قصة ابن دهب مستوحاة من أحداث حقيقية للكاتب أندرو شريف

النهاردة عدت سنة على موت خالتي نعمة... الست اللي اعتنت بيا وربتني من بعد موت أمي وجواز أبويا... الحاج الهواري، كبير من كبارات البلد عندنا، بس الكبير كبير في أعماله، أصل مافيش كبير يحرم ابنه من حضنه ويسيبه يتربى بعيد عنه، لكن ربك مابينساش عباده، خالتي نعمة عوضتني واعتنت بيا وعلمتني لحد ما كبرت وخدت البكالوريوس، ونهاية القصة.. حرمان، ماهو لازم في نهاية كل علاقة سعيدة حد يموت، واهي ماتت خالتي وأنا بقيت لوحدي، ماشي اليوم بيومه، تايه في الدنيا، لا عارف أرجع البلد، ولا عارف أقعد في مصر، وفضلت على الحال ده سنة.. سنة لحد ما جتلي مكالمة تيلفون من البلد، رفعت السماعة وساعتها لاقيت شخص بيقولي:

-عدلي الهواري؟

-معاك يا باشا، بس مين معايا؟!

-صالح... ابن...

ماكملش الجملة وقاطعته:

-ابن عمي!!.. ولسه فاكرين ابن عمكوا عدلي، بس طالما عارف الرقم كويس، ليه السماعة ماترفعتش من زمان.

-ماانت عارف خالتك نعمة، كان شرطها ان لا حد يكلمكوا ولا يتواصل معاكوا، إنما الرقم، كان مركون لوقت عوزه، وأهو جه معادها... أبوك، الهواري، بيموت وعايز يشوفك قبل ما يقابل رب كريم.

ضحكت أوي على أخر جملة قالها وبعدها رديت عليه:

-الهواري، ويقابل رب كريم، يا راجل قول كلام غير ده، ده مش هيقابل غير ابليس... عارف ابليس، تلاقيه واقف على فرشته ومستنيه عشان يقعده في حتة تليق بيه، هو وكبارات البلد من بعده، أصل هتلاقيهم كلهم هناك، ولاد حرام صحيح، ما يملاش عينهم غير الظلط.

-اللي فات مات، وخالتك خدتك عشان تبعدك عن الولية اللي اسمها صباح، وكلنا عارفين انها لفت حبالها حوالين أبوك عشان تتجوزه، وده بعد ما عمتي الله يرحمها ماتت.

-قصدك اتقتلت، وماحدش يضرب الهوارى على ايده غير لو هو اللي غاوي، واللي غاوي إن ابنه يبعد عنه، يبقى من أعوان ابليس، وبقولهالك اهو، كرهي له هيستمر ليوم الدين.

-مالوش لزوم الكلام ده يابن عمي، تيجي البلد ونتصافى وكله هيبقى تمام.

-لا، قول للهواري عدلي مش جاي، ومش مسامح.

قولت كده وقفلت السكة في وش صالح، بعدها دخلت أوضتي اتكومت على السرير، كنت حاسس بقرصة برد في جسمي ودماغي كانت وجعاني، مصدعة من اللي افتكرته بعد المكالمة، بعدها روحت في النوم، وبمجرد ما نمت حلمت اني في مكان مضلم، لكن نور القمر جاي على وش واحدة واقعة على الأرض والكدمات باينه على وشها، كدمات مش هقدر أنساها، لا هي، ولا اليوم اللي حصل فيه الجريمة... كان يوم القمر فيه في تمامه، ليلتها خمس رجالة اتهجموا على بيتنا وطلبوا من أمي تدلهم على مكان الدهب اللي هنا، لكن أمي رفضت، قالتلهم إن مافيش دهب في البيت عشان ياخدوه، هم الكام غويشة اللي هي لبساهم، لكنهم ماصدقوش وهددوها بيا، لو ماطلعتش اللي جوه، هيقتلوني، ولما حد رفع عليا السكينة وحاول يقتلني، أمي حاولت تنقذني من ايديهم، وفي اللحظة دي راجل من اللي واقفين ضرب أمي بضهر السكينة اللي ماسكها في وشها، بس ده ماوقفش أمي وحاولت بكل قوتها انها تحوشني عنهم، وأخرتها، فضلت تصوت لحد ما شوية شوية بدأت تسكت، مابقتش بتنطق، وقعت على الأرض بعد ما راجل منهم حط السكينة في بطنها، ولما سمعوا حد برة، هربوا، وقتها أنا كنت واقف مصدوم، الدموع بتنزل من عيني وأنا ساكت، ومع دموعي،أمي بصتلي وهي مبتسمة، وأخر حاجة قالتهالي إن أبويا هياخد باله مني، ومش هيسيبني لوحدي... الله يرحمها، ساعتها ماكانتش تعرف إنه هيسيبني ومش هيسأل عليا.

رجعت مرة تانية للمكان المضلم اللي كنت فيه، بيتنا... والمرادي جثة أمي ماكنتش موجودة، حتى ضوء القمر اختفى وبقى مُعتم، بعدها شموع كتير نورت في المكان، ومن وسط الشموع ظهر واحد، لأ اتنين... دول كتير، كائنات حجمها متفاوت، عندهم عين واحدة، ماسكين في ايديهم عصيان، واضح إنها قديمة من الشقوق اللي فيها، بعدها فضلوا يخبطوا على الأرض بالعصيان كأنهم عاملين عرض، من المنظر بلعت ريقي ورجعت خطوتين لورا، فضلت أقنع نفسي إنه حلم وهصحى منه، لحد ما شخص منهم كلمني وقال بصوت مكتوم، تحس إنه بيتقال في وداني أنا وبس:

-الهواري كان له كرامات عندنا، والدور عليك... أنت اللي هتكمل اللي ابتدى، ولو نفذت كل اللي احنا عايزينه، الدهب هيبقى من نصيبك، الدهب اللي مابينتهيش.

-أنتوا مين، أكيد أنا بحلم.

-هو حلم... حلم إن قبيلتنا تطلب التعاون معاك، واللي المفروض يتشكر على كده هو الهواري، أظن رسالتنا وصلت، هنستناك... هناك، في بيت أم الدهب.

الكائن ده قال كده واختفى، بعدها صحيت من النوم شرقان، قومت من على السرير وأنا بكح وبوئي بيخرج منه دم، اتمشيت للحمام عشان اغسل بوئي، وبعد ما دخلت وبصيت في المراية، مالقتش عينيا، كان مكانهم فاضي، الغريب إني كنت شايف عادي، لحظات وكل حاجة بانت، اللي واقف قدام المراية ده كان شخص تاني، نسخة مني، إنما أنا، كنت طيف، طيف هايم حوالين الشخص اللي يشبهني، وبمجرد ما اتحركت بعيد عنه خطوة واحدة، لاقيته مد ايده ومسكني وهو باصص لي ومبتسم، بوئه وكل أعضاء جسمه كان بيطلع منهم حاجة لزجة لونها أسود، اما انا، جسمي كله كان متكتف، كنت حاسس إن اعضاء جسمي هتنفجر، لكن.. لطن كل ده انتهى في لحظة انفجار جسم الشخص اللي يشبهني، ودي أخر حاجة فاكرها قبل ما أفوق وأنا واقف على سور البلكونة، لا وايه، الشارع كله بينده عليا وبيحاول يصحيني من الغيبوبة اللي أنا فيها، وأول ما فتحت عيني.. شوفت ناس كتير واقفين تحت شباك البلكونة وماسكين مرتبة كبيرة، يعني، تحسبا لأي حركة غلط ممكن تتسبب في وقوعي، كل ده بيحصل وأنا مش فاهم حاجة، وعلى ما استوعبت اللي حواليا وبخطوة غلط مني، وقعت من البلكونة، لكن الحمدلله، قدروا يلحقوني والموضوع خلص بكدمات بسيطة، بس انا.. انا هبقى بكدب لو قولت إن كل حاجة انتهت، الناس كانوا بيبصوا لي كأني مجنون، ولو حكيتلهم على اللي حصل امبارح، ماحدش هيصدقني، اه، وبكده هثبتلهم وجهة نظرهم، وعشان أتفادي نظرات الناس اليومين الجايين، قررت أرجع البلد، وهناك، ابتدت الحدوتة... حدوتة بيت أم الدهب.

********

طلعت الشقة ودخلت أوضة النوم، فتحت الدولاب وطلعت الهدمتين اللي فيه، حطيتهم في شنطة سفر مركونه فوق الدولاب، هي هي نفس الشنطة اللي جينا بيها من البلد أول مرة أنا وخالتي، ذكريات كتير أفتكرتها اول ما مسكت الشنطة وفتحتها، ريحة التراب اللي خرجت منها كانت كلها ذكريات... بس ذكريات سيئة عن ماضي مؤلم أنا عيشته، وعلى الرغم من كده، إلا أني حاولت انسى كل اللي افتكرته، حاولت ورتبت الشنطة وطلعت على محطة الشهدا.. ومن هناك، نزلت وخدت أول قطر للبلد، وأول ما وصلت المركز سألت عن بيت أم الدهب، أصله مشهور هناك، بالذات لإنه البيت الوحيد المختلف عن باقي الشارع، أكبرهم من حيث الحجم، وأول ما وصلت هناك، وقفت قدام البيت والشنطة وقعت من ايدي، بصيت عليه من فوق لتحت وشريط حياتي بيعدي قدامي، أول حاجة جت في بالي هي أمي الله يرحمها وهي بتلعب معايه في الجنينة اللي جوة، أصل البيت متحاوط بجنينة، متكون من 3 أدوار، كلهم متصلين ببعض، لكن في لحظة قطع شرودي صوت واحد وهو بيسألني:

-واقف بتعمل ايه هنا يا أخينا، أمشي بقولك لاحسن حد من عيلة الهواري يلمحك.

-أنا جاي للهواري الكبير، أبويا.

أول ما قولت أبويا.. الراجل ابتسم وقالي:

-أبوك!... الهواري مابيخلفش والبلد كلها عارفة.

-دي قصة طويلة يابن عمي.

ضرب كف على كف وهو بيرد على كلامي:

-يا حلاوة يا ولاد... الهواري بقى بيجيب عيال من الجن كمان.

قال كده ومشي، انما أنا بقى، ف دخلت البيت، خبطت على الباب، ماحدش رد، وقتها سمعت حد بيقولي من برة إن مافيش حد هنا، والهواري الكبير في بيت أخوه، مُسعد... ولما سألته على البيت واتحركت على هناك، خبطت على الباب، ومع خبطتي، فتحتلي واحدة ست، قبل ما تتكلم ركزت معاها وقولتلها:

-عاملة ايه يا عمتي.

بصيت لي من فوق لتحت:

-عدلي!... كبرت يابن الغالية.

-والسنين ماكنتش قليلة يا عمتي، بس نقول ايه.

-خش يا ولدي وبلاش نفتح في القديم، وألا نعمة هتبقى خسرانه فيه، حبها زي ما هي كده، مش لازم نقلب في الماضي... خش.. الهواري قاعد على فرشته جوة، في الأوضة اللي في وشك على طول.

ثواني وكنت واقف على باب الأوضة، وقبل ما أخطي برجلي جوة، قلبي اتقبض، جسمي كله اتنفض من مكانه كأني اتكهربت، بلعت ريقي وساعتها سمعت صوت حد بيهمس في ودني بصوت مكتوم:

-اسمع كلامه يا عدلي، الطريق واحد، والنهاية كمان واحدة... الفكرة في الوقت، الوقت والطريقة.

قبل ما أرد على الصوت حسيت بـ ايد لمست كتفي، ومعاها سمعت ست كبيرة وهي بتقولي:

-ايه يا ولدي، مالك، اتسمرت مكانك كده ليه؟

جسمي هدي زي الأول وقلبي رجع ينبض طبيعي، بعدها بصيت للست:

-معلش يا عمتي، افتكرت حاجة كده.

ردت عليا وهي باصه في عيني:

-لو سيبنا نفسنا للذكريات، القلب هيقسى يا ولدي... دول هم يومين مافيش غيرهم، وكل حاجة هتنتهي، أكيد قالولك كده.

-هم مين دول يا عميتي.

(خش يا عدلي... خش يا ولدي)

الصوت ده ماكنش صوت عمتي ولا ردها على كلامي لأنها مالحقتش ترد، انما ده كان صوت أبويا... الهواري الكبير، كان بيناديني من جوة الأوضة، في اللحظة دي عمتي بصت لي:

-ايه يا ولدي، هتفضل واقف متسمر مكانك، ده المشوار طويل من مصر ومايخلصش على عتبة باب.

ماردتش عليها ودخلت الأوضة، بعدها قفلت الباب ورايا ومشيت، ومع دخولي، قعدت على كرسي خشب قديم جنب السرير، كان نايم قدامي راجل كبير في السن، باين عليه الكِبر، بصيتله وأول حاجة قولتهاله:

-شوفتي ليك وأنت راقد دي، بالدنيا يا هواري، نسيت الماضي ولا أفكرك، بس مش مهم... المهم ان ربنا كتبلي إن أشوفك وأنت بين ايدين ابليس، وأظن إنك عارفه كويس، ماهي أعمالك كلها تحت طوعه وأمره، ولو ماكنش كده... كنت سيبتني في حضنك، ايه.. مش كفاية اللي شوفته في ليلة البدر.

رد عليا بصوت تعبان:

-الغيلان يابني مش ابليس، هم السبب في كل حاجة، في التعب قبل المال والمكانه، وهم برضه اللي جايبينك هنا، أصله مش بمزاجك ولا بمزاجي، كله متخطط ومكتوب يابن الهواري.

-يعني ايه متخطط ومكتوب؟

ضحك ضحكة خلته يكح وهو بيرد عليا بالعافية:

-يعني مصيرنا كلنا واحد، وزي ما اتكتب عليا في الماضي، هيتكتب عليك وهتعيشه، والأهم... إنك تستمتع بالخير اللي هيجيلك، هو الوحيد اللي هيصبرك على أذاهم في حياتك، وقلبك ده، انساه، عشان هيموت مع الليلة الأولى.

الهواري خلص كلامه من هنا وملامحه اتبدلت من هنا، بقت ملامح شيطان، مرعب، جلده بقى أحمر وعينه اتحولت لعين ديب مسعور، وبسرعة، قام يهجم عليا وأنا على الكرسي، وبسبب هجمته وفي ردة فعل سريعة مني، مسكته من رقبته ورجعته على السرير وأنا بخنق فيه، فضلت اخنقه غصب عني لحد أخر حاجة قالها قبل ما يقطع النفس:

-هتموت، هتموت يابن الهواري.

وأول ما قطع في النفس رجعت كل حاجة زي ما هي، بعدها طلعت برة لعمتي وقولتلها بحزن:

-الهواري الكبير.. مات... ابويا مات.

صرّخت بصوت عالي، من الصوت الجيران اتلموا، بعدهم عمي مسعد وصالح ابن عمي جُم، عرفوا الخبر والحزن مافارقش وشهم حتى ولو حاولوا يداروه، طب وأنا.. أنا كنت فاهم وعارف اللي حصل، أنا اللي انتقمت وقتلت الهواري الكبير، خدت حق أمي وحق كل اللي ظلمهم، لكن ماكنتش اعرف إني بالطريقة دي هعيش أيام صعبة، وبدايتها من أول ليلة ليا في البيت... بيت أم الدهب.