حواديت المشرحة بقلم أندرو شريف

الحب كان دايمًا بالنسبة لي شيء مستحيل، مابحبش انا جو الحبيبة والإرتباط والكلام ده، بطني بتوجعني بمُجرد ما بسمع كلام حلو بيتقال بين راجل وست، فـ كان دايمًا في حاجز بيني وبين فكرة الحب، وبالنسبة للجواز فكنت سايبها على الله، زي ماتيجي.. تيجي، فضِلت كدة سنين طويلة لحد ما فجأة قابلتها.. مريم، كانت ملاك.. ملاك ماشي على الأرض، بقلبها الطيب وروحها الحلوة، ده غير بقى تفكيرها وعقلها الكبير اللي بيخليها تستوعب كلامي وتدور معايا على حلول لمشاكلي، المشاكل اللي كنت دايمًا بحكيلها عنها وهي كانت تسمعني بكل حب، من غير ما تزهق أو تمِل، عشان كدة اقدر اقول إن في اللحظة اللي عرفت فيها مريم، عرفت معنى الحب، وجمال الحب نفسه.

حواديت المشرحة

انا فين؟.. ايه الضلمة دي؟.. كنت نايم وسط ضلمة وبرد شديد، وماكنتش قادر أتحرك، كإني متقيد، أطرافي كلها متلجة، فضلت أنادي على مريم لأنها كانت أخر شخص موجود معايا، ناديت كتير، لكن ماحدش رد، بس سيرتها جابت النور اللي نوّر العتمة مرة تانية، وفجأة شوفت قدامي شخصين، لابسين ابيض لكن متلطخ بالدم، وبيبصوا لبعض بنظرات كلها رعب، حاولت اتحركت ناحيتهم عشان أشوف مين دول؟.. بس لاقيتهم شايلين حاجة في ايديهم بتنقط دم على الأرض، خدوها وخرجوا من باب لونه أسود، وقفلوا الباب وراهم كإن مافيش حد تاني في الأوضة غيرهم، قومت من على الترولي اللي كنت نايم عليه، وساعتها اكتشفت إني عريان، بصيت حواليا يمين وشمال والحمدلله لقيت حاجة البسها، لبست اللبس اللي جه قصادي، بعدها بدأت احاول اعرف انا فين، ويارتني ماعرفت، انا كنت.. كنت في المشرحة!.. ومش في أي حته فيها.. أنا في أوضة التشريح.. وسط الميتين!.

قصتي بدأت لما اتعرفت على مريم، وبدأت الكيميا بنا تمشي، لدرجة إن يومي ماكنش ينفع يعدي من غير ما أسمع صوتها، أو أكلمها، فكانت علاقتنا شبه علاقات الأفلام شوية، العلاقات اللي كلنا بنشوفها ونقول (ياعم هو الكلام ده بجد) لكن أه، كان حقيقي معايا ومع مريم، ويوم خطوبتنا كان اجمل يوم في حياتي، مع مريم.. كنت حاسس إني عايش في الجنة.

بعد ما لبسنا الدبل بأسبوع روحتلها البيت، لإننا كنا متفقين نخرج يومها، وكعادتها خدت وقت طويل عشان تلبس، ووقتها استاذة هناء حماتي طلبت مني أطلع أقعد معاها لحد ما مريم تخلص، طلعت وقعدت في الصالون، اتكلمنا شوية بس بدأت أستاذة هناء تتكلم في موضوع غريب.. ولقتها بتسألني فجأة...

- لو خيروك بين موتك وموت بنتي، تختار مين فيهم؟

رديت بكل تلقائية...

- موتي أنا طبعاً يا طنط، هو حضرتك عندك شك واحد في المية إن حياة مريم أهم مليون مرة من حياتي؟

طبطبت عليا بدراعها وقالت...

- دايمًا بقول إنك بتحبها وخايف على مصلحتها يا أمير يا حبيبي، عشان كدة استغربت انها من امبارح زعلانة، وقولت لنفسي انك مستحيل تزعلها.

- أنا يا طنط!!.. لا لا والله، انا عمري ما فكرت أزعل مريم مني، أكيد في سوء تفاهم ولا حاجة، ده حتى كانت مبسوطة إننا هنخرج النهاردة، وهنروح بالموتوسيكل بتاعتي زي ما هي طلبت، مع إني مابحبهاش تركب الموتوسيكل.

ضربت كف على كف وقالت...

- ولا أنا يابني والله، أنا مش عارفة ايه غيتها في ركوب الموتوسيكلات، ولولا إنها زعلانة كنت رفضت حاجة زي دي، بس أنا واثقة فيك إنك هترجعها كويسة، أنت ابن حلال يا أمير، وأنا بحبك زي ابني اللي ماجيبتوش.

- مريم في عينيا يا طنط ماتقلقيش.

ماكملتش جملتي ولقيت مريم خرجت من اوضتها، كانت زي ملاك نازل من السما، ومتشيكة ولا أكننا رايحين فرح، حتى أستاذة هناء لما شافتها كدة قالتلها...

- اللي يشوفك كدة مايقولش بقالك يومين بتعيطي في الأوضة.

مريم اتكسفت من الكلام، وبصت فى الأرض وهي بتقول...

- انتي قولتيله ليه يا ماما، أنا ماكنتش عايزاه يعرف، كفاية التعب اللي بيتعبه في الشغل.

قومت من مكاني، وقربت منها وأنا باصص في عينيها، وقولت بصوت واطي...

- يا حبيبتي تعبك راحة، ولو ماكنتيش تشاركيني الحاجات اللي زي دي... هتشاركيني ايه يا مريوم يا قمر انتي.

ابتسمت بخجل من غير ما ترد، استاذة هناء قطعت لحظة الصمت وقالت بحزم...

- مش قدامي يا ولاد، ويلا امشوا عشان ماتتاخروش على مشواركم، وزي ماقولتلك يا أمير... مريم في عينيك، وخلي بالك عليها من الزفت اللي أنتوا هتركبوه ده.

- من عينيا يا غالية، هترجعلك معاها حتة.

فضلنا نهزر شوية قبل ما ننزل من البيت، ولما نزلنا وقبل ما تحرك بالمكنة اتطمنت ان كل حاجة تمام، والخوذة بتاعتي اديتهالها خوفا عليها، لكن قبل ماطلع بالمكنة لاقيت شخص واقف قصادي، الغريب إن مريم ماكنتش شايفاه، لأنها كانت مكملة كلام معايا بشكل طبيعي، والشخص اللي واقف قصادي كان مبتسم وبيقول...

- ماظنش إنك عايز تكمل اللي حصل بعد كدة، بالذات إنك السبب... زيك زينا بالظبط.

بلعت ريقي وقولت...

- يعني ايه أنا السبب، وايه اللي حصل بعد كدة؟

- شكل الواقعة كانت شديدة عليك، نسِتك كل اللي حصل.

بعد ماخلص الجملة دي اختفى، وصوت مريم بدأ يعلى في ودني وهي بتطلب مني أطلع بالموتوسيكل، بدل ماحنا واقفين كل ده من غير ما نتحرك، والغريب إن ولأول مرة أحس إن مريم فعلا متضايقة وعصبية بسبب حاجة معينة، حاجة هي مش راضية تقولي عليها، ومجرد ما فكرت التفكير ده سمعت صوت بيهمس في ودني وبيقول...

- ومش هتعرفها دلوقتي يا أمير.

اتلفِت يمين وشمال أشوف مين بيكلمني، وزي ماكنت متوقع مالقتش حد، فاتحركت بسبب زنها عليا، وفي وسط الطريق لاقيت موبايلها بيرن كذه مرة وهي مش راضية ترد، واتعصبت لدرجة إنها كانت هترمي الموبايل في الشارع وقالت...

- أنا مش عارفة ماما عايزة مني ايه دلوقتي، احنا ماكملناش نص ساعة برة.

- اهدي بس، تلاقيها عايزة حاجة مهمة، مش شرط تكون بتطمن عليكي يعني، وبعدين مانتي عارفة.. هي بتخاف من الموتسيكلات، ردي عليها شوفيها عايزة ايه.

اتقمصت من كلامي، وردت عليا وهي متعصبة...

- بقولك ايه.. مش انت عايزني مبسوطة ويفرق معاك زعلي، فكك من التليفون ززود سرعة.

رفضت في أول مرة، لكن بعد زن منها زودت في السرعة، ولسوء حظنا عربية كسرت علينا وخبطتنا، وساعتها اتقلبنا على الأرض، آخر حاجة فاكرها كانت مريم وهي سايحة في دمها قدامي، وعلى الرغم اني حاولت أساعدها، لكن ماقدرتش لإن جسمي كان مدغدغ من الواقعة، وفجأة أغم عليا.

لما فوقت لاقيت نفسي نايم جوة مكان ضلمة والجو برد جدًا، حاولت اتلفت حواليا بس المكان كان ضيق، وسمعت صوت جاي من بعيد، رفعت رقبتي على قد ما اقدر لكن راسي اتخبطت في حاجة، حاولت ابص مرة تانية ووقتها شوفت من بعيد اتنين لابسين لبس دكاترة، وشوفتهم قدامي طالعين برة الأوضة وبيقفلوا الباب وراهم، بعد ماخرجوا زحفت بجسمي لحد ما وصلت لفتحة في اخر المكان اللي انا فيه ده، بعدها طلعت برة، وساعتها اكتشفت إني.. إني في المشرحة، ايوة هي دي المشرحة، كان قدامي ترولي فاضي وعليه دم، وبطول الحيطة تلاجة كبيرة كل فيها ابواب كتير، انا فاكر الشكل ده كويس، لإني دخلت مشرحة قبل كدة، حسيت قلبي هيوقف، انا ايه اللي جابني هنا؟!.. انا مُت؟.. ولا لسه عايش؟.. بدأت احسس على جسمي لكن كل حاجة كانت طبيعية، اومال انا جيت هنا ليه؟.. الجو كان برد جدًا، دورت على أي حاجة البسها ومالقتش غير بالطو مرمي على كرسي مكتب، موجود ورا الترولي، بعدها جريت على الباب وفضلت أرزع عليه بس ماحدش فتح، حسيت نفسي بيتخنق، المكان رغم إنه واسع لكن مٌقبض.. رزعت أكتر على أمل إن حد يفتحلي ومافيش فايدة، قعدت على الأرض والدموع بتنزل من عينيا وحسيت إني هموت بجد، وفجأة سمعت صوت بيقول...

- ماتتعبش نفسك عشان ماحدش هيسمعك، أنت هنا زيك زينا.

بصيت ناحية الصوت، وساعتها شوفت نفس الشخص اللي ظهرلي قدام الموتوسيكل، كان واقف قدامي بس وقبل ما أقول أي حاجة اختفى بنفس الطريقة، كإنه شبح وبيطاردني، وفي لحظة المشهد اتبدل، وأوضة التشريح بقت أوضة في شقة قديمة، حيطانها مكسرة، وكان فيه صوت مزعج زي مايكون في ماية بتنقط من الحيطة، وكان في 3 رجالة قاعدين على ترابيزة بيشربوا بيرة، وواحد منهم اتكلم وقال...

- جرا ايه يابو حميد، مش هنبطل القعدة في المخروبة دي، بيني وبينك كدة الواحد حاسس إن السقف هيوقع عليه وهو قاعد.

رد عليه اللي اسمه أبو حميد وقاله...

- ياعم أقعد كدة وصلي على النبي، أنت فاكر نفسك فين يا صلاح؟.. هو احنا لاقين مطرح تاني نترزع فيه.

- طب واللي يجبلك فكرة لوز اللوز تخلي عندك بدل الشقة اتنين، وياعالم ممكن تكون ڤيلا، أنت وحظك بقى الخزنة هيبقى فيها كام يومها.

واحد فيهم بص لصلاح ده وقاله...

- ليه يابو صلاح، هنسرق بنك ولا ايه؟.

رد عليه صلاح وهو موطي صوته...

- هنسرق يا باهر، بس مش بنك.

رد عليه باهر وهو متوتر...

- يفتح الله يا ابن عمي، الفلوس الحرام حلوة مش هقولك لا، بس نومة البورش وحشة وصعبة أوي، والواحد عنده عيال وولية متلقحة في البيت، ولا ايه يا اسماعيل، ساكت كدة كإنك موافق على الكلام يعني.

اللي اسمه اسماعيل ولع سيجارة، وشد منها نفس ونفخه في الهوا، قبل ما يرد عليه...

- اركن أنت يا باهر دلوقتي، أما نشوف صلاح عنده ايه يقولهولنا، يمكن المصلحة تقضي.

صلاح بص لباهر وهو بيضحك...

- شايف الكلام الموزون يابن خديجة، مش تقولي بيت وعيال، أنت أصلا عارف عيالك في سنة كام، وبعدين المصلحة دي هتفيد كل واحد فينا.

في وسط الحوار اللي كان داير بينهم، شوفت واحد متكوم على جنب، وباين عليه إنه بيشرب سيجارة من إياهم، فرمي الباقي من السيجارة على جنب، وبص لصلاح وهو مغمض عينيه وبيقول بصوت نايم...

- بقولك ايه يابو صلاح، المصلحة دي لو جاي منها قرشين هيكيفوا دماغي اسبوع، فانا جاي مني وقتي.

رد عليه صلاح وهو بيضحك...

- بالله عليك يابو منة ماتفردش صدرك أوي كدة، عشان انا أخاف تيجي معانا ننساك هناك اصلًا.

ضحكوا كلهم، بعدها ابو حميد قال...

- أنا مش عارف لولا المخروبة اللي قاعدين فيها دي كنا هنعمل فيك ايه يابو منة، وانت على طول في غيبوبة.

- فوق الصح يابن عمي، وأنت يا بو صلاح ارمي اللي في عبك، ورسينا على الحكاية.

صلاح طلع ورقة من جيبه، وحطها على الترابيزة قدامهم، وبعدها بدأ يشرحلهم كل حاجة بالتفصيل...

- الحدوتة إن في جمعية بتلم تبرعات لمرضى السرطان، ومراتي شغالة هناك عاملة نضافة، وعرفت منها إنها اجازة يوم الخميس عشان سيستم الكاميرات بيتظبط، وهيفضوا المكان، يعني هندخل ونخرج براحتنا، مش هيعطلنا بس في الموضوع ده غير اتنين أمن هيبقوا واقفين على الخزنة، وأظن حاجة زي كدة هتبقى سهلة عليكوا، ولا ايه يا رجالة؟

رد عليه أبو منة وهو بيولع سيجارة تانية...

- والله يابن عمي حدوتة تستاهل سيجارة من نوع فاخر، ولو كان على الأمن، فدول بتوعي.. أنتوا عارفين كويس أبو منة على ايه.

ابو حميد كان باين عليه إنه مضايق، وقام من على الكرسي وهو مش عاجبه الكلام...

- بقولكوا ايه أنا مش عاجبني الكلام اللي بيتقال ده، وأي حاجة هنعتمد فيها على أبو منة مش هنرجع منها سُلام، لامؤخذة بقى يابو منة، بس كلنا عارفين دماغك واللي بيجي من وراها، فأنا من رأيي لو هنعتمد المصلحة دي، يبقى من غير أبو منة، وحقك محفوظ يا سيدي، كفاية استضافتك لينا في بيتك.

قام صلاح من على الترابيزة ورجع خطوتين لورا، بعدها رفع ايديه الاتنين وقال...

- على خيرة الله يا رجالة.. نقرأ الفاتحة.

في اللحظة دي المشهد اتبدل لمكان تاني، كان زي مايكون شقة كبيرة أو فيلا، مش عارف احدد هو ايه بالظبط، بس لقيت قدامي أبو حميد وباهر قاعدين على الأرض، وحواليهم افراد من الشرطة، من مكاني كنت قادر اشوف اللي جوا المبنى واللي براه، وخدت بالي من صلاح واقف برا بشنطة مليانة فلوس، وعلى الرغم من المسافة اللي بنا إلا إني حسيت إنه واقف جنبي، وسمعته بيقول...

- معلش بقى يابو البهابير أنت وأبو حميد، سامحوني يا رجالة بس الشغل شغل، وانا مابحبش اسيب حاجة للصدف.

بعد الجملة دي طلع سلاح ألي من الشنطة اللي في ايديه، واستنى لحد ما الشرطة طلعت من المبنى ومعاهم باهر وابو حميد، ومن غير رحمة ضرب عليهم نار، وقتل الاتنين، بعدها خد بعضه وهرب، حاولت أساعد في إنقاذهم، بس أنا كنت مُجرد روح، ماقدرش اعمل حاجة غير إني اتفرج على المشهد اللي بيحصل قدامي، فكنت واقف مش عارف أعمل ايه، ولا حتى أخرج من هنا ازاي، لكني شوفت نفس الشخص اللي بيظهرلي في اوقاتي المرعبة، واقف وسط الجثث، كان بيبصلي بدون خوف وسمعته بيقول...