قصة دم الافاعي بقلم الكاتب محمد ابراهيم عبدالعظيم‎

 قصة دم الافاعي بقلم الكاتب محمد ابراهيم عبدالعظيم‎

 يلا حضري نفسك علشان هنروح اسكندرية بعد يومين .. وادي مفتاح الشقة اللي هنروحها .. كلمت محمد صاحبي اللي كان معايا في الشغل عنده شقة هناك.

فضلنا نهزر وكنت فرحانة جدا، حضرت الشنط وبالفعل يومين وكنا هناك، منطقة في اسكندرية مشهورة جدا سامحوني مش هقول اسم المدينة .

يا سلام على اسكندرية وجمالها، بلد غنية بالدفء والمشاعر اللي غضب عنك بتحس بيها لما رجلك تخطيها، الهوا وروح البحر اللي بتهفهف علينا كانوا مخلييني في عالم تاني .

وصلنا العمارة ولما طلعنا الشقة لقيناها متربة جدا ووقتها بصيت لعامر بغضب، فهم من نظرتي علشان كدا قالي وهو بيضحك :

_ أيوة عايزة ايه يعني .. شقة ومقفولة من سنين عايزاها تبقى عامله ازاي؟ .. بقولك مسافر ومحدش من اهله بقى بييجي وكويس اني لقيت شقة في الجو ده .. دا انتي مجنونة حد ييجي اسكندرية في شهر ١٠ يا مفترية .

رديت عليه وقولتله :

_ طبعاً انت مستني مني اني انضف الشقة اللي هنقعد فيها كام يوم .. يعني اليومين اللي عايزة اريح فيهم دماغي برضو الاقي تنضيف وزفت .

وقتها قرب عليا وباس ايدي وقالي :

_ ودي برضو حاجة تفوتني .. حطي بس الشنط وهننزل نتغدا ولما نيجي هنلاقي الدنيا تمام .. كلمت بنت بواب العمارة وهي هتتصرف.

دخلت أوضة من ال٣ أوض بتوع الشقة، وفتحت النور، كان فيها ريحة غريبة، الريحة اللي في الاوضة دي غير ريحة الشقة كلها رغم انها مفتوحة مكنتش مقفولة .

عامر دخل الحمام وانا حطيت الشنطة على سرير مترب زيه زي كل حاجة في الشقة، وقفت قدام مرايا التسريحة، مسكت منديل ومسحت الجزء العلوي من المرايا، انعكاس وشي ظهر بس مش بوضوح، كُنت عايزه بس احط ميك اب .

في اللحظة دي سمعت صوت حركة مفاجأة جاي من جوة الحمام، ملحقتش انادي على عامر لاني لقيته بيخرج من الحمام وهو عرقان وكان حاطط ايده ورا ضهره، ضحكلي وهو بيقولي :

_ يلا يا منال .. لسه ملبستيش .

صوته كان شوية مهزوز، مشي من قدامي وسمعت صوت باب الشقة بيتفتح، دقايق وطلعتله، بس لما خرجت برة الشقة ملقتوش، لسه هنادي عليه لقيته نازل من فوق .

الشقة في الدور الأخير واللي فوق كان السطوح، مسألتوش هو طلع ليه أو بمعنى أصح هو مدانيش فرصة ومسك ايدي ونزلنا .

لقينا البواب طالع وأعترض طريقنا للنزول، حط ايده الإتنين على جوانب السلم وفضل واقف قدامنا، وبدأ يبصلنا بنظرات ثابتة، بالأخص بص عليا انا، كان لابس جلابيا سودة وأصلع وملامحه جامدة، متقدرش تعرف ان كان زعلان .. فرحان .. متضايق .

مجرد نظرة جامدة وبس، لحد ما هو قرر يطلع ويفسح الطريق علشان ننزل، أفعاله الغريبة دي خلانا ننزل في سكوت وعامر متكلمش غير لما خرجنا برة العمارة وركبنا تاكسي وبدأ يتحرك .

في الطريق لقيته بيقولي:

_ ها .. ايه رأيك بقى في المجنون ده .. شوفتي عمل ايه .

هزيت كتفي وانا بقوله :

_ عادي يعني .. ليه مهتم بيه كدا .. ما انت قولتها .. هو أسبوع وخلاص .. وبعدين هو عليه ايه غير انه هينضف الشقة وهياخد اللي فيه النصيب وبس .

= يا منال ما انا لما قولت لبنته تنضف الشقة وطلعت من جيبي فلوس .. علشان اديهاله .. قولت ميصحش ادي فلوس للبنت وابوها موجود .. لما روحت له بصت على الفلوس كدا لدقيقة وبعدها ضحك وسابني ومشي !! .

_عايز تقول انه رفض ياخد منك فلوس ؟ .

= ده اللي حصل .

وفجأة وبدون أي أستئذان أقتحم السواق كلامنا وقال :

_ العمارة دي لبش علفكرا .. أه إسمعوا مني .. أنا شوفت بعيني .

كلامه أثار فضولي وفضول عامر، علشان كدا عامر سأله وقاله :

_ فهمني أكتر يا اسطا اااا .

= عبسميع .. محسوبك عبسميع .

جوزي قاله :

_ تمام .. ممكن تفهمني أكتر يا عبد السميع لو سمحت ؟ .

بيتكلم بصوت عالي ومزعج، كان باصص قدامه وماسك الدركسيون بإيد والإيد التانية ماسك بيها سيجارة، رمى السيجارة في الشارع وقال لعامر :

_ ولامؤاخذة يعني يا باشمهندس .. لما سمعت المُدام بتقول اسبوع وبتاع قولت يبقوا جايين نُزهة .. ( تتفسحوم) يعني .. كنت بحسبكم سكان في العمارة وكدا .. عارفين .. حصل جريمة قتل في العمارة دي هزت اسكندرية ( تِمَن) .. واحدة قتلت بنتها وأنتحرت .. يا عيني كانت لاسعة خالص .

أتصدمت وصدرت مني شهقة حطيت ايدي على بوئي وهو شاف رد فعلي من المرايا ضحك ورجع يقول :

_ أومال لو كنتي شوفتي جثتها بقى يا مُدام .. ولا جثة البت الصغيرة .. خلاص يا أساتذة يوم القيامة بيقرب.

الكلام خدنا لحد ما وصلنا لعنوان المطعم، حالة من الصمت والضيق والقشعريرة سيطرت عليا انا وعامر، لدرجة اننا بعد ما كلنا فضلنا قاعدين مربعين ايدينا وساكتين.

قطعت صوت الصمت وقولت :

_ لو كلام السواق صح يا عامر انا من رأيي نمشي من العمارة دي .. اه ايش عرفنا يكون الشقة اللي مقفولة من سنين واللي احنا هنقعد فيها تكون هي نفس الشقة اللي الست دي قتلت بنتها وانتحرت فيها .. مجرد الفكرة بس فظيعة ومرعبة .

رد عليا عامر وقالي :

_ ويمكن تكون شقة تانية .. وبعدين ما يمكن السواق بيقول أي كلام او قصده عمارة تانية .. بصي بقى انا مصدقت اخد اجازة من الشغل .. مش هنقضيها من هنا لهنا .. خلينا في الشقة دي على الاقل يومين ونشوف الدنيا .

رجعنا العمارة وخلاص هيأت لنفسي اني داخلة على الجحيم بعينه، لقينا البواب قاعد قدام العمارة وجنب منه بنت في أواخر العشرينات من عمرها، وكان في ولدين صغيرين بيلعبوا قدامهم، بدأوا يبصوا علينا نفس البصة الجامدة، طلعنا علطول وتجاهلناهم.

لما وصلنا لباب الشقة ولسه عامر هيحط المفتاح في الباب بدأنا نسمع صوت ست بتعيط جاي من فوق السطوح :

_ منك لله .. أنا مش مسامحاكي .. أنا بكرهك .. الحقني يا حبيب .. أنتي شيطانة .. حرام عليكي انا قد أمك .. يااا حبيب انت فين رد عليا شوف مراتك بتقولي يا مشلولة !!.

بصلي عامر وقالي :

_ شششش يلا ندخل ملناش دعوة بحد .. لما طلعت فوق السطح النهاردة لقيت أوضة في أخر السطح .. أكيد في سُكان .. مش عايزين مشاكل .

دخلت الشقة وانا قلبي مقبوض، فتح عامر النور وكانت المفاجأة، الشقة نضيفة جدا ومترتبة، بالظبط كأننا دخلنا شقة تانية غير اللي شوفناها من كام ساعة .

كل الأوض مترتبة ونضيفة حتى الحمام والمطبخ والصالة، إلا أوضة واحدة بس، الأوضة اللي دخلتها أنا ووقفت قدام مراية التسريحة، الأوضة كانت مفتوحة، قولت لعامر :

_ أشمعنى الاوضة دي اللي منضفهاش .. ده واضح انه مقربش نحيتها اصلا.

قالي :

_ كتر خيرهم .. ده مافيش أحسن من كدا.

دخلت الأوضة وفتحت النور، لان كان في شنطة جوة وكنت عايزه اجيبها، الشيء اللي لفت نظري ان الاوضة فعلاً محدش قرب منها، بس كنت غلطانة لاني لما بصيت على المرايا لقيتها كلها متربة !! .

طب ازاي ده حصل وانا بإيدي نضفت جزئها العلوي بالمنديل، المنديل اللي لقيته واقع مكان ما انا سيباه !! .

لفت نظري على جانب المرايا وجود خط طويل مموج، خط مش مستقيم كان فيه تعاريج، وفي أخره مافيش أثر تاني، كان شيء طبيعي أتتبع الخط الغريب ده لحد بعد المرايا وفضلت باصة على الحيطة وصُعقت لما لقيت تعبان طويل لافف نفسه حوالين حتة حديدة نازلة من السقف!! .

ندهت على عامر وانا خايفة :

_ الحق يا عامر .. تعبان .

لما جيه وبص عليه، لقيته بيقولي وهو باصص عليه :

_ ده صغير يا حبيبتي متخافيش .. ده ميت .

= طب وده .. ده برضو ميت ؟ .

قولتله كدا لما بصيت على الارض عند الدولاب ولقيت تعبان أصغر من اللي متعلق بيتحرك حركات بطيئة وبيقرب لتحت الدولاب.

مسكني من ايدي وخرج بيا لبرة وجاب الشنطة في ايده التانية، قعدت على الكرسي وقلبي عمال يدق.

الغريب ان الاوضة بابها مخلوع وده مخليني واثقة ان التعابين بتطلع منها.

كان يوم شاق وكان طبيعي اننا نروح في النوم، غمضت عيني ونمت، بعد دقايق حسيت ان في حاجة بتمشي على ايدي، وعلى رجلي، وعلى وشي، وشعري، اتخضيت وفتحت عيني .. شوفت شخص واقف عند اول الاوضة اللي من غير باب وكان لابس بالطو طويل، شخص طبيعي، كل اللي عمله انه باصص عليا وبيضحك ضحكة خبيثة .

مجرد راجل واقف بثبات وخلاص، ده اللي شوفته لما فتحت، مخوفتش زي ما خوفت لما لقيت اكتر من ٢٠ تعبان حرفياً على جسمي كله بيتحركوا حركات هستيريا !! .

تعابين صغيرة وسودة، صرخت وصحيت من النوم مفزوعة.

عامر صحي مخضوض من صرختي، بصيتله ومسكت ايده بقوة من الخوف وانا حاسة بحركتهم :

_ تعابين يا عامر .. تعابين كتير.

من خوفي لما شوفت التعابين نسيت الراجل اللي شوفته، قام عامر علشان يجيبلي ماية، دخل المطبخ وانا حاطة ايدي على دماغي، سمعت صوت طرقعة في المطبخ، بس مهتمتش، فجأة قولت بصوت عالي وانا على السرير ( الراجل .. كان فية راجل واقف عند الاوضة!!.

قولت كدا تزامناً وانا برفع راسي لفوق، علشان أشوف نفس الراجل واقف قدامي بيضحك !!! .

في الوقت ده عامر جية وعدى من قدامه، اللي كان لسه واقف وانا بصالة بذهول ورعب ومش قادرة اتكلم، و عامر مشافهوش .

_ أتفضلي يا حبيبتي إشربي شوية ماية وأهدي مش عايزك تخافي طول ما انا جنبك .

عايزة أقوله بص هناك، بس اقوله ايه وهو عدى من قدامه، مسكت منه الكوباية وانا باصة على الراجل في صمت، رفعت الكوباية قدام وشي وشربت ولما نزلت الكوباية ملقتوش .

بلعت ريقي بالعافية، بس شوفت بوضوح مكان ما هو كان واقف من ثواني تعبان طويل ورفيع بيتحرك برضو بنفس بُطء التعبان الصغير اللي كان في الاوضة التانية !! .

عامر بص على الارض ولما شافه راح عليه وضربه على دماغه.

جاب منديل وشاله وحطه جوة كيس، ودخل المطبخ وجاب تعبان تاني شبهه وطلع بيهم فوق السطح !!.

لما رجع لقاني واقفة على باب الشقة قولتله وهو نازل على السلم بصوت واطي :

_ انت بترميهم فين، عايز حد من اللي فوق يشوفك وتبقى مشكلة .

قالي بعد ما دخلت انا وهو وقفل الباب ورانا :

_ ما انا ماقولتلكيش، بنت البواب الكبيرة قالتلي ان العمارة فيها تعابين صغيرة بتظهر من تحت البلاط وخصوصاً الشقة اللي قدامنا دي لانها اصلا مهجورة من سنين، وقالتلي لو لقيت تعابين موتهم وارميهم فوق السطح، مرضتش اقولك علشان متخافيش، واهو زي ما انتي شايفه التعابين صغيرة مش بيأذوا .

كانت اول خناقة تحصل بينا بعد الجواز، فضلت اقنعه نسيب الشقة بس بسبب ان عامر للاسف بخيل مرضاش بحجة اننا في الشقة دي مش هندفع مليم .

ودي مشكلته الوحيدة والكبيرة .

وفضل يقنعني ان لو روحنا اوتيل او اجرنا شقة اليوم هيتكلف كتير، ويمكن ده سبب كل خلافنا، بخل عامر، بخله اللي خلانا نعيش ليلتين من الرعب والفزع وفي الحقيقة من الحزن والإكتئاب .

لاننا فضلنا في الشقة، حتى بعد ما حكيتله اللي شوفته، كان طبيعي يكدبني لان مافيش اي حد في الشقة غيرنا .

تاني يوم لقيت عامر بيصحيني وهو مبتسم وبيحاول يصالحني، لما فوقت قالي :

_ ليكي عندي هدية مخصوص اصالحك بيها .. بس مش لاقي محفظتي ماشوفتيهاش امبارح ؟ .

قام من على السرير وفضل يدور عليها، قومت غسلت وشي، جيت علشان أنشف وشي لقيت تعبان صغير ماشي على الفوطة، لما شوفته رميتها على الارض وانا بنادي على عامر .

مردش عليا، لما بصيت برة لقيته لسه بيدور على المحفظة، قالي وهو مش على بعضه :

_ يعني ايه .. دي المحفظة مش موجودة .. انا هنزل اشوف البواب كدا يمكن يكون لقاها هنا ولا هنا .. دي تبقى مصيبة لو ملقهاش دي فيها الفلوس كلها .

نزل وساب الباب مفتوح، قعدت على الكرسي بزهق، في اللحظة دي سمعت صوت واحدة ست بتنادي عليا، طلعت برة الشقة وبصيت على يميني وفي اخر درجة السلم عند السطوح، واحدة ست قعيدة بصالي بإبتسامة وشها بشوش وجسمها مليان، كان الواضح انها بتعاني من السمنة المفرطة، بس باين عليها الطيبة، قالتلي لما شافتني :

_ يا صباح الجمال .. انا ستك بديعة .. سامحيني يا بنتي انا سمعتك دلوقتي بتزعقي .. شكلك شوفتي التعابين مش كدا ؟ .

اتحرجت بصراحة لاني مش متعودة صوتي يعلى لدرجة تخلي الجيران يسمعوه، قولتلها :

_ بصراحة اه يا حاجة .. كل شبر من الشقة بلاقي فيه تعبان .. واحنا جايين نقعد اسبوع و ماشيين بس الواضح كدا اننا مش هنكمل .

قالتلي وهي بتلف نفسها بالكرسي :

_ لا ده الموضوع كبير بقى .. عموماً انا ساكنة فوق وقاعدة لواحدي معظم الوقت .. لو حابة تتكلمي في اي وقت انا موجودة .

مشيت ودخلت لجوة، في الوقت اللي لقيت عمار طالع من تحت السلم وشه احمر وعمال يئفئف ويضرب كف على كف، عرفت من ردود افعاله انه ملقاش المحفظة ودي في حد ذاتها كارثة تانية .

طلع موبايله ودقيقة صمت اتكلم وقال :

_ سعيد ازيك يا حبيبي طمني عليك ..

لا والله يا صحبي مش تمام ..

محفظتي وقعت ومعايا مراتي وموقف مش ظريف خالص ..

لو ينفع اعدي عليك اخد منك قرشين كدا ارجع بيهم القاهرة وهردهملك علطول ..

حبيبي ماتحرمش منك .. نفس العنوان مش كدا .. تمام.

كان الواضح من كلامه انه هينزل يروح لصاحبه، بس مكنتش عايزه اقعد لواحدي في الشقة، علشان كدا قولتله :

_ انا جاية معاك .. ما انت اكيد مش هتسيبني اقعد لواحدي لما تيجي.

اتعصب عليا وسابني ومشي، قررت هقفل الشقة واطلع اقعد فوق مع الست بديعة، لما طلعت السطح شميت نفس الريحة بتاعت الاوضة اللي في الشقة، بصيت على يميني لما طلعت السطوح لقيت برميل كبير قديم ومكسور والريحة طالعة منه، لما قربت وانا حاطة ايدي على بوئي، بصيت جواه لقيته حرفيا مملي على اخره تعابين سودة صغيرة وكلهم.......كلهم ميتين !!!.