الجريمة السهلة بقلم الكاتب أحمد محمود شرقاوي

_ قولي بقا دبحت مراتك وعيالك ليه ؟؟

_ كنت خايف عليهم

_ انت هتشتغلني يا معتوه انت ؟؟

بكاء، بكاء هيستيري..

كل حاجة كانت وردية، وردية لأقصى درجة، محاسب شغال في بنك وعندي ولد وبنت، ساكن في منطقة هادية نوعا ما، الحياة مستقرة، المرتب بيكفي ولله الحمد..

الجريمة السهلة بقلم الكاتب أحمد محمود شرقاوي

في الليلة دي كنت سهران سهرة رومانسية مع مراتي، كنت حاسس ان فضل ربنا عليا عظيم، حتى مراتي ست بمعنى الكلمة، الست اللي قادرة تلون حياتك السودة لألف لون مبهج..

جمال

أدب

أخلاق

وكل ما تتخيله فيها، حتى ولادي شهد وإياد، حضنهم ليا بعد الشغل بينسيني الدنيا كلها وما فيها..

وفي يوم كنت أتمنى اموت قبل ما اروح شغلي لقيت سامح صاحبي قاعد بيكلمني:

- انا بفكر اخود قرض

- ليه يابني بتفكر في كدا

- يعني عجباك المرمطة اللي احنا فيها دي

- احنا احسن من غيرنا

- ولا احسن ولا اوحش، انا هاخد قرض وافتح محل واكبره واستقيل بقا من اللي انا فيه ده

وبالفعل مشي سامح في اجراءات القرض، وكلها اسبوعين وخد القرض وفتح المحل، روحتله في الافتتاح واتوهمت، محل مشويات من العيار الثقيل، الزباين عليه زي النمل..

من جوايا حسيت بحسد تجاهه، عرف فعلا يشغل دماغه ويبعد عن روتين الوظيفة وقرفها، واستمرت الايام، الأيام اللي بقت ثقيلة عليا، المرتب مبقاش يكفي، بقيت بتصنع مشاكل مع مراتي في البيت..

ليل نهار بفكر في فكرة القرض، خاصة لما عرفت ان سامح سدد قسط اول تلت شهور عادي جدا ومكمل في مشروعه وبيكبره..

اخلاقي بقت صعبة وبقيت بعمل مشاكل في كل مكان، البيت، الشغل، كل مكان، لحد ما في ليلة اتخانقت مع مديري وسبت الشغل بدري يومها..

ولقيت رجليا رايحة عند سامح، سامح اللي كان في بيته مش في الشغل، قعدت معاه وفضلت اشتكي، اشتكي، لحد ما داس على اللغم جوة دماغي..

- طيب ما تاخد قرض

يمكن انا اصلا كنت رايحله عشان يقترح عليا الاقتراح ده، جاوبته بتوتر:

- قرض بضمان اي بقا

- ياعم انت ناسي ان ابن عمي هو مدير القروض في البنك، ممكن نعمل قرض بضمان الشقة بتاعتك والوظيفة

- لا لا شقتي لا

- متقلقش، انت هتعمل قرض بمبلغ وقدره، هتظبط مشروعك صح وهو هيشيل تمن القرض ويجبلك ربح

- بصراحة قلقان

- بص انت محظوظ، انا عارف مكان ينفع هايبر ماركت، لو أجرته من الراجل وفتحته صح هتبقا مليونير

روحت البيت وانا دماغي عمالة تزن، حاسس بنار بتاكل فيها، ومع شروق الشمس اتصلت بسامح وكلمته:

- يالا نمشي في الاجراءات

واتصل سامح بابن عمه، وابن عمه وافق بضمان الوظيفة والشقة يديني القرض، خاصة ان الشقة سعرها في حدود نص مليون، وقيمة القرض كانت ٧٥٠ الف، وكلها اسبوع واتوافق علي القرض وسحبت الفلوس..

في نفس اليوم روحنا للمستأجر وكلمناه على المحل، ووافق يأجره مبدأيا ست شهور عشان يشوف معاملتي في دفع الايجار..

ونزلت جبت بضاعة بنص مليون، عملت هايبر كامل متكامل، غير التشطيبات اللي سحبت الباقي تقريبا، مبقاش باقي غير كام الف..

كلمت ست شباب عشان يشتغلوا، منهم واحد يقف كاشير، ايام من العمل الذي لا يطاق عشان اجهز ليوم الافتتاح..

وبالفعل انطلقنا، وافتتحنا المحل، وكان الاقبال معقول، اقبال بيقول ان اليوم الواحد هيدخل عائد اكتر من عشر الاف مثلا..

بس وسط اليوم حصل الغير متوقع، خناقة مع الشاب اللي واقف علي الكاشير لأنه بطئ جدا، الناس استنت كتير عشان تدفع..

ومع الضغط والمشاكل الناس سابت مشترياتها ومشيوا، تاني يوم نفس المشكلة، والناس قلت النصف واكتر..

جريت على سامح اكلمه عشان يشوفلي كاشير قديم في الشغلانة مردش عليا، تجاهلني تماما، وبقيت محتاس، ومع تالت يوم المكان بقا بيصفر حرفيا..

مفيش ولا زبون، ومع نهاية اليوم عملنا ٣٠٠ ج حصيلة اليوم..

وبدأت الكوارث اللي معرفش بتيجي منين، اولها ان المحل سمعته اضربت، مبقاش فيه زباين، ثانيا فيه هايبر فتح بعد اسبوع واحد في الشارع الرئيسي، وتقريبا الكل راح عنده..

خلص الشهر الأول وبقيت مطالب بأجور ست عمال وكهرباء وايجار واشيل تمن القرض..

ولما طلعتهم لقيت نفسي خسران عشر الاف دفعتهم من الباقي من فلوس القرض..

دعيت ربنا يسترها في الشهر التاني، بس الشهر التاني كان اسوأ، ومحققتش مبيعات الشهر الأول اصلا..

مشيت تلت شباب من المحل والتلاتة التانيين فهموا اللي فيها ومشيوا..

وقعدت انا لوحدي في الهايبر، وجه المستأجر عايز فلوسه، واديته من اخر فلوس من القرض..

ومع الشهر التالت كنت بشحت تقريبا عشان الكارثة..

القسط الاول للقرض، لاني مطالب كل تلت شهور ادفع، الايجار، الكهرباء..

ودفعت، دفعت مرتبي كله مع بيع بضاعة بنص التمن، وسددت، سددت وبقيت حرفيا على الحديدة، مفيش فلوس حتى اكل انا وعيالي..

سامح اختفى مبقاش بيعبرني، بقيت بجيب أكل من الهايبر عشان ناكل..

تلت شهور تانيين ومبقتش قادر ادفع اي حاجة، واتأخر عليا ايجار تلت شهور، ومدفعتش للبنك جنيه..

وفي ليلة هي اسوأ ليلة في حياتي لقيت المستأجر جايب الحكومة وجاي يعملي اخلاء، تلت شهور مدفعتش واكتشفت ان فيه بند في العقد يحق للمستأجر طردي في حالة عدم الدفع..

وبقيت انا وعربية بضاعة في الشارع، وعشان البضاعة متبوظش روحت بعتها، يالا ماهي خربانة خربانة..

شهرين وانا قاعد في البيت عندي عقدة نفسية، خصومات من الشغل ومعاملة وحشة بسبب اهمالي الشديد فيه، هوب جت الطامة الكبرى..

اخطار من البنك لو مدفعتش المتأخر خلال اسبوع هيتم الحجز على الشقة، انا كدا مطالب بدفع تلاتين الف جنيه، وانا اصلا مش معايا جنيه..

وبقيت انا والخراب على بعد ايام، ولادي ومراتي هيروحوا فين..

الاكتئاب زاد وحالتي النفسية نزلت للصفر، اطردت من الوظيفة وبقيت في الشارع، قاعد بفكر، بفتكر كل لحظة عدت عليا وانا مستور في بيتي، انا اللي مرضتش وجريت ورا فلوس حرام، دلوقتي جاي تفتكر انها فلوس حرام..

وفي ليلة سألتني شهد

- بابا لما اكبر عايزاك تفتحلي عيادة عشان هبقى دكتورة

كلامها كان زي السكين، هتكبري فين وانتي في الشارع كلاب السكك بتنهش فيكوا بعد ما ابوكي هيبقا في السجن، انتوا اغلى من انكوا تترموا في الشارع..

نزلت جبت تورتة وجمعتهم، مراتي كانت بتبصلي بتعجب وحزن، كنت شبه المجانين، احتفلنا بنجاح بابا في شغله الجديد..

وفي العصير حطيت لهم منوم، والكل نام، حطيت كل واحد في سريره ومسكت خنجر..

بصيت لمراتي الملاك النايم وتخيلت حد بيغتصبها هي وولادي، انا مستحيل اسمح بده، وغرزت السكين في رقبتها، غرزته لحد ما دمها نزل زي الشلال علي السرير..

كنت جامد المشاعر مش قادر حتى اتأثر، دخلت على إياد وعملت معاه زي امه، بوسته وسيبته جثة هامدة..

دخلت على شهد وقبل ما اقرب منها فتحت عينيها، شكلها مشربتش من العصير، اول ما بصتلي جسمي كله اتنفض، لقيتها بتتكلم بخوف:

- انت اتعورت يا بابا ايه الدم ده

خدتها في حضني و

بكاء هيستيري قدام الضابط،

- وقتلتها، قتلتهم عشان كنت خايف عليهم، خايف عليهم من دنيتكم القذرة

وثورت، ثورت وهجمت على الضابط حاولت اقتله، يقال اني اتحولت للمصحة، ويقال اني اتعدمت، انا معرفش انا فين دلوقتي أصلا، كل اللي شايفه ضباب في ضباب..

.............

نسيت اقولك، سامح كلمني بعد ما قتلت عيلتي في نفس الليلة، رديت عليه وانا متخدر، اعتذرلي انه سابني بسبب مشروعه اللي خسر وهو كان عاوزني اخسر زيه، وان الزحمة دي معملتش حاجة في مشروعه، وطلب مني اسامحه..

في نفس الليلة كان التلفزيون شغال ولقيت سؤال بيسأل الشيخ

هل القروض تعتبر حرام

رد وقال: القروض نظام ربوي لا ينبغي علي المسلم ان يعمل به والا سيقع عليه ما يقع على آكل المال الحرام، من يفعله يحاربه الله تعالى في ماله وحياته وحتمًا سيرى المصائب في الدنيا ولن يقدر عليها

"مستوحاة من أحداث حقيقية

أحمد محمود شرقاوي