قصة راس المملوك للكاتب محمد شعبان العارف

 قصة راس المملوك للكاتب محمد شعبان العارف

لو فاكر ان الموت هو اصعب مرحلة ممكن يمر بيها الإنسان، فاسمحلي اقولك لا، اللي أصعب من الموت هو الحياة وانت مُغيب، او بمعنى أصح، إنك تعيش وانت بين البينين.. لا منك عايش ولا منك ميت، والأحساس ده عامل بالظبط زي القرار.. ما هو اللي أصعب من إنك تاخد القرار او ترجع فيه؛ هي اللحظات اللي بتفكر فيها وتسأل نفسك.. ياترى أخد القرار ولا هتراجع عنه؟.. سؤال صعب انا عارف، خصوصًا لو في حاجة مصيرية، بس تعرف؛ الأصعب من ده كله هو الغريب اللي بتقابله في اللحظات دي.. الغريب اللي ممكن يخليك بكلمة واحدة، تتنقل من حياتك اللي بتعيشها، لجحيم جهنم.. ومن عند الغريب والليلة اللي ظهرلي فيها، والقرار اللي فكرت فيه.. بتبتدي حكايتي.

يومها كنت بجيب أكل ليا وللي شغالين معايا من مطعم فول وطعمية، الساعة وقتها كانت ١٢ ونص صباحًا، يعني وبالبلدي كده، اتناشر ونص بعد نص الليل.. بس مش مهم، الوقت مش مهم بالنسبة لي، انا كل اللي كان يهمني في الوقت ده هو اللي سرحت فيه.. وقتها قعدت على كرسي قصاد باب المحل، ووقت ما كنت مستني الساندوتشات تتعمل، بدأت اراجع شريط حياتي وافكر في همومي.. ايوه، حياتي وهمومي، ما الاتنين عمرهم ما افترقوا عن بعض، ما انا ببساطة راجل ارزُقي، بشتغل عامل باليومية، عندي ٢٧ سنة، ورغم سني ده، لسه لحد النهاردة ماتجوزتش بسبب فقري وقلة تعليمي، عايش لوحدي على اوضة في سطوح بيت عيلتنا اللي في منطقة شعبية في القاهرة.. طب انا بعمل ايه هنا في حي الحُسين؟!.. الحقيقة ان من فترة كده، جه المقاول اللي متعود اشتغل معاه وجمعني انا واربعة من اصحابي، وبعد ما جمعنا وقعدنا على القهوة، قالنا انه عايزنا في مصلحة، ولما سألناه ايه هي، سحب شفطة طويلة من كوباية شايه، وبعدها ابتدا يشرحلنا واحنا مركزين معاه..

-بالمُختصر كده يارجالة، انا جايبلكوا شغلانة لوز اللوز، شغل ميري، مع الحكومة، يعني قرشيناته مبشبشة، واللي ربنا هيكرمه فيه، يبقى خطف لقمة طرية.

لما قالنا كده، بصيتله وانا مش فاهم حاجة!

-ما توضح ياعم جمل.. شغل ايه ده اللي مع الحكومة وقرشيناته مبشبشة، هي فزورة دي ولا ايه، وبعدين من امتى والشغل الميري بقى لقمة طرية؟!

-لا ياخفيف.. مش فزورة، ما هي المصلحة مش هتجيلكوا من الحكومة طوالي كده، هم جابوني انا، لإني عدم المؤاخذة مقاول انفار، وبعد ما جابوني قالوا لي ياواد يامعلم جمل، هات لنا ناس تهد.. طب الناس اللي هتيجي دي، هتهد ايه؟!.. سؤال وجيه، ومن حقكوا عليا اني اجاوبه، وانا هجاوبه.. الناس او الرجالة اللي هيجوا يهدوا، او انتوا يعني لما توافقوا بإذن الله.. هتهدوا بيوت قديمة في منطقة الحسين عشان بتتجدد.. وعشان المنطقة تتجدد، فالحكومة بترمم البيوت اللي بينفع فيها ترميم، والبيوت اللي بايشة خالص وماينفعلهاش مرمة، بيجيبوا عمال يهدوها من الباطن عشان بعد كده يبنوا مكانها بيوت جديدة.. ها.. فهمتوا المقصد؟!

وقتها كان سامبو فاتح بوقه ومبرق، اما سعيد ورشدي ومغاوري، فدول كانوا مركزين وعينيهم بتلمع، زيهم زيي بالظبط، ايوه، ما احنا التلاتة اللي فهمنا اللي فيها، وبسبب فهمنا لكلام الريس جمل، رد عليه واحد مننا، او بالتحديد يعني كان مغاوري..

-فل ياريس، بس قولنا الأول، المصلحة من امتى لامتى، واليومية قرشيناتها كام؟!

-الشغل هيبقى من ١٠ بالليل لستة الصُبح، واليومية للعامل الواحد هتبقى ٩٠٠ جنيه.

لما قال المبلغ ده كلنا فرحنا، حتى سامبو اللي ماكنش فاهم حاجة، اول ما اتقال قدامه المبلغ، ابتسم، لكن اللي ماكنش مفهوم هو وقت الشغل، اشمعنى من ١٠ بالليل لستة الصبح، وبسبب غرابة الوقت، اتعدلت في قعدتي وسألت المعلم جمل عن السبب، وبعد ما سألته، جاوبني وقالي..

-عادي ياسيدي، الحكومة مش عايزة تضايق اصحاب المحلات بتراب التكسير والطوب اللي هيخرج من البيوت، وعشان كده خلوا شغل الهدد في المنطقة دي من بالليل لحد الصبح بدري.

وبس.. بعد ما شرح لنا الريس جمل كل حاجة، وافقنا واتوكلنا على الله، والنهاردة، كان تاني يوم لينا في هدم بيت قديم جوة حارة عتيقة من حواري الحسين.. او بالظبط يعني، احنا كنا بنهدم البيت الأخير جوة حارة شيخون.

فوقت من سرحاني في حياتي وفي يوم قعادنا مع المعلم جمل، على صوت عامل المطعم..

-اتفضل ياعمهم، الشاندوشتات خلصت.

قومت من مكاني وخدت منه الساندوتشات ومشيت، حارة جوة حارة جوة زقاق، لحد ما لقيت نفسي قربت من حارة شيخون، بس قبل ما اخلص الزقاق اللي انا فيه ووقت ما المكان حواليا كان ضلمة وساكت.. فجأة سمعت صوت كلب!.. اترعبت وقلبي وقع في رجليا لإني بخاف من الكلاب، وبسبب خوفي ورعبي من الكلب اللي انا ماشوفتوش اساسًا، طلعت اجري، ومع جريتي وسعجلتي وخوفي، غصب عني اتكعبلت في طوبة واتقلبت على وشي.

قومت من عالأرض ونفضت هدومي وابتديت الم السندوتشات اللي وقعت مني، لكن وانا بلمها وبرفع عيني، فجأة لقيت قصادي بني أدم، كان لابس جلابية سودا وليها غطا للراس، او باللغة الدارجة يعني، زعبوط.. ملامحه في الأول ماكانتش باينة، بس لما دققت فيه وبسبب النور البسيط اللي كان جاي من على أول الزقاق، قدرت اشوف وشه بشكل أوضح، كان راجل عجوز، دقنه طويلة وبيضا ووشه رفيع وشاحب، بصيتله باستغراب وبلعت ريقي..

-مش تتنحنح ولا تعمل أي صوت.. خضتني ياعم الحاج.

لما قولتله كده ضحك وهو بيرد عليا..

-انا برضه اللي خضيتك ولا صوت الكلب اللي خلاك اتقلبت زي الكورة الكاوتش هو اللي خضك؟

-جرى ايه ياعمنا.. هو انا عشان غريب عن منطقتك هتهزقني يعني ولا ايه؟!

-لا لا.. انت مش غريب ولا حاجة، انا اللي غريب، او بمعنى اوضح، اسمي غريب.

لما قالي كده اتاخدت، ماعرفش ليه، هل عشان قال اللازمة بتاعتي واللي هي جملة "بمعنى اوضح"، ولا عشان اسمه اللي كان مناسب اوي لحالته وحالتي!.. الحقيقة مش عارف، بس اللي انا متأكد منه كويس اوي، هو اني اتاخدت وحسيت بقبضة في قلبي، وقبل ما اتكلم او اقوله اي حاجة، قرب مني فجأة وحط ايده على كتفي وبص في عينيا، ومع نظراته ليا حسيت ان الزمن وقف وان كل الاصوات من حواليا سكتت ومابقتش سامع غير صوته هو وبس..

-شوف... الحياة دي عبارة عن فرص.. فرصة شغل، فرصة جواز، فرصة مصلحة حلوة، او فرصة غالية اوي اوي تطلعك لسابع سما، وانا بقى تقدر تقول عليا اني صاحب الفرصة دي، نجاتك، فرصتك انت والهلافيت اللي شغالين معاك في إنكوا تغيروا حياتكوا وتبقوا باشاوات والقرش يجري في إيديكوا.

بلعت ريقي وسألته وانا ببربش..

-و و و.. والفرصة دي تيجي ازاي؟!

لف حواليا ووقف ورايا، وبمجرد ما بقى واقف في ضهري، حط إيده على كتفي وهمس في ودني..

-البيت اللي انتوا بتهدوه.. اخر بيت في حارة شيخون، جواه، وتحت اخر أوضة عالشمال في الدور الأرضي، وبالظبط عند الركن اللي عاليمين وانت داخل، هتيجي عند الحيطة وهتخلع اخر بلاطة في الزاوية، ومن بعدها، هتخلع شوية بلاط من اللي حواليها وهتبدأ تحفر.. ولما تحفر وتوسع الحفرة لتحت، هتلاقي صندوق، صندوق خشب مقفول، الصندوق ده جواه كنز، جواه راس بني أدم معمولة من الدهب، تقدر تقول كده انها حتة أثار نادرة، وقبل ما تسألني وتقولي عرفت منين، هقولك ان الموضوع معروف بين اهالي المنطقة، الكل عارف ان الراس دي، مدفونة تحت البيت ده، بس للأسف، ماحدش يقدر لا يحفر ولا يطلعها، ما هي الحكومة لو شمت خبر وعرفت ان حد حفر وطلع أثار وباعها، هتوديه في ستين داهية.

-طب وانا مالي؟!

-مالك ازاي بس، ده مالك انت واللي شغالين معاك كمان، اصل انتوا لما تطلعوا الصندوق ده، هجيلكوا بعد اسبوع من النهاردة عند البيت، وبعد ما استلم منكوا الصندوق واتأكد ان الراس جواه، هدي لكل واحد فيكوا أرنب اخضر.

فتحت بوقي وبرقت اول ما قالي كده..

-ياليلة مش فايتة!.. مليون دولار!

-ايوه.. مليون دولار، وماتخافش، كده كده انتوا بتشتغلوا بالليل وماحدش بيشرف عليكوا، ده غير انكوا اصلًا بتشتغلوا مع الحكومة وماحدش هيشك فيكوا، وحتى لو حد شك فيكوا.. حلني بقى على ما يثبت، ما هو المثل بيقول، الحرامي بشيلته، وانتوا مش هتشيلوا حاجة، انتوا هتحفروا على قد ما تقدروا، وبعد ما تطلعوا الصندوق في اي وقت، هتخبوه في مكان أمان لحد ما اجيلكوا بعد اسبوع.

-طب ولو اتمسكنا وحد عرف وقدر يثبت؟!

-ما انا قولتلك، الحرامي بشيلته... برة عني.

-بس.. بس دي أثار، يعني من حق الحكومة والناس والغلابة وال..

-وال ايه؟!.. وال ايه ياعربي؟!.. هو مش انتوا كمان غلابة ولا ايه؟!

-عربي!.. انت عرفت اسمي منين؟!

-انت لسه واخد بالك دلوقتي؟!، معلش، انا عاذرك، مليون دولار يقلبوا الدماغ برضه، بس ماهيمكش، اهجاوبك، انا ياسيدي عرفت اسمك من مراقبتي ليك انت والاربعة اللي معاك، سامبو وسعيد ورشدي ومغاوري.. اه ماتستغربش، انا حاطط عيني عليكوا من بعد ما عرفت ان الحكومة هتجيبكوا عشان تهدوا البيت، وبقولك ايه، ماتوجعش قلبك بقى وتقولي عرفت منين، انا برضه راجل كُبارة وليا مصادري.

-طب ولو طلعت بتشتغلني؟!

-براحتك.. ماتحفرش، ماتحفرش وانسى كل اللي قولتهولك.

-بس انا..

-انت جعان وفقير ومش لاقي اللضا، لكن دي.. دي فرصتك عشان تبقى بني أدم وتقب بقى على وش الدنيا.

لما وصل في كلامه لحد هنا، سرحت، حلمت بالفلوس وبالعربيات وبالعروسة وبكل اللي هقدر اعمله بالمليون دولار بتوعي..

-ها ياعربي.. عربي.. قولت ايه.. دول مليون دولار.. سامع ياعربي.. مليون دولار.

وبسبب سرحاني وخيالي الواسع، غصب عني لقيت لساني بيتكلم وانا لسه سرحان...

-موافق.. هحفر، هقول لبقية الرجالة وهحفر انا وهم وهنطلعلك الصندوق.

-اتفقنا.. نتقابل بعد اسبوع زي دلوقتي.. وماتقلقش ولا تشغل بالك بيا ولا حتى تدور عليا، انا هجيلك لحد عندك انت والرجالة اللي معاك، هجيلكوا جوة البيت..

واختفى!.. قالي كلامه ده واختفى من قدامي، زي ما يكون اتبخر او الأرض اتشقت وبلعته!.. لكن بعد اختفاءه بشوية، وبعد ما وقفت سرحان في كلامه لدقايق، خدت بعضي وطلعت اجري عالبيت، دخلت وانا متسربع على زمايلي، سامبو وسعيد ورشدي ومغاوري.. وقتها كانوا قاعدين بيرتاحوا من الشغل، وفي نفس الوقت كانوا مستنيني اجيبلهم الأكل، لكن اول ما شافوني وانا داخل عليهم جري، بصوا لي باستغراب، وقبل ما ينطقوا ولا يقولوا لي اي حاجة، بدأت انا بالكلام..

-انا.. انا قابلت كنز.

قام سامبو وقف وقالي بتريقة..

-كنز ايه ياابو عمو.. فين العشا!

-الأكل اهو.. بس قبل ما تاكلوا تعالوا نحفر في مكان جوة، اخر اوضة عالشمال، ولو حفرنا ولقينا صندوق خشب جواه راس دهب، يبقى الغريب معاه حق.

سعيد اول ما سمع كلامي، قام وقف هو كمان وقرب مني وحط ايده على قورتي..

-لا إله إلا الله.. انت سخن ياض ياعربي ولا في حاجة قرصتك.

اتدخل مغاوري ونزل ايده من على قورتي..

-اتقل ياسعيد.. غريب مين وراس دهب ايه وهنحفر فين!.. ما تفهمنا قصدك ياعم.

بلعت ريقي وقعدت على الأرض وابتديت احكيلهم، وبعد ما خلصت، بص رشدي لكل اللي واقفين وقالهم بصوت واطي..

-الواد ده لو بيتكلم صح، تبقى طاقة القدر اتفتحت لنا.

لكن سعيد رد عليه وهو مش قادر يصدق..

-ياعم صندوق ايه بس وغريب مين، ده تلاقي عربي رفع نص حباية وهي اللي عملت فيه كده.

ومن بعد كلام سعيد، رد عليه سامبو وهو عاقد حواجبه..

-ومن امتى يعني عربي بيبلع حاجة، وبعدين ما المايه تكدب الغطاس، احنا نخش جوة الأوضة ونروح عند المكان اللي الغريب ده وصفهوله، ولو لقينا الصندوق ولقينا جواها الدماغ الدهب دي، يبقى عربي معاه حق.

والكلام اللي قاله سامبو اتنفذ، ما هو بالرغم من ان سعيد ماكنش مصدق وبيقول على كلامي تخاريف، إلا ان سامبو ورشدي ومغاوري، كانوا مصدقين وابتدوا يحفروا معايا، وبعد ما حفرت انا وهم لمدة ساعة تحت الأرض، وفي نفس المكان اللي الغريب قالي عليه، مرة واحدة لقيت مغاوري بيرمي الجاروف بتاعه من ايده وبيقولنا بلهفة..

-ياجدعان، الجاروف صدر في حاجة، ولما جيت ازيحها، لقيت انها مش حاجة.. ده صندوق صغير!

اتلمينا كلنا حواليه، وعلى نور اللمبة الحمرا اللي كانت متعلقة في الأوضة، شوفنا الصندوق.. الصندوق اللي بعد ما طلعناه وكسرنا القفل العجيب بتاعه، لقيناها جواه!

راس بني أدم، او بمعنى اوضح، جمجمة بني أدم بس معمولة من دهب!

وقفنا كلنا وبصينا عليها واحنا فاتحين بوقنا من الصدمة والذهول، ماحدش كان مصدق، الكل كان ساكت وبيرتب لحياته الجديدة، وبعد سكوت دام لدقايق، اتكلم رشدي اللي يبقى اكبر واحد فينا.

-وبعدين؟!.. هنعمل ايه في البلوة دي دلوقتي؟!

رد مغاوري وهو بيمسك الراس وبيدخلها في الصندوق..

-هنحطها في مكانها ونرجع الصندوق في مكانه، وبعد أسبوع هنحفر ونطلعوا للغريب.

بس وقتها سعيد رد بكلام موزون..

-وتيجي ازاي دي ياعم مغاوري، الراس دي ماينفعش ترجع مكانها تاني، ما هو احنا لو رجعناها زي ما كانت، وردمنا الحفرة، مش بعيد الراجل يجي واحنا مش موجودين ويحفر وياخدها، ولو ماحصلش والراجل خاف يجي عشان الحكومة وعشان النهار له عينين، فممكن اوي حد غيره يجي وياخدها، هو مش قالك ان اهالي المنطقة هنا عارفين الحوار ده!

وقبل ما ارد، رد سامبو على كلام سعيد بسؤال..

-طب وهنوديها فين؟!

لكن اللي جاوبه ماكنش سعيد، ده كان رشدي..

-ودي محتاجة سؤال، طبعًا هناخدها وهنخبيها عند أي واحد فينا.

وبعد كلام رشدي، اتدخلت وانا ببصلهم هم الاربعة..

-هو رشدي معاه حق، بس أكيد الواحد ده مش انا.

وقتها سعيد ماستناش، ده حط الراس جوة الصندوق وقفله، وبعد ما قفله خده وراح ناحية شنطة العدة بتاعته وحطه جواها..

-انا اللي هاخده معايا، كده كده الولية مراتي مسافرة عند أهلها في البلد ومش هترجع قبل أسبوعين.

بس كلام سعيد ماعداش على سامبو عادي كده، ده اول ما سمع اللي اتقال، راح ناحية شنطة العدة وزق سعيد..

-واشمعنى يعني انت اللي تشيله عندك، ما انا عايش لوحدي وماحدش بيفتح شقتي غيري.

وقبل ما الخناقة تقوم وسعيد يمسك في سامبو، اتدخل رشدي وجابلهم مالأخر..

-بس انت وهو.. من ابو ناهية، سعيد اللي هيخلي الصندوق معاه لحد ما الأسبوع يعدي..

وقبل ما سامبو يقاوح او يتكلم، اتدخل مغاوري وسكته..

-خلصت ياسامبو.. كلام رشدي نافذ.

وبس.. اللي اتفقنا عليه اتعمل وروحنا، لكن بعد ما مشينا من الحسين، كل واحد فينا ماروحش على بيته، احنا وصلنا لسعيد لحد باب شقته عشان نطمن انه وصل بالسلامة هو والصندوق، وبعد ما دخل الشقة ومشينا كلنا، طلعت أوضتي اللي في سطوح بيت عيلتنا عشان انام.. وبمجرد ما دخلت وفردت جسمي على السرير، غمضت عيني، زي ما اكون اتخدرت او حد خبطني على نفوخي، بس التغميضة اللي غمضتها مادامتش كتير، مادامتش لاني فجأة فَتحت عيني على صوت حد بيصرخ!

الدنيا كانت مزغللة، ماكنتش شايف كويس، انا يادوب بس كنت شايف قصادي حد قاعد على الأرض في ركن من أركان أوضة، وجنبه كان واقف خيال اسود طويل.. ومن غير أي مقدمات، لقيت الشخص اللي قاعد ده، قام وقف وراح ناحية مكان ماقدرتش احدده وجاب حاجة، وبحركة غريبة ومش مفهومة، لقيته جاب كرسي ووقف عليه، وبالحاجة اللي جابها مد دراعه ناحية المروحة.. ماكنتش شايف كويس، فغصب عني فركت في عيني وحاولت افتح عشان اشوف اكتر، لكن للأسف، كان فات الآوان.. الشخص اللي كان واقف عالكرسي، في اقل من دقيقة كان زق الكرسي و شنق نفسه بحبل ربطه في المروحة!

الدنيا بدأت تضلم، والرؤية اللي كانت ضبابية ابتدت تنعدم واحدة واحدة لحد ما اختفت خالص، وبمجرد ما اختفت، صحيت من النوم.

مسكت موبايلي وبصيت فيه، الساعة كانت تسعة بالليل!

برقت من خضتي، معقول، انا نمت كل ده!.. ده انا نايم من الساعة ٨ الصبح تقريبًا!

قومت وغسلت وشي ولبست ونزلت، ومع وصولي للقهوة اللي بنتجمع عندها احنا الخمسة عشان نمشي سوا، لقيت الرجالة قاعدين، بس الحاجة الغريبة اللي لاحظتها، ان سعيد ماكنش قاعد وسطهم!

-شوفت ياعم رشدي، مش قولتلك، اهو ماجاش ومابيردش على تلافونه.. شكله ضرب عالراس وخلع.

بعد ما دخلت وقعدت جنبهم، وسامبو قال لرشدي كده، بصيت لسامبو بقلق بسبب الحلم اللي شوفته وانا نايم..

-لا ياسامبو.. انا حاسس ان سعيد في مصيبة.

لما قولت كلامي ده، قام رشدي وهو بيقولنا..

-واحنا هنفضل نضرب اخماس في اسداس، ما ننهي ام الحوار ده ونروحله البيت..

وروحناله البيت احنا الاربعة، بس لما خبطنا كتير وماحدش فتح، اتخضينا، ولما فضلنا نخبط اكتر واكتر ورنينا على تليفونه، سمعنا الرنة من جوة!.. في اللحظة دي الجيران كانوا اتجمعوا، ومع لمتهم وصوت الموبايل، اتكلم مغاوري وقالهم..

-ياجدعان، احنا اصحاب سعيد وبنشتغل معاه، ولما لقيناه ماجاش الشغل ورنينا عليه وماردش، قلقنا، ودلوقتي اهو، بنرن عليه وتليفونه بيرن جوة وهو مش طالعله حس.. كتفك معايا ياعم، كتفك معايا يااخينا الله يرضى عليك، بينا نكسر الباب لا تكون حصلتله مصيبة وهو نايم.

اتلموا الجيران حوالين الباب وكسروه، وبمجرد ما الباب اتكسر ودخلنا، شوفنا مصيبة!.. سعيد كان متعلق في حبل غسيل مربوط في جنش المروحة اللي في اوضة من الاوض، وكان ميت!

الجزء التاني 

↚