قصة دورة حياة القرين للكاتب احمد محمود شرقاوي

 قصة دورة حياة القرين للكاتب احمد محمود شرقاوي

كلنا عارفين ان القرين موكل بالوسوسة وإغواء البشر لإبعادهم عن طاعة الله، وان كل مهمته هي ابعاد الانسان عن الخير وجذبه ناحية الشر لحد ما ينتهي بيه المطاف ناحية جهنم, وده بنصوص من القرآن واضحة وصريحة, حتى اختصام القرين والانسان امام الله مذكور في سورة ق, اذا فالقرين تقدر تقول انه النفس الامارة بالسوء أو حاجة شبيهة بكدا رغم انه نوع من أنواع الجن اللي عايش معانا واللي منهم فصايل كتير زي المردة والعفاريت والشياطين والقرناء..

ولكن السؤال الأهم, بعد موت الانسان, القرين ده بيروح فين طالما هو لسة عايش؟

القرين في الوقت ده مالوش غير مكانين لا ثالث لهما, أول مكان هو مملكة ابليس, وهي الحصن اللي بيأوي كل الشياطين بكل طوائفهم وعشائرهم، وعندهم رتب ومناصب زي عندنا بالظبط, ولكن للأسف القرين هو الاحقر بينهم, احقر طائفة موجودة في مملكة الابالسة هما القرناء, القرناء اللي مهمتهم الاولى خلصت بموت الشخص الموكل بإغوائه, فبيرجع لموطنه الاصلي عشان يكلف بمهمات تانية..

اهم المهمات دي هي خدمة السحرة, ايوة بالظبط كدا اي ساحر بيعلن ولائه للشيطان وبينشأ العهد بيتم تسخير له قرناء, قرناء ناس ماتت بتبدأ في خدمته..

في البداية بتكون مجرد قرينة, والمعروف ان القرينة اضعف من القرين, ولما الساحر الملعون بيجدد العهود وبيثبت كفره وولائه اكتر للشيطان كل ما بيتم تسخير له قرناء اقوى واكتر في العدد..

حتى ان فيه سحرة وصل خدامهم ل ٢٠٠ قرين واكتر, ودول السحرة اللي وصلوا لمرحلة كبيرة في الشِرك بالله وعِبادة الشيطان على مدار سنين طويلة جدا..

القرين بيكون مأمور انه يخدم الساحر وينفذ كل طلباته والا هيعاقب من زعيم القبيلة, عشان كدا بتلاقي ان العلاقة بين القرين وسيده الساحر هي علاقة كراهية كبيرة, لانه مجبر يخدم بشري هو شايفه أقل منه في المكانة والشأن..

واسلوب عمل القرين معقد نوعا ما, لأنك لما بتفكر تروح لدجال أو ساحر ومسافة ما تقرب من المكان أو تدخل عليه القرين المعاون للساحر بيتسلط على قرينك فورا ويبدأ يعمله حاجة اسمها استنطاق القرين عشان يعرف معلومات عنك..

عايزك تتخيل معايا انك رايح لساحر واول ما دخلت قالك ادخل يا فلان, انت جاي عشان كذا, طبعا انت وقتها بيحصلك شيء من الذهول, اللي هو ازاي الساحر قدر يعرف عني المعلومات دي وانا لسة منطقتش بكلمة واحدة..

بس الحقيقة ان القرناء الخدام بيتسلطوا على قرينك بالقوة عشان يعرفوا معلومات عنك, كل ده وانت داخل للساحر, وفي بعض الأحيان قرينك بيرفض فبيجبروه يتكلم وينطق بالمعلومات اللي هما عاوزين يعرفوها وأوقات تانية بيكون متعاون تماما..

عشان كدا لو اجبرتك الظروف تروح لساحر, شتت القرناء بأية الكرسي وبالتفكير في امور تانية, شتت تفكيرك وحاول تفكر في أي حاجة تانية غير الأمر اللي انت جاي عشانها..

بس من الأمور المُخيفة والغريبة إن العلاقة بين الساحر وخدامه من القرناء بتكون قايمة على الحِقد والكراهية والغل زي ما قولنا وخليني أوضحلك شوية, ولو مش فاهم كلامي خليني أسألك سؤال صغير..

عارف ابليس كره سيدنا ادم ازاي ؟؟

اهو القرين ده جهنمي زي ابليس, تخيل بقا لما يُجبر انه يخدم وينفذ اوامر بشري وهو اصلا شايف نفسه احسن من البشر.

عشان كدا بينتهز اي فرصة عشان يأذي الساحر بأي طريقة, منها وقت النوم اللي بيخليه جحيم مقيم على الساحر, وبشهادة السحرة اللي قالوا اننا مبنامش تقريبا من كمية الكوابيس اللي بتزورنا..

ومش بس كدا ده القرين بيتطرق لايذاء اهل الساحر لو كان متزوج ومنها اجهاض الاجنة وإيذاء زوجة الساحر اللي بعضهن اتصاب بمرض سرطان الرحم بسبب سحر زوجها وانتقام القرين منه, طيب عملية الاجهاض دي أو شلل الرحم بتتم ازاي ؟؟

كلنا عارفين ان الشيطان بيجري من ابن ادم مجرى الدم, والقرين في طور الجنين الاول بيبدء يضرب رحم الام لحد ما يقتل الجنين, وقد اعترف الكثير من السحرة انهم تركوا السحر عشان بس يبقالهم ذرية وأولاد..

ومن الأمور السيئة اللي بتضايق أي ساحر هي صفة شائعة في أوساط الجن الغير مسلم واللي هما بيعاونوا السحرة, والصفة دي هي الكذب والتضليل, وانهم مبيقولوش الحقيقة أبدا إلا لو كانوا مجبرين على كدا, وبما ان هناك عهد بين الساحر وزعيم القبيلة بينص على الاتي..

يقوم الساحر بأمور شركية وكفر صريح في مقابل ان الزعيم يجعل له خدام من القرناء, وهنا لو عصى القرين أمر من أوامر الساحر بيرجع الساحر يتقرب للزعيم ويقوله ان القرين بيعصيه, وهنا الزعيم بيعاقب القرين او بيسخر غيره للساحر لمعاونته, ودي الطريقة الأمثل اللي بتخلي الساحر يتحكم في القرين ويخليه ينطق بالصدق بعد تهديده بأنه هيبلغ زعيم العشيرة إنه مش متعاون معاه..

أما بالنسبة بقا لكيفية عمل الاسحار وازاي بيحصل المس بعد السحر.. او ازاي بيأثر السحر في المريض.. فده هنتكلم عنه برضه بطريقة مختصرة ونربطه بنقطة استخدام القرين..

أغلب الأسحار اللي بتم في الوقت الحالي بيكون مسخر عليها خادم أو قرين من معاونين الساحر, ووظيفة الخادم ده انه يراقب المسحور لحد ما يتصاب بالسحر, وقتها القرين أو الجني ده بيتمكن من الضحية ويبدأ يأذيه على حسب أوامر السحر نفسه, لو كان مثلا السحر بالتفريق فبيبدأ الجني المساعد ده يختلق مشاكل بين المسحور والشخص المُراد تفريقه عنه, ولو مثلا السحر بالخراب أو المرض فبيبدأ يتملك من جسد الضحية ويحاول يأذيه من خلال ابطاء تدفق الدم في الشرايين أو اصابته بأي مرض من الأمراض..

أما عن السحر ده فبيكون عبارة عن كتلة ضخمة من الطاقة السلبية اللي مسافة ما بتصيب الضحية بتضعف بدنه وطاقته النفسية والجسمانية, وبيكون عُرضة للمس أكتر من الوقت الطبيعي, وبيبدأ الجني أو القرين الموكل بالسحر يراقبه ليل نهار لحد ما يحصل موقف ما ويقدر يتمكن من جسمه..

والعلماء قالوا ان أفضل الأوقات اللي بتخلي الجني يتملك من جسم الانسان هي:

حالات الفرح الشديد

أو حالات الخوف الشديد

أو حالات الحزن الشديدة

أو السقوط في معصية كبيرة زي الزنا أو شرب الخمر, المعاصي اللي بتغيب العقل في وقتها دي..

وقتها بيكون الشخص في أضعف حالاته وهنا بيحصل المس, لأنك أصلا مرصود من الجن ومستني الفرصة دي بفارغ الصبر..

وتأثير السحر مع المس في الوقت ده بيكون شديد, السحر بيخلي الشخص دايما تعبان, مُرهق, مريض, حاسس بضيق في صدره وصداع وألم في الضهر, والجني نفسه بيأثر على الضحية بأنه ممكن يصيبه بالخوف من خلال الكوابيس أو انه يخليه يشوف حاجات مخيفة محدش يقدر يشوفها غيره, بل وفي بعض الأحيان ممكن يتجسد قدامه عشان يرعبه ويخوفه..

وده بيكون نوع من أنواع اللعب من القرين أو الجني ده لانه في الأصل مبيحبش البشر وبيعشق تعذيبهم خاصةً لو جتله الفرصة لده..

أما المكان التاني اللي ممكن يروحله القرين هو ان لو مات صاحب القرين في حادثة قتل مثلا أو حادث بشع زي حادثة سيارة أو حرق, أو غرق, هنا ممكن القرين ميرجعش لموطنه ويفضل يتردد على مكان الحادث من وقت للتاني, عشان كدا دايما بنسمع ان الأماكن اللي بتحصل فيها جرايم قتل بتكون أقرب ان يحصل فيها مواقف مرعبة عن غيرها من الأماكن..

وده بسبب ان القرين بيكون موجود في المكان بيحاول يمثل لحظات وقوع الجريمة كنوع من أنواع اخافة الناس, زي شقة الفنانة ذِكرى اللي اتقتلت في شقتها والأحداث اللي كانت بتحصل في شقتها المخيفة كانت حديث الناس لفترة طويلة, ويمكن نعمل حلقة عن مقتلها لأن الموضوع كان غريب ومخيف جدا جدا..

والبعض بيأكد وبيقول انه أوقات بيكون عايز يدل على هوية القاتل كنوع من أنواع الانتقام لصاحبه, زي كتير من القضايا اللي اكتشفوا فيها القاتل بطريقة غامضة ومخيفة وغير مفهومة, زي مثلا ان المحقق يحلم بحلم, أو يشوف مشهد محدش يشوفه غيره يدله على هوية القاتل, ودي طبعا بتبقا من أفعال القرين قولا واحدا..

ومن الوسايل القليلة جدا اللي ممكن تخليك تشوف قرينك هي النظر في المرايات بالليل، عشان كدا كانوا دايما بيحذرونا من الفِعل ده..

أما في شريعتنا الاسلامية فقبل كل ده لازم نستوعب الدرس كويس اللي اتذكر في سورة ق وهي لما القرين يقول "ربنا ما أطغيته ولكن كان في ضلال بعيد" وده معناه انه هيتبرأ منك ومن ذنوبك لو كنت من أهل الفجور أمام الله, وكأنه تحذير لينا بني البشر من اتباع غواية القرين في الدنيا وحتى الممات, لأنك بعد موتك بتكون حر تماما وهو بيروح أماكن تانية زي ما قولنا, فحاول ببقدر الامكان تتمكن وتسيطر عليه لأن زي ما ربنا قال "إن كيد الشيطان كان ضعيفا"

بقلم: أحمد محمود شرقاوي