم مستقبلهم ويعلمهم احسن تعليم، والشهادة لله يعني.. هو والست مراته، ربوا البنتين اللي كانوا بسم الله ماشاء الله زي القمر، احسن تربية، وكل المنطقة اللي هم كانوا عايشين فيها، كانت بتشهد بأخلاق البنات دول وبجمالهم، ومع مرور السنين.. البنات كبروا وبقى عندهم ١٥ سنة.. وفي السنة دي بقى البنات كانوا في أجازة الصيف، متعودين ينزلوا يقعدوا مع ابوهم في المحل، وبما إن محل ابوهم يعني محل بقال وبيبيع جبنة وكده، ف القطط كانت بتدخل المحل عشان تاكل بواقي الجبنة اللي بتقع على الأرض، وده طبعًا كان بيحصل والبنات قاعدين في المحل، ف المهم إن واحدة من البنات دول، بالتحديد يعني سميرة، شافت قطة من القطط اللي دخلت المحل وعجبتها، ف قعدت جنبها على الأرض وجابت لها حتة جبنة كبيرة وبدأت تأكلها، ف القطة حبتها وولفت عليها وفضلت قاعدة معاها لحد ما جه الليل وسمير قال للبنات..

(يلا يا بنات.. جهزوا نفسكوا عشان هنقفل ونروح..)

وقتها سميرة سابت القطة وحاولت تخرجها برة المحل، لكن القطة بقى ماكانتش راضية تسيبها، وفضلت واقفة تحت رجليها وكانت عمالة تتمسح فيها وكأنها بتقول لها خديني معاكي، ف لما أميرة شافت منظر القطة بالشكل ده، بصت لها وبصت لسميرة وقالتلها بحب وبشفقة كده..

(القطة دي حبتك.. ماتسيبيهاش في الشارع كده، ايه رائيك لما ناخدها معانا البيت؟!)

كلام أميرة او اقتراحها ده، عجب سميرة جدًا، وعشان كده شالت القطة على ايديها وراحت لابوها وهو بيقفل المحل وقالتله...

(القطة دي يا بابا كانت في المحل.. اكلتها وجيت اخرجها للشارع، مارضيتش تمشي وفضلت واقفة جنبي، أميرة بتقول انها حبتني وقالتلي كمان ناخدها معانا البيت، انت ايه رائيك!)

بص سمير للقطة، ف شاف انها ظريفة وان شكلها جميل، وكمان سميرة كانت متعلقة بيها، ف ابتسم لهم كده هم الاتنين وقال..

(ماشي يا حبيبتي.. ناخدها معانا، بس اعملي حسابك اننا لازم نحميها اول ما نروح البيت لا يكون في فروتها حشرات ولا حاجة)

ضحكت سميرة وانبسطت جدًا بالقطة اللي خدتها معاها البيت، وحمتها وحطت لها أكل وبدأت تراعيها هي وأميرة، وفضلت القطة عايشة معاهم في البيت لمدة شهر تقريبًا، لحد ما في ليلة سمير ومراته وبناته صحيوا على صوت مواء القطة، كانت قاعدة على سرير سميرة وكانت عمالة تنونو بطريقة غريبة وبصوت عالي، وقتها كلهم افتكروا ان القطة عيانة او فيها حاجة، بس القطة كانت كويسة جدًا وماكانتش بتتألم؛ هي بس كانت قاعدة على سرير سميرة وكانت عمالة تبص لها وتنونو زي ما قولتلك بطريقة غريبة وبشكل مستمر، وقتها أميرة حاولت تشيلها وتاخدها تنام جنبها، بس القطة كانت عمالة تبص لسميرة وكأنها مش عايزة تسيبها، ولما أميرة خدتها ونيمتها جنبها على سريرها، نزلت من جنبها ورجعت تاني لسرير سميرة وقعدت جنبها وفضلت تنونو برضه... ف سميرة فضلت قاعدة جنبها وقالت لابوها وامها واختها انهم يناموا ويسيبوا القطة، وهي هتعرف تتصرف معاها وتنيمها، بس القطة مانامتش ولا كانت راضية تسكت.. فضلت تطلع صوت المواء الغريب ده لحد أذان الفجر، ومن بعد أذان الفجر.

قربت من سميرة ونامت جنبها بكل هدوء، ف نامت سميرة هي كمان وعدى اليوم لحد ما صحيوا كلهم الصبح، ويومها سمير نزل على شغله من بدري، وأميرة قامت عشان تروق البيت، وسميرة لبست هي وامها ونزلوا يشتروا قماش من محل عشان بعد كده ياخدوه ويروحوا يفصلوه عند الترزي الحريمي، بس سميرة لما استعدت هي وامها عشان ينزلوا من البيت، القطة وقفت قصاد الباب وفضلت تطلع في صوت مؤاها الغريب واللي ماكنش من عادتها انها تعمله، وكأنها بتمنع سميرة من النزول، بس وقتها ندهت امهم على أميرة وقالت لها..

(تعالى يا بنتي خدي القطة دي ودخليها في أي أوضة.. دي زي ما تكون مش عايزانا ننزل..)

ضحكت سميرة وشالتها واديتها لاختها ونزلت هي وامها، وفي الوقت بقى اللي هم كانوا فيه عند بتاع القماش، القطة ماكانتش راضية تسكت لدرجة ان أميرة خافت من صوتها ودخلتها أوضة من أوض البيت وحطت لها أكل وسابتها، بس الغريب بقى إن القطة فجأة كده سكتت لوحدها، دخلت عليها أميرة عشان تشوف مالها، ف لقتها قاعدة في ركن بعيد كده لوحدها ومش عايزة تاكل ولا تعمل اي حاجة، صعبت القطة على أميرة ف شالتها وحاولت تلعب معاها، لكن القطة على غير عادتها فضلت ساكتة ومابتلعبش لحد ما فجأة باب الشقة اتفتح ودخل منه عم سمير وهو ملهوف وعلى ملامح وشه الخوف والرعب والحزن، وأول ما دخل من باب الشقة، بص لأميرة وقال لها..

(قومي بسرعة غيري هدومك وتعالي معايا.. اختك سميرة خبطها اتوبيس ونقلوها على المستشفى وامك معاها..)

سابت اميرة القطة ودخلتها في نفس الأوضة اللي كانت فيها، وغيرت هدومها بسرعة ونزلت هي وابوها على المستشفى، ولما وصلوا هم الاتنين هناك، لقوا ام سميرة واميرة، واقفة في استقبال المستشفى وهي عمالة تعيط، وقتها قربت منها أميرة وخدتها في حضنها وهي بتقول لها..

(في ايه يا ماما.. اهدي.. ايه اللي حصل بالظبط.. اهدي كده وفهميني.. انا مش عارفة حاجة.. اختي حصل لها ايه)

ردت عليها امها في الوقت اللي سمير كان راح يسأل فيه على سميرة..

(مش عارفة يا بنتي.. مش عارفة، انا حاسة اني في كابوس.. انا واختك كنا بنتمشى في الشارع، بس واحنا ماشيين دخلتني اختك ناحية الرصيف وقالتلي ماينفعش إن انا امشي ناحية الشارع عشان العربيات، كنت لسه هقولها انا مش مهم، المهم انتي يا حبيبتي بس مالحقتش.. مالحقتش لأن جه أتوبيس بسرعة من ورانا وخبطها وداس عليها، الفرامل بتاعته ماكانتش شغالة، بس السواق هدا السرعة وقدر يوقف الاتوبيس ونزل يشوف اختك مالها، الناس اتلموا وسميرة يا حبة عيني واقعة على الارض وسايحة في دمها.. الناس طلبوا الاسعاف وجت خدتها وانا معاها، وفي ناس من اللي كانوا واقفين راحوا بلغوا ابوكي.. انا مش عارفة ازاي ده يحصل بس.. لا حول ولا قوة الا بالله.. يارتني كنت انا وانتي لأ يا بنتي.. ياريتك كنتي سيبتيني انا امشي ناحية العربيات وانتي ماكنتيش اتأذيتي)

لما الست كانت بتحكي، أميرة كانت بتسمعها وهي عمالة تعيط لأنها كانت بتحب اختها ومرتبطة بيها بشكل جنوني، لكن العياط ده زاد اكتر لما خرج سمير وراح ناحية الاستقبال وهو بيعيط وبيقول لمراته وبنته..

(لا حول ولا قوة إلا بالله.. إنا لله وإنا إليه راجعون.. اللهم لا اعتراض.. اللهم لا اعتراض..)

اول ما قال كده، الست أغمى عليها، وأميرة جت لها حالة جنون وهيستيريا وفضلت تزعق وتصرخ وهي مذهولة ومش مصدقة إن اختها التؤام واقرب حد ليها في الدنيا خلاص مابقتش موجودة على وش الدنيا...

المهم بقى إن الست أسعفوها وفاقت وروحت على البيت لأنها كانت تعبانة وماكانتش قادرة تقف على رجليها.. وفي نفس اليوم، سميرة خرجت من المستشفى واتغسلت واندفنت وبعد كده رجعوا كلهم للبيت بعد الدفنة، وخدوا العزا بالليل وسط عياط كل ستات العيلتين في عزا الحريم، ووسط حزن شباب ورجالة عيلة الراجل ومراته في عزا الرجالة، ومع نهاية العزا.. طلع سمير بيته وفضل قاعد جنب مراته اللي كانت حالتها يا ابني تصعب على الكافر، أما بقى أميرة.. ف دي دخلت في أوضتها اللي هي بالمناسبة كانت أوضة اختها هي كمان، وفضلت قاعدة فيها وهي قافلة الباب على نفسها وبتعيط..

عدت ساعة ووراها ساعة لحد ما جت الساعة ٢ بالليل، وقتها سمير كان صاحي وبيقرا قرأن على روح بنته، جنب مراته اللي يا عيني كانت تعبت ونامت من كتر اللي شافته طول اليوم، بس فجأة سمير اتنفض.. لما سمع صوت أميرة بنته وهي بتصرخ في أوضتها!

قام الراجل جري وراح على الأوضة وفتح الباب بسرعة، وساعتها اتصدم لما لقى بنته نايمة على سريرها وهي عمالة تصرخ وتتشنج وتعيط بطريقة غريبة، وجنبها القطة واقفة جنب السرير، لكن الراجل اول ما شاف البت كده مابقاش عارف يعمل ايه، وقف ثواني وهو محتار ومصدوم من المنظر والحالة اللي لقى بنته عليها لحد ما جري ناحية المطبخ وجاب ازازة ماية وابتدا يغسل لها وشها عشان تفوق او تهدى او ع الأقل يعني تتكلم معاه، بس البت يا عيني ماكانتش بتنطق، هي كانت عمالة تتشنج وتصرخ وتعيط زي الملبوسين بالظبط، وفضلت على الحال ده لمدة خمس دقايق والراجل بيحاول يفوقها لحد ما حصل العكس، والبنت أغمى عليها وسكتت خالص..

وقتها سمير فتح باب الشقة ونزل جري في الشارع وراح لدكتور كان زبون عنده في المحل وكان موجود معاه في الدفنة وفي العزا، راح له بيته وصحاه من النوم وخده معاه البيت لما قال له ان بنته تعبانة وأغمى عليها، ف راح معاه الدكتور واول ما وصل لقى مرات سمير قاعدة جنبها وهي عمالة تعيط على بنتها اللي ماتت وبنتها التانية اللي أغمى عليها، المهم ان الدكتور كشف على البنت واداها حقنة وبعد كده خرج مع سمير من الأوضة وقال له..

(الضغط تمام.. ونبضات القلب برضه منتظمة، البنت جسديًا سليمة، لكن اللي حصل لها ده نتيجة لصدمة عصبية، ده طبيعي بعد موت اختها التؤام واقرب حد ليها، انا اديتها حقنة مهدئة وهي هتنام دلوقتي وبكرة بأذن الله لما تصحى هتبقى زي الفل.. اهدى يا عم سمير وشد حيلك كده، وياريت لما أميرة تصحى ماتسيبوهاش قاعدة لوحدها لان ده غلط على نفسيتها.. يعني.. اقعدوا معاها، وحاولوا تنسوها وحاولوا كمان تعوضوها عن غياب اختها، البنت ماينفعش تتساب كده وألا ده هيكون له تأثير فيما بعد عليها)

سمع سمير كلام الدكتور اللي بعد ما مشي، قعد هو ومراته جنب البنت لحد ما النهار طلع، ومع طلوع النهار، كان سمير ومراته غصب عنهم ناموا جنب أميرة لحد ما هي صحيت لوحدها، بس المصيبة بقى انها لما صحيت، فضلت تصوت وتصرخ.. وقتها صحيت امها ووراها ابوها وحاولوا يهدوها لحد ما هديت شوية، بس البنت وقت ما كانت بتصرخ بعد ما صحيت من النوم، كانت عمالة تشاور على القطة!

في الاول سمير ماكنش عارف في ايه، بس لما أميرة هديت وابتدت تتكلم معاه فهم كل حاجة، وده ببساطة كده لأن البت قالتله وهي بتعيط..

(القطة دي يا بابا.. القطة دي خرجوها برة البيت.. هي اللي موتت سميرة اختي، فضلت تنونو جنبها قبل ما تموت بالليل، وكمان قبل ما تخرج كانت واقفة لها على الباب، ده غير إن انا وانا قاعدة في الأوضة لوحدي.. فجأة لقيتها بتبص لي وكانت عمالة تنونو بصوتها الوحش ده.. لحد ما النونوة بتاعتها اتحولت لكلام.. كانت بتتكلم بصوت سميرة أختي.. والله يا بابا انا مابخرف.. القطة دي مش قطة عادية، دي عفريت او جن.. خرجها من الشقة يا بابا.. خرجها وألا هتموتنا كلنا..)

سمير لما سمع الكلام ده من بنته صدقها، اه... ما انا زي ما بقول دايمًا في كل حكاية حصلت زمان.. إن الناس زمان كانوا طيبين وبيصدقوا في وجود الجن والعفاريت بشكل كبير، ومش بس كده لأ.. دول الناس كمان كانوا بيصدقوا ان الجن ممكن اوي يتشكل في صورة قطة او كلب، وعشان سمير كان راجل طيب وغلبان وبرضه كان من الناس القديمة، ف صدق بنته وخد القطة وسربها، وداها في مكان بعيد عشان ماتعرفش ترجع تاني، بس تفتكر بعد كده حال اميرة اتعدل؟!... لا والله ده بالعكس، البت فضلت لمدة يومين حالها مقلوب، كانت كل ليلة بتفضل تصرخ وتتشنج وتعيط بشكل غريب، وفي نفس الوقت كمان، كانت بتقول انها شايفة القطة واقفة لها في ركن من أركان البيت، وعشان كده راح سمير وحكى لواحد شيخ كان يعرفه، الراجل ده برضه كان زبون عند سمير في المحل.. اصل محل البقالة ده، هو حاجة من ضمن الحاجات اللي بتجمع ما بين كل الناس من كل الطوايف، البقال ممكن تلاقي زباينه دكتور وحلاق ومهندس وعامل نضافة وكمان شيخ..

ف المهم يعني ان سمير لما حكى للشيخ ده على حالة بنته، الراجل قال له انه هيجيله البيت وهيرقيها وبأذن الله هتبقى زي الفل، وفعلًا وافق عمك سمير، وخد الراجل وطلعوا على البيت، واول ما الشيخ دخل اوضة أميرة وابتدا يقرا عليها، البت ابتدت تتشنج أكتر وتصرخ وتزعق وتقول ان القطة عمالة تتمشى حواليهم في الأوضة، وقتها الشيخ كمل قراية والبت فضلت تتشنج وتتشنج لحد ما قامت ومسكت الشيخ من رقبته عشان يسكت، وقتها الشيخ ضربها بالقلم وفضل يضرب فيها ويقول لها..

(اخرج.. اخرج يا مارد يا عدو الله.. اخرج من جسمها والا هموتك من كتر الضرب)

وفضل الشيخ يضرب في البت بالاقلام لحد ما اغمى عليها..

الجزء التاني

↚

(اخرج.. اخرج يا مارد يا عدو الله.. اخرج من جسمها والا هموتك من كتر الضرب)

وفضل الشيخ يضرب في البت بالاقلام لحد ما اغمى عليها، وقتها سمير طبعًا اتخض على البت، لكن الشيخ طمنه لما قال له انها هتفوق بعد شوية وهتبقى كويسة، بس عشان تخف خالص بقى، محتاجة لها كام جلسة كده عشان ترجع زي الأول، وطبعًا لأن سمير ومراته كانوا غلابة، ف صدقوا الشيخ اللي جه للبت مرتين كمان، وفي المرتين دول كان بيعمل نفس اللي بيعمله في كل مرة، كان بيقرا عليها اي كلام، وبرضه هي كانت بتتشنج والراجل كان بيفضل يضرب فيها لحد ما كانت بتغيب عن الوعي، وفي اخر مرة الشيخ ده كان عندهم، قال لسمير قبل ما يمشي..

(والله يا حاج سمير انا بعمل اللي عليا.. ماتقلقش ماتقلقش.. البنت هتخف وهتبقى زي الفل بس احنا نمشي على الجلسات، وانا بأذن الله هجيلها بكرة تاني لحد ما اطرد من عليها المارد اللي لابسها ده، اصل القطة اللي كانت عندكوا دي ماكنتش قطة، دي كانت مارد شديد من الجن.. مارد هو اللي ممكن اوي يكون السبب في موت بنتك سميرة، وهو برضه السبب في اللي بيحصل لأميرة.. بس ماتقلقش يا راجل يا طيب.. انا كده كده هفضل وراها لحد ما اصرفه من عليها خالص.. وساعتها بقى هيبقى ليا الحلاوة الكبيرة.. مش كده ولا ايه؟!)

بس لما الشيخ قال له كده، قعد سمير وهو مكسور وبيعيط زي العيال الصغيرة ورد عليه وقال له..

(انا مش عارف ازاي البت هتبقى كويسة.. انت بقالك يومين بتجيلها وبتعمل لها جلسات من جلساتك دي والبت حالتها بتدهور.. انا بنتي تعبت من كتر الضرب، وانا قربت افلس لأني قاعد جنبها ومابنزلش الشغل، وفي نفس الوقت عمال اصرف عليها واديك في فلوس.. انا بنتي بتضيع وحياتي وحياة مراتي بتدمر..)

وقتها قرب منه الشيخ وهو بيواسيه وقال له...

(جرى ايه يا راجل يا طيب.. انت هتعترض على حكمة ربنا بقى ولا ايه، احمد ربنا واحتسب وخليك قوي كده وكمل.. هو الموضوع صعب لأنه مارد زي ما قولتلك.. بس ماتقلقش.. كل شيء هيتحل مع الوقت)

خلص الشيخ كلامه ومشي، وساب سمير قاعد لوحده في البيت محتار ومش عارف يعمل ايه، لحد ما مراته خرجت من أوضة البنت وقالتله وهي بتصرخ...

(الحقني يا سمير الحقني، بنتك ساكتة ومابتنطقش ولا بتتنفس.. يالهووي، بنتي التانية ماتت يا ناس)

طبعًا سمير اول ما سمع كلام مراته ده، دخل جري على أميرة ف لقاها نايمة او بمعنى اصح بقى مغمى عليها ونَفسها يادوبك كان خارج منها بالعافية، وقتها اول حاجة جت في باله، هو انه يروح جري للدكتور اللي هو يعرفه، بس للأسف.. سمير لما راح للدكتور مالقهوش، لا في العيادة ولا في البيت، وساعتها عرف انه مسافر عشان عنده محاضرات او مؤتمر في محافظة غير القاهرة، ف طبعًا اول حاجة جت في باله بعد كده، انه ياخد البت ويروح بيها على اقرب مستشفى وده فعلًا اللي حصل، بس بعد ما ودى البت للمستشفى والدكاترة كشفوا عليها وقاموا معاها باللازم، جه دكتور من اللي كانوا واقفين مع البت وكان معاه ظابط، سمير اول ما شافهم وهو واقف قصاد الأوضة اللي فيها بنته استغرب وبص لهم وهو مش فاهم حاجة، بس الدكتور اتكلم وقال للظابط..

(هو ده ابوها يا فندم.. انا بلغت باللي شوفته عشان اكون رضيت ضميري قدام ربنا.. انا ماينفعش اشوف بنت متعذبة ومضروبة بالشكل ده، وجاية لي المستشفى وهي ما بين الحياة والموت بسبب الضرب اللي اتضربته ده.. واعدي الموضوع عادي كده من غير ما ابلغ)

وقتها الظابط خد سمير وعمل محضر بالواقعة وخد اقواله، ولما عرف ان الشيخ ده هو اللي عمل فيها كده، أمر بالقبض عليه، واكتشفوا في التحقيقات، انه راجل نصاب وانه سوابق في النصب والدجل والشعوذة، وان دقنه والجلابية والسبحة ولقب الشيخ.. دي كلها حاجات بيضحك بيها على الغلابة اللي زي سمير اللي هم اصلًا بيصدقوا بسهولة ان اي قطة عادية ممكن تبقى جن.. هو اه الجن بيتشكل في شكل حيوانات، بس ده مش دايمًا ومش في كل الحالات..

المهم إن بعد ما الموضوع انتهى بحبس الشيخ واستمرار القضية، اتنقلت أميرة لمستشفى الأمراض العقلية بسبب انها كانت بتعاني من حالة انهيار عصبي من الدرجة الأولى، ولما ابوها راح وحاول يطمن عليها من الدكاترة اللي هناك، قابله الدكتور اللي بيعالجها وشرح له حالة البنت لما قال له...

(بنتك يا حاج بتعاني من حالة انهيار عصبي، وده ببساطة بسبب الزفت اللي انت جيبتوهلها وفضل يضرب فيها ده.. انا والدتها حكت لي على كل حاجة، واللي كان عند بنتك ده مش حالة مس ولا له اي علاقة بالروحانيات وخلينا ناخد الموضوع كده واحدة واحدة.. اولًا الحيوانات بتحس بالكوارث قبل ما بتحصل، وبما إن القطة وسميرة بنتك الله يرحمها كانوا قريبين من بعض، ف وارد جدًا تكون القطة كانت حاسة بأن سميرة هيحصل لها حاجة مش كويسة، ويمكن ده السبب اللي خلاها تصدر اصوات مواء قبل الحادثة بالليل، ويمكن ده كمان السبب اللي خلاها عايزة تمنع سميرة من انها تنزل من البيت بأي طريقة، بس هنعمل ايه يعني..

ده قدر، وماحدش يقدر يمنعه، المهم بقى إن أميرة بعد ما اختها التؤام واقرب حد ليها في الدنيا ما ماتت.. دخلت اوضتها وقعدت لوحدها عشان تحس ان اختها لسه ماماتتش، وده فعلًا اللي عقلها كان بيحاول يوصله لها عشان تقدر تتقبل الصدمة وتتعايش معاها بعد كده، بس للأسف بقى.. العقل لا قدر يستوعب الصدمة، ولا قدر يوصل لأميرة ان سميرة لسه عايشة، وفضل العقل يدور على سبب او اي حاجة ينشغل بيها عشان مايحصلوش انهيار.. ف خلاها انشغلت بالقطة وهيء لها إنها هي السبب في موت اختها، فبالتالي هي خافت منها وشافتها نذير شؤوم واتهيء لها كمان ان القطة بتنونو بشكل غريب من تاني، مع انها كانت ساكتة ومابتتحركش تقريبًا من مكانها من بعد موت صاحبتها اللي هي سميرة، وده اللي زوجة حضرتك قالتهولي على فكرة، بس تعرف المصيبة السودة بقى اللي خلت حالة بنتك انتكست بالطريقة دي كانت ايه.. المصيبة يا حاج سمير.

ان انت بدل ما تحاول تعالج بنتك العلاج المظبوط للي في حالتها وهو طبعًا العلاج النفسي، صدقت انها ملبوسة او ممسوسة من جن، وصدقت كمان ان القطة ملعونة وسربتها من البيت، ولما ده حصل.. المخ مالقاش مبرر او اي حاجة يهرب بيها من التفكير في موت سميرة اللي هو كان صادم جدًا بالنسبة له، ف كمل بقى في موضوع القطة ده وفضل الضغط العصبي يزيد على اميرة اكتر واكتر لحد ما انت جيبت لها دجال بيقول على نفسه شيخ وخليته يفضل يضرب فيها ويعمل لها ايحاء بإنه بيصرف من عليها جن، ف المخ صدق وفضل ماشي في الموضوع عشان يشغل نفسه بأي شيء غير الكارثة الاساسية اللي هو مش قادر يستوعبها وهي موت سميرة طبعًا، وفي وسط ده كله بقى، الحيوان اللي انت جيبته ده، فضل يضرب فيها ويعذبها لحد ما جسمها ضعف والمخ استسلم تمامًا لفكرة الجن او انها ملبوسة، وبدأ يدي في أوامر للجسم عشان ينهار ويستسلم تمامًا، ومع كتر الضرب والانهيار العصبي اللي كان بيزيد يوم عن يوم، البنت انهارت عقليًا وجسديًا لحد ما وصلت للحالة اللي هي فيها دلوقتي دي.. احنا بنحاول نعالجها بالعقاقير وبوجود امها جنبها لوقت طويل من اليوم، لكن كل شيء في إيد ربنا عز وجل.. ادعي ربنا ان بنتك تقوم بالسلامة وتخرج منها على خير، لأنها لو ماخفتش وحصل لها اي حاجة، انت هتفضل طول العمر عايش بذنبها لأنك هتبقى السبب في موتها اكتر من الراجل اللي انت جيبته).

وبعد ما الدكتور خلص كلامه، روح سمير البيت هو ومراته، ومن كتر احساسه بالذنب وكمان احساسه بالألم بسبب موت بنته سميرة اللي كان شاغله عن التفكير فيه تعب أميرة، ف الراجل بعد ما دخل سريره ونام، ماصحيش تاني.. الحزن والهم والأحساس بالذنب يا ابني، خلوه ينام ومايصحاش، اه.. ما هو اكيد قبل ما ينام كان بيفكر في إن بنته سميرة ماتت في حادثة، وبنته التانية اتجننت واحتمال ماتخفش، وشغله وتجارته وقعوا بسبب انه فضل قافل المحل لوقت كبير لحد ما تقريبًا البضاعة اللي فيه باظت، ف اكيد يعني عشان كده، الراجل لما نام، سكره بقى عالي، ف نام نومة أبدية ماصحيش منها تاني.

-طب وأميرة يا ستي.. ايه اللي حصل لها هي وامها؟!

-الحمد لله يا ابني.. اميرة امها فضلت جنبها هي وخيلانها وعمامها، صرفوا عليها كتير اوي لحد ما خرجت وبدأت تتعود على الدنيا وامها فتحت المحل ووقفت تشتغل فيه، وقدرت انها تكمل تعليم البت وكمان تجوزها وبعد كده كتبت لها المحل بأسمها وبقت بتشتغل فيه أميرة وجوزها، والست امها رجعت قعدت في البيت وهي وجوزها بقى كانوا بيصرفوا عليها وبيراعوها لأنها كانت كبرت في السن، وفضلت قاعدة في البيت لحد ما ربنا استرد أمانته، وفي النهاية خالص بقى عايزة اقولك ان أميرة لما اتجوزت، خلفت ولد وبنت.. سمت الواد سمير، والبنت سميرة، بس يا عيني البت فضلت متعقدة من القطط... بالذات القطط اللي لونها برتقالي في ابيض، لأن ده كان لون نفس القطة اللي كانت عندهم قبل ما يحصل لها اللي حصل ده، وابوها الله يرحمه يسربها.

-حلو اوي.. وبعدين يا ستي؟!

-وبعدين ايه يا واد.. ما خلاص كده، الحكاية خلصت، عايز ايه تاني؟!

-اه.. يعني خلاص كده، اميرة خفت واتجوزت وعاشت هي وجوزها في تبات وبنات، وخلفوا صبيان ونبات..

-نبات ايه اللي خلفوه يا اهبل.. انت مش دريان انت بتقول ايه يا واد، ولا انت خوفت من القطة ومابقتش مركز بسبب الخوف!

ضحكت وانا برد على ستي وبقول لها..

-لا لا.. لا خوفت ولا حاجة، انا بس الحكاية دي أثرت فيا شوية، كل اللي فيها والله بلا استثناء صعبوا عليا.. ماعدا طبعًا الدجال ابن ال... النصاب ده.

-والله يا ابني الدجالين والنصابين كتير، وبرضه زي ما في دجالين يستاهلوا الولعة في نار جهنم، ف برضه في قتالين قُتلة يستاهلوا نفس المصير، ومن عند قتالين القُتلة بقى، هنبتدي الحكاية التانية.

ركزت مع جدتي اكتر وقولتلها...

-احكي يا عظمة، احكي وانا هكتب..

ابتدت جدتي تحكي وتقول...