قصة طريق الموت للكاتب محمد أحمد عباس
الجن والشياطين الارواح والاشباح العالم الاخر الفضول يقتلني ويقتلك. الانس.. والجن عايشين مع بعض في نفس المكان في نفس البيت .. اى مكان بتروحه بيكون فيه جني البيت بتاعك مليان بملابين من الجن عايشين معانا وبيشوفونا وبيسمعونا ودايما معانا فـ البيت ومن رحمة ربنا علينا انه جعل بيننا وبينهم حجاب بحيث اننا لا نشوفهم او نسمعهم بس ممكن نحس بيهم نحس بوجودهم فـ اوقات ومعظم الاوقات دي بنكون لوحدنا مره تحس بأنفاس وراك مره تحس بحد لمسك وكمان الأحلام اللي أوقات بنقوم منها تعبانين وحجات كتير كتير… المكان حواليا ضلمة حاسس انى مش قادر اخد نفسي بحط ايدي على وشي ده ده ده تراب انا انا مدفون لا لا..........
خلوني أرجع بيكم لنقطه البدايه بدايه النهايه زي ما انا اعتبرتها انا اسف اني معرفتكوش بنفسي انا اسمي محمود علي الحسيني في الصف الثالث الثانوي من اهالي منطقه دسوق محافظة كفر الشيخ اتربيت في أسرة محدودة الدخل بدأت قصتي من يوم انفصال والدي ووالدتي من اربع سنين وبحكم ان مدرستي واصحابي هنا كان الاختيار اني هكمل مع والدي وسافرت والدتي الى احد احياء مدينة القاهرة كان والدي شغال فرد أمن على احد المصانع وكان أعز اصدقائي كريم صديق الطفوله الوحيد في يوم من الايام وبدون سابق انذار المصنع اللي كان شغال فيه والدي نقل شغله كله إلى اسكندريه وكان والدي لا يملك الاختيار عرض عليا والدي اني اتنقل انا كمان معاه لكن انا رفضت بحكم اني داخل على امتحانات ومش عايز تضيع عليا السنه بعد الحاح كبير وافق ابويا اني افضل في دسوق وهو هيتنقل إلى الاسكندريه وكان الاتفاق ان هو هيبعتلي المصاريف كل أسبوع للدراسة والعيش واتنقل والدي الى الاسكندريه انا فضلت زي ما انا وفي يوم من الأيام عرضت على كريم صديقي انه يجي يبات عندي يوم اهو نذاكر سوا ولأني زهقت من القعدة لوحدى فى البيت وافق كريم صديقي بعد عرض الموضوع على والده اللي كان مرحب جدا بالموضوع .
لانه كان صديق والدي و عرفني كويس المهم اتفقت انا وكريم اني هستناه في البيت الساعه 5:00 المغرب وفعلا وصل كريم صديقي في الميعاد اللي اتفقنا عليه وانا وهو قعدنا نهزر الصراحه ومذكرناش المهم لاقيت كريم بيقولي سمعت عن الشيخ اللي هيجي البلد بكره بيقوله انه مخاوي انا بصيت لكريم وكنت بضحك الصراحه لاني ما كنتش مصدق في موضوع الجن والعفاريت وكنت شايف انه هبل في هبل فقلت له بطل هبل شوف لنا موضوع تاني لاقيت كريم بيضحك وبيقولي انت خايف ولا ايه قلت له لا لا مش خايف ولا حاجه قالي خلاص احنا نروح بكره للشيخ اهو مش هنخسر حاجه بعد الحاح كبير منه وافقت الصراحه قولت انا عارف انه نصاب وهروح وخلاص وتملكني الفضول اني اروح للشيخ ده وبالفعل نام كريم وانا قعدت طول الليل افكر هثبت ازاي ان الراجل ده نصاب وغلبني النوم صحيت تاني يوم لاقيت كريم روح وانا نايم ونسيت الموضوع بتاع الراجل ده و على الساعه 7:00 كده لاقيت اتصال من كريم بيقولي ايه جاي ولا خايف قولتله لا طبعا جاي ونزلت قابلت كريم وفضلنا ماشيين وهو يقولي على الناس اللي بتقول عن بركات الشيخ وانه بيفك السحر وانا ماشي بضحك ومره واحده لقينا ناس كتير واقفه عند بيت باين عليه من بره انه قديم ومتهالك ولاقيت كريم بيشدني من ايدي وبيقولي يلا احنا هندخل على طول.
المهم دخلنا وكما توقعت في واحد واقف بره عمال يحكي عن الشيخ وفضله وبركاته ولا كأنه استغفر الله العظيم يارب المهم لاقيت كريم راح للراجل وقاله اخويا تعبان وعايزين ندخله للشيخ بسرعه قاله الشيخ بياخد 100 جنيه في العادي بس لو حضرتك مستعجل فا حضرتك هتدفع 300 جنيه ولقيت كريم بيدفع ال300 جنيه فابصتلوا كده. وقلتلو انت ايه اللي بتعمله ده وازاي تدفع 300جنيه كده لاقيته بيقولي وانت مالك مش انت جاي معايا ملكش دعوه والراجل الصراحه اول لما اخد الفلوس قاله استريح حضرتك هنا وانا هدخلك على طول ولقيته مره واحد عمال يقول حي ارضى علينا يا مولانا حي المهم فعلا الراجل ما اخدش نص ساعه وكان مدخلنا لكن قبل ما ندخل لقينا الراجل بيقولنا اول لما تدخله تبوسوا ايد سيدنا و تنحنوا ليه انا اول لما سمعت كده بصيت لكريم وقولتله ايه الهبل ده انا مش هعمل كده كريم منطقش واول لما دخلنا لاقيت كريم بينحني وبيبوس ايده وبيشدني اني اعمل زيه ولاقيت الراجل ولا الشيخ ده مادد ايده عشان ابوسها وضحك ضحكه كلها شر لو قولت انها جايه من الجحيم ابقى قولت حاجه بسيطه كانت ضحكة ابليس نفسه فا قولتله لا مش هبوس هتعمل ايه يعني لقيته بيبصلى وبيقولي انا كنت عارف انك هتعمل كده يا محمود مش محمود برضو انا الدم نشف في عروقي قالي اهو انتوا كده يا ولاد ادم مبتعترفوش أن في اكبر واحسن منكم علي الارض علي العموم اقعد يا محمود مش محمود برضو محمود علي الحسيني انا معرفتش انطق وقولتله وانا مرعوب في نفس باخده بصعوبه هوووو انتتتت عرفتت اسمييي منيننن لاقيته بصلي و بيضحك ضحكه من أعماق الجحيم وبيقولي انا بقي هعرفك اذا كنت نصاب فعلا ولا لا قومت وقولت لكريم اناااا همشييي هتقوم معاياا ولا لاء وسحبت كريم من ايده ولسه هخرج من الباب لاقيته بيزعق وبيقولي هتجيلي تاني لأنك مش هتعرف تهرب مني بس المره الجايه يا حرام انت اللي هتتمني .
انك تبوس رجلي مش ايدي خرجت ولاقيت كريم لسه هيتكلم قولتله اسكت خالص جايبنا عند دجال وروح كريم بيته وانا روحت بيتي وكنت تعبان اوي وعايز انام كأني منمتش من سنين ولسه هحط راسي علي المخده سمعت صوت جي من الصاله قولت حرامي خرجت ملقيتش حاجه لسه هدخل الاوضه بتاعتي لاقيت في نور احمر خارج من الحمام وكنت خايف بس تجمعت شجاعتي وقربت من باب الحمام وفتحته شوفت اصعب موقف ممكن اي بني آدم يشوفه في حياته شوفت كريم صاحبي مشنوق في الحمام وهو متعلق في سقف الحمام وعنيه مبرقه وجاحظه لبره وكان نازل منها خط احمر من الدم وبصلي وقالي جمله واحده انت السبب محستش بنفسي معرفش فقدت الوعي قد ايه صحيت لاقتني واقع على ارض الحمام ومفيش اي اثر لكريم تمالكت نفسي و قومت بصعوبه وجريت علي التليفون اكلم كريم كلمته مره واتنين وتلاته محدش بيرد غيرت هدومي ونزلت اجري علي بيت كريم وكانت المفاجأة اني لقيت عزاء عند بيت كريم مقدرتش امسك نفسي فا وقعت على الأرض الناس قوموني لانهم عارفين ان كريم كان صاحبي الوحيد ووقفت اخد عزاء كريم وكنت واقف فا سألت واحد قولتله حضرتك انا وكريم كنا مع بعض امبارح هو مات ازاي لاقيت الراجل.
بيبصلي باستغراب وبيقولي كريم ميت بقاله يومين رده نزل عليا زي الصاعقه ده معني اني كنت واقع في الحمام يومين بحالهم حاولت مبينش عليا حاجه وقررت اتسند واروح لوالد كريم واساله كريم مات ازاي وانا عارف الاجابه وكان دايما والده بيتهرب من السؤال عنده حق هيقول ايه وعرفت من اخوه انهم لاقوه شانق نفسه في الحمام ووشه عليه أشد علامات الرعب والفزع ومن بعد اليوم ده وانا مبيجليش نوم وكانت الامتحانات بدأت قررت اخلص الامتحانات واسافر اسيب البلد الي اتربيت فيها وكان اجمل ايام حياتي مع كريم هنا عدت عليا فترة الامتحانات دي اصعب ايام حياتي وخلصت الامتحانات وحجزت رحله للاسكندريه وانا راكب القطر استجمعت زكرياتي مع كريم واتحرك القطر اتغلب عليا النوم.
فنمت حلمت اني في نفس البيت بيت الدجال وهو واقف بيضحك وبيقولي دي كانت البداية ولسه كل اللي بتحبهم ومره واحده المكان اتبدل المكان حواليا ضلمة حاسس اني مش قادر اخد نفسي بحط ايدي علي وشي ده ده ده تراب انا انا مدفون لا لا سامع صوت ناس بتدعي عايز انطق واقولهم اني مش ميت حد يخرجني من هنا لاقيتني مش عارف اتكلم لساني وقف واتعقد وادركت اني هموت فاقولت يارب يارب انجدني يارب وصحيت من النوم ادركت اني كنت بحلم بس مش اي حلم وصلت اسكندريه واول ما شفت والدي اترميت في حضنه وقعدت اعيط وفضل يهديني وقالي مالك احكيلي بدات احكي لوالدي كل حاجه من اول ما كريم قرر ان احنا نروح للدجال وروحت مع والدي البيت وشغل قرآن حسيت براحه محسيتهاش من زمان ونمت لاني كنت تعبان وتاني يوم لاقيت والدي داخل وداخل وراه راجل تاني طيب الوجه له دقن كثيفة حسيت براحه اول لما شوفته لاقيت ابويا بيقولي الشيخ محمد امام المسجد حكيتله جزء وهو قالي انه عايز يشوفك حكيتله كل حاجه طلب من ابويا انه يجيب طبق كبير وحلة مايه يغليها علي النار وطلب من ابويا بعد ما المايه تغلي يجيبها وقعد الشيخ يقرأ علي المياه المغليه آيات من القرآن وطلب مني حاجه غريبه طلب مني اني اقلع هدومي كلها الا الملابس الداخليه وقالي اقف في الطبق الكبير وعمل حاجه غريبه لاقيته بيغسلني كان كل اللي في دماغي ان المايه المغليه هتسلخ جلدي من على جسمي لكن الغريب ان المايه كانت .
ساقعة وفضل يقرأ آيات معينه من القرآن وبعد ما خلص طلب مني اني اقرب من ربنا ولما سألته عن الراجل دا قالي يابني من اللي انت حكيته ده مش انسان ده كان شيطان متجسد على هيئة إنسان وكان بيضحك على الناس عشان يكفره بربنا سبحانه وتعالى ولما انت مرضيتش تستجيب له قرر يعاقبك وعاقبك في صاحبك وكان هيعاقبك في كل اللي حواليك واللي بتحبهم لكن يبني اهم حاجه القرب من ربنا هو النجاة الحقيقة انا حصنتك لكن هو اقوى مني فا ارجع لربك يبني وادعي انه ميجلكش تانى ومن يومها وانا احسن وبتحسن الحمدلله زي ما قالي الشيخ فضلت فترة قريب من ربنا بصلى وبقول الاذكار على طول ومش بشوف اي حاجه تضرني ولكن مع انشغالي اخذتني الدنيا وبدأت أقصر وبعدت عن طريق ربنا ومبقتش اصلي زي الاول ولا بقول اذكار و ابتديت اشوف الدجال دا في احلامي بيتوعدني انه راجعلي تاني....
.وفي يوم لاقيت البلد متجمعة في مكان فقررت اني اشوف في ايه لاقيت راجل بيرحب بيا وبيقولى اتفضل مولانا مستنيك من بدري دخلت وكنت مسلوب الاراده لاقيت ابشع كائن مكنتش اتمنى اني اشوفه تاني وقالي مش قولتلك ان احنا هنتقابل تاني انت فاكر انك هربت مني ونفس الضحكه الشيطانية المرعبة والمفزعة وقالي انت دلوقتي تحت سيطرتي ومش هسيبك انت من النهارده عبد ليا وخادم مطيع والا والدك ووالدتك هيكون مصيرهم نفس مصير صاحبك........
ودلوقتي انا عندي 25سنه ودي مذكراتي اتمني انك تنشرها عشان الناس تعرف حكايتي تعرف إن مش كل السكك اللي ياخدك الفضول انك تدخلها بتبقى نهايتها خير ممكن تكون آخرتها شر وتكون دخلت برجلك بداية (سكه الموت)
تمت.