قصة لعنة الجمجمة السوداء للكاتب محمد إبراهيم عبد العظيم

 قصة لعنة الجمجمة السوداء للكاتب محمد إبراهيم عبد العظيم

انا بركات الغامرى ظابط شرطة .. من فترة قريبة جالنا متهم بجريمة قتل بشعة .. شاب ف مُقتبل العُمر قتل أبوه وإمه  وإخواته الإتنين .. وياريته إكتفى بكدا .. لأ .. دا قتل كمان إتنين من صحابهُ !.

الجريمة كانت مسمعه جداً وقلبت الرأي العام .. وإتحكم عليه بالإعدام والحُكم إتنفذ بالفعل .

في الفترة إللي كُنت بحقق معاه .. ماكنش بينطق حرف .. الغريب إن هو إللي جيه وإعترف على نفسه ولما القوة راحت العنوان إللي قال عليه .. فعلاً لقينا الجُثث مدبوحين كُلُهم بنفس الطريقة !

 كان باين عليه إنه بيتظاهر بالجنون .. والسبب إللي طلعت بيه من  إنه ييجي يعترف على نفسه إنه مش هايقدر يهرب بعملته كتير فا قال يسلم نفسه .

لكن كُنت غلطان .. أيوة كُنت غلطان وغلطتي الكبيرة .. إني ماحاولتش أصدق كلامه إللي قالهولي قبل ما يتعدم بدقايق .

أنا دلوقتي بيني وبين الموت دقايق .. وف الدقايق دي هاعمل زاي ما مروان ما عمل معايا .. هاحكيلكوا إللي حصل لمروان وليا بالتفصيل .. قبل ما أحكي الكارثة إللي عملتها .. عايزكوا تدعولي .. إدعولي ربنا يرحمني و يغفرلي ويسامحني على القرار إللي خدته .

كانت أخر جلسة بيني وبين مروان ف مكتبي  لما دار الحديث بينا كالأتي : 

قولتله  : 

_ طلبت تقابلني .. خير يا مروان ؟. 

كان باصص ف الأرض .. شوفت الدموع محبوسه جوة عينه .. ف الوقت دا إنفجر ف البُكى .. حاولت أهديه .. قومت من الكرسي وقعدت قدامه .. رفع عينه نحيتي وقالي والدموع مغرقاه : 

_ ماقتلتهمش يا باشا .. والله مانا إللي قتلتهم !. 

ماتكلمتش وسيبته يحكي إللي جواه .. وبدأ يحكي .

ياباشا أنا واد غلبان .. من شغلي لبيتي .. أنا حتى السُجارة مابشربهاش .. حياتي كانت هادية ومُستقرة .. لحد ما جيه اليوم المشئوم ..  خلصت شُغلي وكُنت راجع البيت كعادتي ..  قابلت صحابي رفعت و أسر قاعدين على أول ناصية شارعنا .

بعد ما سلمت عليهم لمحت فى عيون رفعت نظرة حزن .. على عكس شخصيته تمااماا ... رفعت من النوع اللى برغم صغر سنه الا ان دماغه كبيره وبرغم ظروفه الماديه والأسرية الا انه عاقل جدا وبيعرف يتعامل مع مشاكله كويس .

 عرفت من أسر إن عم رفعت اتوفى  وامه واخوه راحو البلد علشان ياخدو عزاه .. وعرفت إنه مارحش معاهم علشان شقتهم إتسرقت مرتين .. فا قرر هو يقعد علشان شقتهم ماتتسرقش تاني .

 طبعاً عزيته وحاوات أواسيه أنا وأسر .. وإقترح أسر عليا إننا نفضل جمبه النهاردة ونبات معاه علشان  مايكونش لواحده .. وافقت بدون تردد . 

طلعت البيت وغيرت هدومى وعرفت امى على اللى حصل لصاحبي وقولتلها انى هبات معاه لحد الصبح وافقت وبالفعل نزلت عديت على أسر وطلعنا ل رفعت..  فى اليوم دا بالليل كنا بنتكلم فى مواضيع مختلفه انا وأسر نحاول نخرج رفعت من اللى هو فيه خصووصا سكوته الدايم طول الوقت دا ..فجأة قرر رفعت يتكلم وقال :

_ موت عمى ماكنش بالنسبالى مفاجأة لا بالعكس انا كنت عارف ان دا هيحصل !!

بصيتله باستغراب لقيته باصصلى وكمل كلامه وقال : 

_ايوه بتكلم بجد ..  انا كل يوم اشوف عمى فى احلامى وانا بشيله وهو ميت وبوديه على قبره ...  الغريب والمرعب انى ببقي لواحدى ...  مابقدرش اشيله فابضطر اكشف عنه  واشيله بالكفن .... كنت بشيله وبمشى بيه لحد قبره ولما كنت بدخل المقابر بلاقى القبور كلهاا مقفوله ماببقاش عارف ادخله أي قبر بالظبط  بس عدد المقابر اللى كنت بشوفها كانو 14 وكل قبر فيهم على بابه تاريخ معين ... و اخر قبر فيهم واللى  كان مفتوح على عكس ال 13 قبر اللى كانو مقفولين ... كان تاريخه  11 / 6 / 2017   !

 كل يوم لمدة اسبوعين احلم بنفس التفاصيل .... ماكنتش بهتم انى اقول لحد فى البيت خصوصا ان ماحدش منهم بيسمعنى .... لحد ما جيه يوم 10/6/2017 .

 حلمت وقتها انى قدام اخر قبر كان مقفول بس المرادى فتح ودخلته جواه .. لما صحيت الصبح امى قالتلى على الموضوع  صدقونى انا ماستغربتش بس خوفت جداااا .

قولتله بتوتر : 

_ اهدى بس يا صحبي الاعمار بيد الله ماتحملش عل نفسك .

 قالى : 

_ يا مروان انت ماتعرفش حاجه ... انتو كنتو معايا فى كل حلم حلمت بيه ؟!.

ووقفت وبصتله وبسرعه قولتله : 

_انت بتقول ايه .. انت لسه قايل انك كنت لواحدك واااااااا 

قاطعنى وقال: 

_ يا مصطفى مش كدا انا كنت بشوف كل واحد فييكو واقف على باب قبر غير التانى !!!.

بدات اقلق بصراحة ..بس رجعت وقولت لنفسى دى احلام ومش معنى ان اللى قاله حصل يبقى كل مره هيحصل ..

بصيت لأسر لقيته بيضحك... رفعت غضب لما بص ولاقاه بيضحك ... واللى حصل انهم شدو مع بعض بالكلام وحصل فعلا اشتباك بينهم وحاولت على اد ما اقدر اهديهم .. لحد ما رفعت قال كلمه خلانى ف عالم تانى .

قال بغضب وبصوت عالى : 

_ يا إللي بتضحك عايز أقولك إن بكره هو التاريخ إللي شوفته على القبر إللي كنت واقف فيه !!! .. وإنت يا مروان.. خاف على نفسك انت كمان !.

مافهمتش قصده ايه بس اللى عملته انى سيبته ومشيت ... مش عارف ليه حاجه جوايا مصدقاه .. حاجه خلتنى اجرى على بيتى واقعد مع امى وابويا واخواتى .. شعور غامض والحقيقه مرعب .. سيبتهم هما الاتنين والغريب إن ماحدش فيهم منعني إني أمشي ولا حد نده عليا !.

لكن بعد ساعة لقيت رفعت بيتصل بيا  وقبل ما أقول أي حاجة لقيته بيقولي : 

_ علفكرا انا ماكنتش اقصد أخوفك .. هو إللي عصبني وضايقني ..  .. ومش مصدق اللى انا بقوله ... افهم يا مروان ..  انا شوفت فى حلم من احلامى الساعه بالظبط كانت 1 بالليل .. مش عارف كنت مركز ف الساعة ليه بس يمكن عشان في الوقت دا شوفت أسر بيتشنج وشبه بيطلع ف الروح وفجأة إختفى مابقاش موجود !.. أنا عارف إنه مجرد حلم .. بس إللي حصل لعمي مخليني قلقان .

لقيتنى تلقائي ببص ف الساعة إللي متعلقه على الحيطة ف الصالة وقولتله : 

_ ما لو على كلامك يا رفعت .. فا   الساعة دلوقتى واحدة وخمسة .. وهو فين أسر دلوقتي . 

ماردش عليا ! ..

حاولت أكلمه ماردش .. بس سمعت صوت هبده وصوته من بعيد بيصرخ وبيقول : 

_ يا نهاااااار إسوووووود ! ! .

نزلت من البيت بسرعة وكانت المُفاجأة .. أسر مش موجود ف الشقة !!.

 فضلنا ندور عليه اكتر من ساعه لكن فعلا مالهوش اى اثر ...  بدا الزعر والخوف يدب ف قلبي انا ورفعت .. وخوفنا نروحله البيت علشان مانزعجش امه وابوه ونقلقهم خصوصا ان ردهم لينا هيكون متوقع بانه المفروض إنه معانا !!.

مابقتش عارف اتصرف ازاى حطيت ايدى على راسى وماسك قميص أسر إللي لقيناه مكان ماكان نايم وعلى القميص رغاوي بيضا وكانت الواضح إنها من أثر التشنجات .. معنى كدا إن كلام رفعت صح وإللي شافه حصل فعلا!!!.

 لاحظت ان رفعت مش موجود جمبي .. بس سمعت من الحمام صوت جاى منه وخلال ثوانى خرج رفعت من الحمام وماسك ف ايده جمجمة سودة منقوشه عليها كلام غريب .... طلاسم !!!!.

جالى وقالى :

_ دي السبب يا مروان .. الجمجمة دي لقيتها من اسبوعين مرميه قصاد شقتى متغلفه ف لفة هدايا .. كان عيد ميلادى يوميها .

 أول ما خدتها وإكتشفت إللي فيها ماقولتش لحد طبعاً .. ومن ساعتها وأنا بشوف الأحلام دي ! .

وزاي ما أنت شايف كدا .. في كلام محفور حوالين الجمجمة كلها .. لما ركزت ف الكلام دا وأنا قافل على نفسي .. حسيت بشعور غريب .. أنا شوفت عيون الجمجمة دي بتنور والحروف بدأت تترجم ف ثانية .. ومن غير وعي بدأت أقرا الكلام .. إنت مش مصدقني صح .

أنا ساكت وباصص على الجمجمة بخوف .. جوايا شعور بالفعل بيحركني إني أخدها وأمشي .. العيون المجوفه بالفعل فيها حاجة غريبة .. وكإني حاسس إن جواها عيون بتراقبني !. 

_ مروان  دلوقتى احنا مش لاقيين شريف ومش عارف ايه إلاي حصله وإيه إللي هيحصل  لما اهله يسالونا عليه .

قولتله : 

_ طيب بص انا هامشى دلوقتى علشان لما يسالونه نقولهم إننا قعدنا مع بعض ومشينا ما قعدناش كتير ومابتناش ولا حاجة .

وافقته بسرعه وقومت علشان امشى لقيته بيدينى الجمجمة وبيقولى: 

_ خليها معاكو.. أنا مابقتش مستحمل اللى بيحصل دا .... عايزك ترميها .. احرقها ..  اعمل فيها اللى انت عايزه .. بس المهم ابعدها عن حياتى .

كان الطبيعي إني أرفض .. لكن لأ .. خدتها بدون أي مقدمات !

قبل ما أمشي مسكني رفعت من إيدي وهو بيقولي : 

_ بس خلي بالك يا مروان ..  اوعى تركز فيها .. ماتغلطش غلطتي.

سيبته وانا ماسك الجمجمة وكإن معايا كنز كبير .. دخلت اوضتى وقفلت الباب واترميت تحت البطانيه .. مريم أختي كانت نايمه حاولت مازعجهاش .. فضلت اتقلب يمين وشمال ماكنتش عارف اناام .

بتسألني عن الجمجمة .. أنا خبيتها ف دولابي وسط هدومي .

و نمت .. بس ماعداش وقت كتير لما صحيت على صوت غريب .. صوت حد بينادي عليا !.

 قومت وانا باصص حواليا بذُعر وبحاول اركز فى مصدر الصوت .. أختي الصغيرة نايمة .. هايكون مين إللي بينادي عليا دلوقتي .. قومت من على السرير وقعدت على طرفه .. الصوت بدأ يتكرر .. حسيته مشتت فى كل مكان ..  روحت علشان اشوف أبويا أو أمي قولت يمكن حد منهم بينادي عليا .. لما نزلت رجلى من على السرير بكل قوه ايد مسكتنى من تحت السرير وشدتنى وقعت على وشى !!.