خاتم الشيطان بقلم  أحمد محمود شرقاوي

قاعد على القهوة في أمان الله وبشرب الشاي بتاعي وإذ فجأةً انتبهت على صوت صريخ وهرج ومرج وناس عمالة تجري وكأنه يوم القيامة، جريت مع اللي بيجروا لقيت سواق عربية ميكروباص فارم واحد، المنظر خلى قلبي يتقبض، الراجل تقريبا جسمه كله اتكسر، تحس ان جسمه بقا عبارة عن كومة لحم، الدم نازل من راسه ومناخيره وكل حتة تقريبا..

قصة خاتم الشيطان

كان باصص لينا بذهول، مبرق، عينيه بيضا، مخيفة، راودني شعور بالرهبة، الخوف، انا خايف اقرب من الراجل ده، وتقريبا الشعور ده راود الكل..

الكل واقف حولين الراجل بيتفرج عليه وبس، مش ندالة بس فعلا فيه شعور مرعب، الراجل كأنه اصلا كان ميت ودي تاني مرة يموت، في الوقت ده عينيه وقعت عليا انا، انا وبس..

جسمي كله قشعر، قلبض اتقبض، وغصب عني قربت منه، حاربت شعور الرهبة وحاولت اساعده، قعدت على الأرض وحطيت راسه على رجلي، في اللحظة دي شوفت عينيه..

عين واحد ميت، بيضا، تحس انها عامية، مفيهاش النن الاسود ده، وفي اللحظة دي مسك صباعي وخلع خاتم من صباعه وقام ملبسني الخاتم..

الخاتم كان سخن، سخن اوي اوي، وثقيل، بصيت للخاتم لقيته خاتم اسود والفص بتاعه على شكل جمجمة منقوش عليها كلام كتير، بصلي وابتسم ومات، مات ودمه كان مغرق هدومي..

معرفش ليه كلنا كنا ساكتين، صمت، صمت تام، مع انها مش عادة المصريين، لو موقف مشابه كان زمان السواق مطحون ومتسلم للقسم والناس بتبكي وتترحم على الميت..

انما الشعور اللي كان منتشر حولينا خلى الناس تمشي أول ما جت عربية الاسعاف وشالته، بصيت حوليا بذهول وقمت، لقيت صاحب محل عرض عليا ادخل اغسل نفسي وهدومي عنده..

وخلص اليوم وروحت، كنت بتحاشى اني ابص للخاتم، ومع ذلك مكنتش قادر اقلعه، عارف شعور السيطرة، الهيمنة، اهو ده شعوري تجاه الخاتم، كأني عيل صغير ماشي مع والده واللي بيتقال بيتنفذ بالحرف..

روحت وحاولت انام، انام عشان انسى الموقف العجيب اللي حصل ده، حطيت الخاتم على الكرسي جمب السرير ونمت..

اتغطيت كويس عشان الجو كان برد، برد جدا، وبالفعل نمت، شوية وبدأت اعرق، اعرق جامد، الجو بقا سخن، سخن اوووي، سخن في شتاء يناير البارد..

شيلت البطانية وشهقت، شهقت من المفاجأة، الخاتم كان منور، منور اووي، بصيتله بخوف وانا مش مستوعب المفاجأة دي، قربت منه لقيته عامل زي الفرن، بيطلع حرارة رهيبة، النقوش بتاعته كانت بتتألق بألوان غريبة..

مسكت قماشة وزقيت بيها الخاتم ناحية درج المكتب وقفلت عليه، واختفى الضوء نوعا ما، خرجت من الاوضة وفضلت صاحي للصبح، لحد ميعاد الشغل، دخلت اشوف الخاتم بخوف لقيته عادي خالص، ومعرفش ليه لبسته..

روحت الشغل وانا مخنوق، وده بسبب مشاكل كتير بيني وبين مشرفي اللي تقريبا ضربته في اخر مشكلة بينا، دخلت المكتب ولقيته في وشي

- جاي متأخر ليه

- اذا كان عاجبك

- انت مش محترم

وهجم عليا، وده طبعا لأني هينته امبارح اهانة السنين، كنت مرهق مش قادر حتى اقف، بس مسافة ما لمسني لقيت جسمي كله ولع، نار مسكت فيه، قوة جبارة خلتني امسكه من كتفه واضربه برجلي في بطنه عشان يترمي حوالي مترين لورا..

وقع وهو بيتالم وتقريبا مقدرش يقوم لخمس دقايق كاملين،. اتحولت للتحقيق، دخلت مكتب المدير وانا عنيا بتطق شرار، هو شافني من هنا ولك أن تتخيل، لقيته بيقول:

- انا عارف انه غلطان وانك كنت بدافع عن نفسك، واحنا فصلناه من الشغل وهنعينك مشرف مكانه..

ايه الجنان ده .؟؟؟

المفروض في احسن الأحيان يتخصملي شهر مثلا، اتطرد، اتحول للشرطة، المهم اني تقريبا بقيت مشرف في يوم وليلة، مع اني بقالي سنتين بحاول اترقى ومش عارف من الحيوان اللي ضربته..

وانا مروح لقيت المدير وقفلي بعربيته وحلف يوصلني للبيت، واستمر الأمر في غرابته، كل يوم الاقي حد من الادارة يوصلني بعربيته، الكل بيوقرني ويحترمني..

مرتبي زاد الضعف، طاقة غريبة بتجري في جسمي كل شوية، لحد ما في يوم قررت انزل من غير الخاتم، وكان يوم صعب جدا، مشاكل في الشغل واتعرضت لحادث غريب، وكنت حاسس بوهن غريب..

وبدأت اربط بين اللي بيحصلي وبين الخاتم، الخاتم اللي كان بينور كل ليلة ويطلع لهب، لحد ما في يوم صحيت على حركة في الاوضة..

بصيت لقيت كائن مخيف واقف عند باب الاوضة، طويل جدا واسود ودراعاته طويلة ورفيعة جدا، شعره كان نازل على وشه الاسود، المرعب..

جسمي كله اتخشب وفضلت باصصله بفزع حقيقي، كان واقف صامت تماما عند باب الاوضة، حاولت انطق مرة واتنين وتلاتة، لحد ما في النهاية نطقت وقولتله:

- انت مين

وفورا لقيته بيرد بصوت جهوري، صوت ضخم قوي:

- انا مورانزيل خادم الخاتم وخادمك يا سيدي

فضلت انهج وانا مش عارف اتكلم، في النهاية قولتله:

- امشي من هنا

كل اللي عمله انه اختفى، اختفى في لمح البصر، فضلت كتير مش مستوعب ده حقيقة ولا خيال، في النهاية معرفتش انام، سبت الخاتم..

وبدأت المشاكل تكبر، المشرف قدم فيا شكوى في مكتب العمل واتحولت للتحقيق من تاني، ملقتش مواصلات واتبهدلت عشان اروح واجي..

وللأسف رجعت البس الخاتم، بس بقيت اشوف الكائن ده كل ليلة، شكله كان بيدمر كل ملامح الحياة جوايا، حضوره لوحده بيخلي جسمك كله يتشنج، انفاسك تضيق، وقلبك يضطرب، رعب، خوف، رهبة، فزع..

في النهاية قررت، روحت المكان اللي كان فيه الراجل اللي مات، وسألت كتير اووي، سألت كل المحلات تقريبا لو حد يعرفه، بس مكنش فيه اي حد يعرفه..

وقعدت على قهوة قريبة مهموم جدا، وبدون مقدمات لقيت راجل عجوز جه قعد قصادي وفضل يبص للخاتم، بصيتله بغضب وقولتله:

- اؤمر

بصلي وسكت خالص، وقتها غضبت اكتر:

- يا تنطق يا تمشي من هنا

- ليش دخلت نفسك بها الأمور

- أمور ايه مش فاهم

- ها الخاتم يا ولدي، خاتم مطلسم بطلاسم مظلمة، جهنمية، ليش تلبسه

وقتها حسيت انها النجدة، حكيتله كل حاجة، وسمعني، سمع كل كلمة وفي النهاية قال:

- المورجات

- نعم!!!!

- المورجات يا ولدي تعويذة رهيبة، خليط بين تسخير الخدام وصهر المعادن، قليل اللي بيجدر يعمل ها الأمر، وما سمعت عن حد عملها هون الا البصيري

- مين البصيري ده ؟؟

- البصيري يا ولدي هو ساحر بغيض، عمل التعويذة وصهر الخاتم، ومن يومها وهو متجبر بالأرض ما كان يقدر عليه انس ولا جن

- وضحلي اكتر

- يا ولدي لبسك للخاتم هذا بيعرضك لشىء شبيه بالمس من الشيطان، بس هاد مس خادمي، وفي الحالة دي بيتملك الشيطان كل شيء بحياتك، وأول ما يتمكن بيخليك عبد له، لانك وقتها هتكون بدون الخاتم ميت ع قيد الحياة

- طيب طالما الخاتم قوي كدا ليه البصيري ده مات بالطريقة البشعة دي

- البصيري يا ولدي اتحدى ملك الملوك، جالها نصا "حتى الله لن يقدر عليا" واهو مات بأبسط طريقة، وفي نفس اليوم

- ممكن اعرف انت مين

- انا يا ولدي اللي بحارب خدام الخاتم علي مر العصور

- انت جاي تهزر

ابتسم الراجل وقال:

- ارمي الخاتم بالبحر والا هتخسر دنيتك ودينك واخرتك

وقام فورا ومشي، وبدون مقدمات خرجت ادور عليه تاني بس كان اختفى تماما، وقتها حصل صراع رهيب جوايا، جزء عايز القوة والهيمنة، وجزء خايف من ربنا..

في النهاية رميت الخاتم في النيل، بس العجيب اني لقيت الراجل العجوز على َوش المية وكان مبتسم، وفي لحظة نزل تحت المية واختفى..