أخر الاخبار

قصة الساحر اليمني التائب بقلم أحمد محمود شرقاوي

 قصة الساحر اليمني التائب بقلم أحمد محمود شرقاوي



من الأمور الغريبة واللي كانت مفاجئة للكثير من عاشقي مسلسل المداح للفنان حمادة هلال هو ان شخصية المداح مكانتش مجرد شخصية من خيال المؤلف بيجسدها الفنان على شاشات التلفزيون وبس, وانما هي شخصية حقيقية اتعاملت مع الجن بل وعبد الشيطان لفترة وصلت لخمستاشر سنة كاملين, بل والمثير للدهشة ان الشخصية دي طلعت على الفضائيات وحكت الحكاية كاملة, حكاية تثير جوة أي شخص كل مشاعر الخوف والرعب..




الرقية الشرعية للمس والسحر,السحر في المقابر,السحر الاسود,السحر في المغرب,السحر والشعوذة في الجزائر,أعمال السحر,الشيخ.محمد.صديق.المنشاوي,كرامة الشيخ الشعراوي في الجزائر,كرامة الامام بلقايد والشعراوي,كرامات الشيخ الشعراوي,زيارة المقابر,الشيخ الشعراوي,الشعراوي وبعثة تعريب الجزائر,القران يريح القلب,الشيخ.ماهر.المعقلي,الفنانين الماسون العرب,الجن يتكلم على الهواء مباشرة,حفل محمد رمضان,القران والحياة,ساحرة,اخبار ليبيا اليوم مباشر,المقابر







يا ترى مين هو المداح ؟؟



وايه هي الحروب اللي خاضها مع عشاير الجن ؟؟


فتعالى معايا عشان نعرف مين هو داوود محمد فرحان, أو المداح الحقيقي


داوود محمد فرحان, هو طفل اتولد لساحر يمني شهير كان بيمارس كل أنواع السحر تقريبا من سحر اسود لسحر سُفلي, بل وكان بارع في تسخير الجن لخدمته في كل أعماله, لدرجة ان من كثرة الجِن وقُربهم منه قدروا انهم يتسلطوا على داوود نفسه ويحصله أكتر من مَس وهو صغير من الجن اللي كانوا عايشين معاه في البيت..


لحد ما بدأ ابوه الساحر يكبر في العُمر وبدأ الجن يستنتج ان الأب أوشك على الموت وان أعراض الشيخوخة بدأت تظهر عليه اكتر واكتر, وان لازم ابنه يخلفه في العمل اللي هو بيعمله في النهاية, وداوود كان شغفه وقتها وفضوله تجاه اللي بيعمله والده كبير وكان عايز يعرف أسرار المهنة اللي بيعملها أبوه..


لحد ما في يوم وليلة جه الأجل ومات الأب, وبدأت جموع الجن من اللي مع الأب يستدرجوا الابن داوود عشان يمتهن مهنة الأب بل ويزيد على كُفر وشِرك أبوه اكتر واكتر..


داوود بيقول انه لما كمل 12 سنة تقريبا وهو سن البلوغ عند الذكور بدأت تزوره كل ليلة بنت من بنات الجن في هيئة جميلة جدا جدا, وكانت بتتشكل في سورة واحدة عاملة زي الحورية بالظبط, وكانت بتستدرج داوود لأماكن مهجورة عشان يسقط معاها في فِعل الفاحشة..


داوود وقتها مكنش بيقدر يقاوم إطلاقا جمال الفتيات دول وكان بينصاع لاستدراجهم كل ليلة, خاصة ان كل ليلة كانت بتجيله بنت أجمل من البنت اللي قبلها, وكان بيقع معاها برضه في الفاحشة..


لحد ما في ليلة وبعد ما انتهى من الفِعل ده مع بنت من بنات الجان شاف دابة شكلها غريب, هي مزيج بين الحصان والحمار, وفرح وقتها لأنها تعتبر وسيلة مواصلات سهلة لحد البيت خاصةً انها كانت مفكوكة ومش شايف ليها صاحب..


وفورا ركب على الدابة دي وبدأت تتحرك بيه, بس الغريب ان الدابة دي بدأت تسحبه بطريقة غريبة وتدخل اكتر بين الجبال, واحدة واحدة بطريقة غريبة لحد ما بدأ يلاحظ وقرر يضربها بالعصاية عشان تقف وتستجيب لأوامره, وهنا كانت الكارثة..


اتكلمت الدابة دي وقالتله:


"انت لسة فاكر ان انا حيوان ولا ايه"


وقتها داوود حصلتله نوع من أنواع الصدمات الرهيبة ووقع من طوله في الأرض, وبيقول ان وقتها ناس يعرفوه لقوه مرمي تاني يوم في الجبل فخدوه ورجعوه بيته, ووقع وقتها داوود في غيبوبة عميقة لمدة 3 سنين..


كان وقتها عنده 15 سنة وفضل في الغيبوبة دي لحد ما وصل لسن 18 سنة, داوود بيقول ان طول التلت سنين دول كان الجن هما اللي بيخدموا على داوود اللي كان متخدر وشبه وكأنه في غيبوبة, كانوا بيجبوله لحم يوميا عشان يتغذى عليه, واللي اكتشف لاحقا ان ده لحم حيوانات ميتة لأن الجن بيتغذى عليها, وان الجن المتلبس جسمه كان بيفضل النوع ده من اللحوم..


وفضل على الوضع ده لحد ما فاق من الغيبوبة ورجع انسان طبيعي من تاني, بس للأسف رجع وأصبح ولائه التام للجن, وبدأ الجن يأمروه أوامر عشان ينفذها كنوع من أنواع رد الجميل..


الطلب الأول انهم بدأوا يطلبوا منه جثث لحيوانات ميتة يحضرها لبيته عشان يتغذوا عليها, وبدأ داوود يستجيب لكلامهم وبالفعل يجيب جثث الحيوانات دي في البيت عنده..


والطلب الثاني واللي كان أبشع بمراحل ان الجن طلبوا منه انه يجيب جثة لطفل ميت ويتغذى عليها, بس داوود أنكر تماما انه استجاب للجن في الموضوع ده قدام الشاشات, بس هل الكلام ده حقيقي ولا كان مجرد كلام عشان ميقلبش عليه الرأي العام, الله أعلم..


بيكمل داوود وبيقول انه في يوم من الأيام قابل راجل غريب اداله مبلغ من المال وطلب منه يروح مكان اسمه ياخرس عند قبر أو ضريح لشخص اسمه بن علوان, ويروح داوود للمكان عشان يتفاجئ انه ضريح لشخص ميت الناس بتروح تدعو هناك وتطلب المباركة كنوع من أنواع الوساطة بينهم وبين ربنا, نفس الأمور الشركية اللي بتحصل عندنا في مقام السيد البدوي وغيره..


وفضل داوود في المكان ده لمدة 15 يوم مقيم هناك بيتقرب للضريح وبيصلي مع الناس وبيعمل زي ما بيعملوا بالظبط, حتى انه قال ان الناس دول كان اتجاه قبلتهم هو قبر ابن علوان نفسه, وكأنهم والعياذ بالله بيعبدوا القبر نفسه مش ربنا, لحد ما خرجله راجل واداله سبحة وخاتم وكتاب وقاله ان ده ورث أبوك, وقال الجملة الشهيرة اللي اتقالت في المسلسل "بورك فيك لقد أخذت كرامات أبيك" وفهمه انه كدا ورث علم أبوه وان الجن هيطيعه بعد كدا شرط انه يحضر كل سنة ويدبح دبيحة عند الضريح ده..


ومن بعدها رجع داوود بس عشان يمارس السحر الحقيقي من يومها, رجع بالخاتم والسبحة والكتاب ومسك كتب أبوه وبدأ ينهل ويتعلم من كل علوم السحر بطريقة مخيفة وكأنه بيرتوي من المية بعد يوم عطش طويل جدا رغم ان والدته كانت أخفت الكتب كلها, بس هو قدر يستعين بالجن لحد ما قدر يوصل للكتب دي في النهاية..


وقتها كانت شروط الجن الكفرية عشان يكونوا طوع أمره


أولا أنه يكفر بالله وبكتبه والملائكة والرُسل

ثانيا انه يدنس والعياذ بالله المُصحف الشريف

ثالثا انه يصلي مع الناس عادي ولكن بدون أي طهارة بشرط انه ميخالطش الصالحين أبدا

كنوع من أنواع الفتنة للناس عشان يصدقوا انه منهم في حين انه فضل سنين بيصلي بدون أي طهارة..


ومن هنا بدأ الجن فعلا يستجيب للمداح, وكانت الناس بتزوره عشان يساعدهم في أمور حياتهم..


اللي مريض

واللي كانت مراته مبتخلفش

واللي كان مربوط

واللي كان عايز يعقد عقدة او يعمل سحر لحد


وبدأ المداح يمارس السحر ده بس على نطاق واسع جدا, وكان الجن بيساعدوه بوصفات طبية وسحرية يقدمها للناس ففعلا يخفوا والست العقيم تحمل, وذاع صيت المداح وسط الناس اكتر واكتر لدرجة انه كان بيخرج ويمشي وسط الناس ويحط السكين في بطنه بدون ما يتأثر..


كان يقدر يسحر عين الناس عشان يوهمهم انه شخص خارق, مبروك, وان مصلحتهم كلها في انهم يتبعوه ويكملوا حياتهم معاه للنهاية, بس بيقول داوود ان في مرة من المرات شاب من الشباب اللي واقف قرأ آية الكرسي واتسبب ان الجن يهربوا من المكان وفعلا دخلت السكين في بطنه بعد ما السحر مفعوله بطل واتصاب إصابة بليغة دخل على اثرها المستشفى بس قدر في النهاية انه ينجو بإعجوبة شديدة..


وكمل داوود في أموره الشيطانية وبدأت الناس تتوافد عليه اكتر واكتر من كل مكان, وبدأت سطوته تزيد عليهم والكل كان بيتقرب منه بكل الطرق خاصةً ان اهالي القرية دول كان الجهل والخرافات منتشرين بينهم بطريقة كبيرة جدا..


بس فضل داوود عايز ينتقم من الشخص اللي اتسبب في اصابته بالسكين يومها لما قرأ آية الكرسي وبدأ يرسل الجن يوم بعد يوم عشان يأذوه, لمدة تلت سنين وهو بيعلن الحرب عليه بس مقدرش يأذي الشخص ده أبدا, فقرر في النهاية يكمل في أموره الكفرية ويتعبد للشيطان اكتر ويستحم بماء نجس ويزداد في كفره وطغيانه..


وفضل الحال وقت طويل جدا لحد ما اتجوز وخلف وكملت حياته على نفس النمط, بس في ليلة غريبة شاف داوود حلم كان سبب في توبته توبة نصوحة من يومها..


شاف داوود انه مات والناس شايلينه على الاعناق وفرحانيين بهلاكه وعمالين بيدعوا عليه لأنه كان بيأذيهم لحد ما نزلوه في القبر, ونزل داوود القبر واتقفل عليه الباب وبقا لوحده في ظلمات القبر مدفون, وفجأة ظهرله ملكين وسألوه


"من ربك"

ومن رعب داوود مقدرش يجاوب عليهم أبدا, ورجعوا الملكين يطلبوا منه انه يصلي, بس داوود عرفهم انه غير طاهر ومحتاج انه يتوضأ..


وقتها جابوله اناء فيه مية مغلية عاملة زي الحمم وطلبوا منه يتوضأ, بس من رعبه وخوفه مقدرش يلمس المية دي لحد ما ظهرت ايد من الأرض وشالته وحطته في قلب المية دي, وقتها صرخ, صرخ من الفزع وصحي من نومه..


صحي وفضل يلهث وقت طويل لحد ما قدر يرجع للنوم مرة تانية, ومن تاني شاف نفسه في نفس المكان بس أبوه كان موجود وبيغتسل بالمية المغلية دي وبيصرخ, وقاله وقتها:


- اهرب يابني من المكان ده, اهرب ومتجيش هنا مرة تانية, توب لربك ومتخليش مصيرك يبقا زي مصيري


وفعلا داوود صحي وهو بيبكي وقرر انه يتوب في النهاية مهما كان, في البداية بيقول انه لما كان بيصلي كان بيحس انه متكتف, بس مع كثر المحاولات قدر انه يصلي ولأول مرة صلاة لوجه الله بعد مرور 15 سنة كاملين, بس كان صعب الجن يسيبوا في حاله بعد كل الفترة دي, وبدأوا يغووه من تاني عشان يرجع لأمور السحر من تاني..


وبدأوا يبعتوا فتيات جميلات لمحاولة اغوائه ولكنه صبر وتجاهلهم تماما, وقتها الجن بدأ يهدده بقتل اولاده الاتنين بس مستجبش لكلامهم, لحد ما بالفعل نفذ الجن وعيده وقتلوا ولاده الاتنين واللي كان أكبرهم عنده بس 9 سنين..


داوود بيقول ان ولاده فضلوا يتنفخوا ووجوههم تزرق بطريقة مرعبة, لحد ما ماتوا, ولما اتسأل هل الجن فعلا ممكن يقتل بشر قال ان ده اللي حصل بالفعل, ولكنه صبر, صبر اكتر لحد ما الجن بدأ يهدد بحاجة أبشع..

مرات داوود في الوقت ده كانت حامل, وبدأوه يهددوه بقتل الجنين بل والتهامه في رحم أمه, داوود وقتها بدأ يخاف, وبدأ نوعا ما يحاول يستجيب لكلامهم, بس مراته الست المؤمنة اللي قررت تتوب وتساعده على التوبة قالتله يصبر ويحتسب كل ده لوجه الله وانهم هيتقابلوا مع بعض في الجنة في النهاية..


وفعلا نفذ الجن وعيده وتلبسوا مراته وأصابوها بمرض شديد جدا, وقتها داوود بدأ يلف على الدكاترة عشان يلتمس لمراته العلاج بس الكل احتار في حالتها, بل والأغرب من الخيال ان وقتها الجنين اختفى تماما من بطن مراته والجن نطق وقال انه التهم الجنين وهو في الرحم..


وفضلت زوجته تصبر داوود في النهاية لحد ما المرض اشتد عليها وماتت في النهاية وتبقى داوود لوحده في الحياة ومنتظر انه يموت عشان يقابلها في حياة تانية..


وطلع داوود في لقاء تلفزيوني اتذاع على اليوتيوب ولمدة 43 دقيقة تقريبا بيحكي كل اللي اتعرض له وتجربته كاملة, واللقاء تقريبا جاب اكتر من 3 مليون مشاهدة وناس كتير شافوه, البعض أجزم بصدق الحكاية بالكامل, والبعض قال انها مجرد تخاريف وشو اعلامي خاصة انهم تسائلوا ازاي الجن قدر يقتل بل ويلتهم الجنين..


بس الحقيقة لا يعلمها إلا الله، بس هل انت يا عزيزي مؤمن بإمكانية الاتصال الجسدي بين الإنس والجن، خاصةً ان في التراث كتير من حكايات تزاوج الإنس بالجن؟!


وهل انت ممكن تصدق فكرة قتل الجن للجنين، خاصة ان الشيطان بيجري في ابن آدم مجرى الدم ؟!


وهل انت مقتنع بالحكاية ولا شايف انها تخاريف رجل مخبول، بس قبل ما تكتبلي رأيك في تعليق فكر ولو ثواني وهستنا تعليقك وبناءً عليه ممكن اكتبلك مقال تاني عن فكرة الزواج والمعاشرة بين الجن والإنس واحكيلك كتب التراث، بل وممكن اكتبلك عن امكانية قتل الجن للأطفال من عدمه، بس عايزك في النهاية تتيقن من حاجة واحدة، إن فيه حساب عسير بعد الممات وإنه


"لا يفلح الساحر حيث أتى"



تعليقات



حجم الخط
+
16
-
تباعد السطور
+
2
-