حكاية الممسوسة للكاتب محمد أحمد عباس

 حكاية الممسوسة للكاتب محمد أحمد عباس

طول عمرنا بنسمع ونقرأ عن الجن والشياطين وبنسمع عن معالجين بالقران وروحانين وقساوسه ورهبان بيعالجوا لكن المره دي مش بس هتسمع وتقرأ بس لا المره دي هندخل مع بعض العالم ده مش بس كده انتوا مش بعيد تشوفوا كمان لان المره دي البطل مش حد غريب عني وعنك لا البطل هو انت.

بقولك صحيح كان في واحدة ست زمان ف الحي اللي كنت ساكن فيه ، وهي صغيرة ف الشارع كان عندها طابع خشن شوية كانت بتتخانق كتير وتعمل مشاكل مع ناس كتير ف الشارع ..

أياميها زمان كان عيب أن بنت تلعب مع شباب وكان عيب أن البنت تكون عدت 14 او 15 سنة وايه متجوزتش ازاي البنت بارت والموضوع يبقي كبير ومشاكل

وأبوها كان راجل فكره زي الفكر القديم فقام مجوزها، البنت اتجوزت واستقرت مع جوزها وجوزها كان عنده شقة في عمارة زي الفل وراحوا وقعدوا وعاشوا وربنا رزقها وكرمها بولد بعد فترة مش كبيرة

علشان هي كانت متجوزة صغيرة ف كانت بتحب تجرب كل حاجة بتعملها البنات ف كانت بتهتم بنفسها زيادة شوية او مش شوية هما شويتين تلاتة صراحة

المهم بعد فترة كده ظهر عليها أعراض غريبة متفهمش ده مرض ايه ولا ايه ده كان بيحصلها تشنجات ف جسمها كله مرة واحدة مبقتش تعرف تسيطر علي جسمها أصلا مبقتش عارفة تحرك أطراف جسمها ، الموضوع بقي فيه حاجة غلط أو حجات غلط، طبعا جوزها لما خد باله أن الموضوع بقي بزيادة وبيتكرر كتير ابتدي يكلم أمها ، أمها زي أي أم من الطبيعي قلقلت عليها وخدوها وودوها لدكاترة ولفوا عليهم عشان تتعالج او يحاولوا يعرفوا عندها ايه، بس بعد اللف ده كله مفيش نتيجة لا علاج ولا تشخيص ومش بس كده حالتها عمالة تسوأ يوم بعد يوم وتبقي اسوأ واخطر، المشكلة أن الموضوع تطور أكتر بقت بتقول أنها بتشوف هالات سودا لوشوش غريبة بتبص عليها وبتبحلق فيها جامد وبقت تسمع أصوات صريخ مرعبة جدا جوا راسها محدش سامعها غيرها وحد دايما بيقولها .... هحرقك في جهنم الكلمتين دول ممكن تكون شايفهم سهلين دلوقتي بس يمكن لو جربت حد يقلهالك أنت بس وتسمعها ف ودانك لوحدك لا هي صعبة جدا ، فالطبيعي أن جوزها وامها بدأو يخشو فالمرحلة اللي بعدها بأنهم يتجهو لأطباء نفسيين يجربوا يسالوا هي فيها ايه تتعالج ازاي ايه اللي ييحصل ، لما بدأت تروح للدكاترة ابتدت تقولهم هي البنت نفسها اللي بتقول أنها ملبوسة وعندها حالة تلبس وأن جواها شيطان وشياطين كمان مش واحد وأن الارواح الشريرة عايزة تقتلها وكمان الأصوات اللي ف ودانها بتقولها علي حجات تضر بيها نفسها وتأذي بيها نفسها وغيرها

طبعا الدكاترة النفسيين بدأو يستغبوها ويقولوا لأهلها أن ديه مجرد هلاوس، انتي مهلوسة كلهم بدأوا يقولوا كده بس....

بدأت حالتها تسوأ اكتر وأملها في الشفاء خاب ولازمها اليأس من العلاج النفسي بالرغم من أنها كانت بدأت تكسر حاجز الخوف وتتكلم وتحكي مع الدكاترة بس كل ده بلا جدوي ..

ومع مرور الأيام حالتها بتسوأ أكثر وأكتر لدرجة أنها اخر ما يأست وملت من اللي عايشة فيه من كوابيس وأصوات وهالات، بدات تطلب من امها وجوزها وتصر أوي أنها عايزة تعمل جلسات طرد أرواح ورقية شرعية وتجرب أي حاجة في سبيل أنها تهرب من كل اللي هي فيه وترجع طبيعية..

وطبعا جوزها ووالدتها مش عارفين يعملوا ايه الموضوع صعب ومقدامهمش غير أنهم يتعلقو بأي قشاية معلش هيعملوا ايه هما راحوا لدكاترة ودكاترة نفسيين وبرضه مفيش فايدة هيخسروا ايه يعني ولا حاجة وفعلا جوزها وافق وقالها ماشي مفيش أي مشاكل يمكن هو ده الحل احنا نجرب

وأنا عارف شيخ كويس ف الحجات ديه وحضرت مرة مع واحد صاحبي مسيحي كانت مراته تعبانة وكان عليها حالة تلبس وأما راحت الجامع معاهم مراته بقت زي الفل

ف انا هكلم صاحبي وأجيب رقم الشيخ منه

وفعلا جوزها راح للشيخ وطلب منه انه يعمل جلسة لمراته عشان هي في حالة اشتباه انها ملبوسة

الشيخ رفض تماما وقاله ان الجامع ليها معايير خاصة في الحالات اللي زي كده وأن علشان الجامع تعترف بحالة زي ديه لازم يبقي فيه شروط

أولا الشخص لازم يظهر عليه أنه كاره الرموز الدينية

وثانيا أنه يكون بدأ يقول كلام مش مفهوم اتكلم بلغة غير مفهومة

وثالثا أنه يكون ظهر عليه حجات غريبة او قوة زيادة عن قوته الطبيعية

وطبعا هي مكنتش عندها التلاتة دول

وجوزها وامها فكروا وقالوا ليه منجربش وفعلا بدأو يحطو حواليها مصاحف ويشغلو قران علي طول بحيث يشوفوا ردة فعلها ايه

فالأول حالتها كانت زي ما هي مفيش فرق خالص طبعا حالتها سيئة بس أقصد مش مضايقة من الكلام اللي بتشوفوا ده

وفجاة حالتها بدات تسوأ فعلا بكتير بدات تشتم ابنها وجوزها وتكسر كل حاجة حواليها وتحدف المصاحف ع الأرض بقت مجنونة اللي يصلي قدامها تمسكه تضربه وتخنقه

وبدأت تمتنع عن الاكل وتمتنع عن الكلام مع اهلها وبدأت تنام علي الارض وتعمل حجات غريبة مفيش داعي لذكرها خالص

واللي زاد ف الموضوع أنها بدأت تصرخ لساعات بصوت عالي أوي ومخيف

وطبعا بعد كل اللي حصل ده راحوا الجامع بس الجامع كان محتاج سفر شوية كان في بلد تانية او محافظة تانية مكانه كان مرتفع شوية عن الارض زي ما تقول فوق تل مثلا

المهم لما وصلوا لقوا ناس كتير جدا مستنيين ما بين نساء ورجال وأطفال المفروض انهم جيين علشان جلسات زيها بالضبط

الجامع من جوا كان شكله عادي زي أي جامع مفيش داعي للوصف

المهم دخلوا قعدوا فعلا وكان فيه جلسة شغالة قدامهم والموضوع حقيقي بشكل مخيف وفعلا الشيخ نجح في الاخر واللي كان بيتعمله الجلسة رجع طبيعي فهما ابتدوا يفرحوا وحسوا بانتصار وأنهم فعلا في المكان الصح

المهم فضلوا قاعدين يبصوا ويركزوا علي حالات كتير لحد ما جيه دورهم وقاموا وطلعوا علي منصة كده هي مرتفعة عن الكراسي اللي كانو قاعدين عليها مثلا متر

المهم الست قعدت قدام الشيخ هو فضل باصصلها مبيتكلمش ولا يتحرك مركز معاها اوي هي بدات أنها تتعصب وتقوله متبصليش كده

وهو ف ساعتها سألها انتي مين

قالتله اسمها

وبعدها سألها اسمك ايه

اسمي (....)

اسمك ايه؟

اسمي (....)

اسمك ايه؟

اسمي (....)

كام سنة؟

(..)

ايوة يعني انتي كام سنة؟

(..)

قام مغير صيغة السؤال وقال:

لا انت كام سنة؟

برضه ردت نفس الرد

عايشة ازاي؟

قالتله عايشة وعندي كذا وعارفة أني ملبوسة وعارفة أني جوايا شياطين وأنا تعبت ومش عارفة اعمل ايه وزهقت من حياتي ديه خلاص

قام مغير الصيغة وقايل عايش ازاي

قامت ضحكة ضحكة بسيطة كده استهزاء بيه

عايش ازاي؟

يضحك برضه اكتر أو تضحك

عايش ازاي؟

يضحك برضه أو تضحك مش عارف مين بالضبط

فجاة كده قامت زعلت واضايقت وبصت فالارض

فقالها ليه زعلانة؟

فجأة لقو صوت تاني اللي بيتكلم صوت مبحوح كده هو قريب من صوتها بس مش هي

والصوت ضحك نفس الضحكة المستفزة وقايل علشان بيضايقني ويشغلي قران

-مين اللي بيشغلك قران؟

ضحكت تاني نفس الضحكة

-مين اللي بيأذيكي؟

تنحت بقي مرة واحدة وقامت قايلة احنا جايين علشان الاجتماع

-انتم؟

أيوة احنا جايين علشان الاجتماع

-مالك في ايه ؟ انتو مين ؟ وجايين هنا خير ولا شر؟

قامت فضلت متنحة شوية ومبتردش

-قولو انتم مين؟

مفيش رد وفضلت متنحة تمثال واقف

ومرة واحدة الشيخ قرب منها وقالها

-عندك شيطان؟

فضلت مبرقة جامد وتحس ان عينيها هتطلع لبرة

-يا اللي ف الجسم بقالك كام سنة ؟ بقالك كام سنة مستحوذ ع الجسم؟

قامت ردة عليه تاني بالصوت المبحوح وقالت:

من قبل متوعي ومن قبل متفهم ومن قبل ما تعرف

راح باصص لواحد وراه ممكن نقول مساعد ليه وقاله هات المياه يبني

-انا صليت مش عايزين تكلموني ليه

وهي برضه ساكتة ومبرقة ومش عايزة تنطق

أول ما المياه جت للشيخ عينيها بدأت تدمع وبدأ يصدر منها أصوات جوة بعض وكلام غريب عمر ما حد سمعه بيتقال منها

الشيخ انتهز الفرصة وقال مخرجتوش ليه؟

برضه قعدت تقول كلام غريب والموضوع بقي أزيد ومخيف، أكثر من صوت طالع مش صوت واحد اللي هو عمر ما بني ادم يقدر يعمل حاجة زي كده

قام قايل الشيخ:

أنا هصلي ثلاث مرات وهنفخ ثلاث مرات كل روح عنيفة تغادر الجسد ولا تعود بسم الله نأمر كل روح مضادة هاربة أو محاربة أو ساكنة أن تغادر هذا الجسد كل رؤية سحر كل عمل شيطاني تقطع رباطه

وقام راشش بايديه المياه ونفخ فيها

وفاللحظة ديه تحس أن فيلم اكشن بدأ والست ابتدت تصوت وجوزها ووالدتها طلعوا مسكوها وكتفوها وهي عمالة تصوت وتتشنج وبدأت تخوفهم وهما يرجعوا لورا بعد ماوقعت ع الأرض وبدأت تتشنج

وقام قايل نفس الكلام تاني بس زود جملة واحدة وهي (وأن تبطل كل المحرمات وقام راشش المياه ونافخ النفخة التانية)

بدات الست تتشل بقت غريبة وأصوات غريبة مع تشنج

قام الشيخ تالت مرة وقال :

هذا الجسد يتحرر باسم الله الواحد الأحد بقوة القرآن نأمر كل شيطان نأمر كل روح شيطانية بالمغادرة وقام راشش ونافخ تالت مرة زي ما قال

وفجاة هي بدات تبرق جامد وطلع منها صوت مبحوح بيقول:

أنا هموتها أنا هدمرها مش هخلي فيها نفس ولا جزء سليم

كل ده والشيخ باصصلها

والصوت يقوله متبصليش كده ملكش دعوة بيا

فالشيخ قام مقرب تحس ان الصوت بدأ يخاف

وبدأ يقوله أنا هحاربك مش هسيبها

وبدأ شبه حرب بينهم بس طريقة الكلام تتغير كل فترة يعني مثلا مرة مش هسبها ومرة تانية مش هنسبها أنا هحاربك احنا هنحاربك

وفجاة جسم الست اتنفض كده وجوزها وقع وامها وقعت

والست قامت قايمة وصلبت طولها صلبة غريبة وقالتله انا طاوووووووووس......

وقعت تاني أو تالت بس المرة ديه مغمي عليها بدأوا يحاولوا يفوقوا فيها ، الشيخ قعد يحاول معاها شوية لما فاقت تاني بس مفيش حاجة هديت خلاص

فقالهم خلاص اكتفينا النهاردة وقالهم الحالة ديه هتحتاج أكثر من جلسة روحوا وهبقي اقولكوا امتي الجلسة الجاية بعدين

بس الغريب بالنسبالي أنا كان في اسم طاووس لأن علي حسب معلوماتي أنا مفيش شيطان ولا مارد ولا جن اسمه طاووس

بس اللي أعرفه أن الطاووس اللي هو الطائر اللي كلنا عارفينه ليه قصة مع إبليس من أيام ما كان الطاووس مخلوق من مخلوقات الجنة قبل ما يطرد منها، اطرد منها ليه لانه ساعد ابليس فانه يوسوس لادم وحواء فيعتبر سبب من اسباب طردهم، وقبل ما يطرد كان طائر من الطيور الجميلة وكان عنده جناحين لو فرد جناح منهم يغطي مساحة كبيرة جدا متتخيلهاش بجناح واحد وكان اساس خلقه من الجواهر وكان حولين كل جوهرة ريش أبيض جميل كتير

وكان من أطيب طيور الجنة وكان اقواهم فالصوت واللحن ، وكان بيعظم الله بيه دايما وكان الوحيد اللي بيخرج من الجنة ويلف بين السبع سماوات ويسبح باسم ربنا فكل مكان

وكانت كل الملائكة تتعجب من صوته الجميل ف طبعا إبليس مسابوش وبدأ يفكر ازاي هيستغله عشان يعرف يدخل للجنة ويوسوس لادم وحواء

فلما شافه دار بينهما حوار وقاله:

أيها الطائر عجيب الخلق وحسن الصوت انت من أي طيور الجنة

الطاووس رد عليه بديهي وقاله أنا طاووس الجنة ، انت مين

إبليس قاله أنا من ملائكة الصفيح الاعلي اللي مبيوقفوش تسبيح للحظة وعينيهم مبتغفلش للحظة فممكن تدخلني الجنة وأنا هعلمك ثلاث كلمات لو قولتهم عمرك مهتعجز واللي يقولهم يفضل خالد مدي الحياة

الطاووس قاله ومين قالك أن أهل الجنة بيموتوا

طبعا بيموتوا إلا اللي معاه التلت كلمات دول

الطاووس قاله وأنا ايه اللي يخليني أحتاج التلت كلمات دول انا اخاف من رضوان خازن الجنة يستجبرني عنك ولا حاجة

أنا هبعتلك الحية وهي سيدة بوابات الجنة وفعلا حصل وابليس قابلها ودخل من طريقها للجنة وعرف يوسوس لادم وحواء

وبعد اللي حصل الطاووس خد جزاته وكان عقابه أنه انطرد من الجنة لأنه يعتبر ساعد ابليس وكمان كان ف العقاب أنه يسقط عنه كل الاحجار الكريمة اللي حواليه وان أجنحته تتقص وتاجه يتشال ونزل الارض واترمي علي أطراف البحور وفعلا لحد يومنا ده هتلاقيه دايما علي أطراف الجزر عالبحر وفعلا لو سمعت صوته هتحسه حزين اللحن اللي فيه حزين زي ما يكون ندمان

بس معتقدش أن الست ليها علاقة بالموضوع اكيد اللي في دماغي مش صح

المهم جوز الست وأمها بدأوا يعانو فترة مش قليلة من موضوع الجامع وده كان ظاهر جدا فإن الست بتقعد تضربهم وتضرب ابنها ومشاكل كتير فخدوا الولد وعيشوه عند امها علشان يبعد عنها وميتأذيش

والست كملت امتناع عن الاكل وبدأت تنعزل وتبعد عن الناس وتقعد ف ركن لوحدها وتكلم نفسها بلغة مش مفهومة كمان

حالتها ساءت أكثر وحصلها حاجات غريبة وبشعة كتير

لحد ما والدتها زهقت من أن مفيش اي اتصال جيه من الشيخ لحد ما قررت ان الجلسة التانية هتبقي علي يد شيخ تاني

وفعلا كلمت الحبايب والقرايب لحد ما عرفت توصل لشيخ وكلموه والراجل رحب جدا بالموضوع وقالهم انا هاجي لحد عندكوا

ووصل المكان ف المعاد اللي اتفقوا عليه وطلب أن يبقي معاهم محرم وكان جوزها موجود ودخل الاوضة

وبدأ يقرأ قران بس مش عليها لا كان بيقرأ ف أركان الأوضة الاول من غير ما يقرب من الست

بعد اقل من 3 دقايق الست بدأت بقها يتفتح ويوسع جامد وبدأت تبرق وتتشنج زيادة عن اللزوم وفجاة تروح هادية وتقعد تضحك وفجأة تتشنج وتتعصب وفضلوا ع الحال ده شوية

والشيخ هدي وراح قايل مين معايا؟

وهي يطلع منها الصوت المبحوح ويقول:

مش خايف

وفجاة يقعد يكلمها تفضل ساكتة

يبدأ يقرأ قران تاني

تبدأ تخاف وتبعد وتاخد ركن ف السرير وخايفة حد يقرب منها وخايفة من كل حاجة بالذات الشيخ

وفجأة بدأ في هدوء ف التعامل ومتعملش حاجة كأنها حد طبيعي

ولما كله يهدي يطلع منها الصوت تاني ويقول أنا مش خايف انتو كلكو حيوانات

ويبتدي الشيخ يعاند ويقول قران أكثر

وهي تعانده

لحد ما الشيخ طلب علبة كبريت وابتدي ياخد عود يولعه ويسالها اسئلة زي انتو مين انتو ليه هنا هتعملو ايه

وهي تبتدي تصوت بس

وخايفة من الكبريت يقوم يلسعها بعود كبريت ف راسها ورقبتها في أماكن معينة ويسال اسئلة

وفجاة جاب حتة قماش وقام حاططها علي رجلها ودايس عليها جامد وهي تصرخ بطريقة رهيبة بس بصوت مبحوح والرعب ده

ومرة واحدة قامت مطلعة صوت غريب وقالت كلمة محدش فهمها والشيخ راح هدي وقال بس كده هو هزع هزع بقي ده 

الشيخ بعد ما خلص وقال كده هو هزع تحس قالتله اه كده أنت عرفتني وقامت بصاله وقعدت تضحك ضحك هستيري مرعب بزيادة، وفجأة قفلت وشها وغمضت عينيها وبدأت تقول كلام غريب مش مفهوم تاني وفيه نبرة صوت كأنه تحدي

الشيخ خرج برة وقال لجوزها وأمها تعالوا معايا ، بدأ يتكلم ويقول: هزع هو كبير الشياطين السودا والجواثيم ، والجواثيم هي اللي بتسبب الأحلام المزعجة والمخيفة والكوابيس اللي بنشوفها بليل أو حتي بنشوفها لو غفلنا شوية ساعة العصر، وهزع من الشياطين الكبيرة العملاقة جدا وكمان عاش في عصر النبي سليمان ووقتها كان أكبر مارد متمرد قابلته البشرية ويقال عنه أنه من الشياطين اللي خرجت مع ابليس لما ربنا غضب عليه ، اتذكر ف روايات أهل البيت واتذكر كتير جدا كمان وهو من أكتر الشياطين اللي ممكن تلهيك عن الصلاة وأكتر شيطان يوصلك لكره نفسك وكره الحياة والدنيا عن طريق أنه بيخليك تسهر لفترات طويلة لدرجة أنك تتعب من أن يومك اتشقلب وبقيت بتسهر كتير ويجيلك ارق كل ده بسبب أفعاله هو..