قصة هبه و الضيف المجهول بقلم محمد مهني
خرجت من الكلية بعد ما خلصت اخر ماده ليا في الامتحانات ووقفت ف موقف الميكروباصات.. وانا واقفه لاحظت أن ف شاب باصص لي اوي ومركز معايا؟ قلت عادي بتحصل كتير واكيد ده شاب من الشباب اللي بتعاكس.. ولو اديته حتى نظره ده هيخليه يتمادى اكتر.. فأنا ما اهتمتش وبصيت قدامي..
المهم انا ركبت الميكروباص ولقيت نفس الشاب طلع ركب الميكروباص معايا.. وقعد كمان جنبي! ايه البجاحة دي؟! وهو قاعدة حاسه انه متوتر جدا.. يبص عليا شوية وبعدها يبص قدامه.. وكمان لاحظت فيه أنه عمال يحرك شفايفه وكأنه بيتمتم بحاجة! فضل ع كده لحد ما انا نزلت من الميكروباص ..
لما قمت عشان انزل اتفاجئت ان الشاب السخيف ده نزل برضه ورايا! الله هو عايز ايه ده؟
- انسه هبه؟
ايه ده هو كمان عارف اسمي! بدات اتوتر واخاف.. هو نده عليا يعني هو يعرفني وانا اصلا اول مره اشوفه! ماهتمتش وكملت مش بس سرعة خطوتي شوية عشان مايلحقنيش.. وكنت عارفه انه ماشي ورايا..
- يا انسه هبه انا آسف جدا لازم اتكلم معاكي.. انا مش بعاكس ع فكرة بس انا جاي لمصلحتك انتي؟
= افندم هو انت اصلا عرفت اسمي ازاي؟ بعد اذنك امشي احسن الم الناس عليك!
- مهما تعملي انا لازم اتكلم معاكي.. انتي ف خطر كبير اوي ولازم أحذرك منه؟
= خطر؟ واحذرك منه؟ انت بتقول ايه يا مجنون انت
- اعتبريني واحد مجنون .. بس انتي هتموتي لو كملتي مع حسين خطيبك! ايوة حسين ده هيقتلك يوم فرحك اللي هو بظبط يوم 22/8/2022 في فندق (...) تحبي اوريكي حاجة تثبت لك اني مش بكذب عليكي وانك فعلا هتموتي ؟
انا حرفيا اترعبت من كلامه! انا فعلا فرحي هيكون ف التاريخ اللي قال عليه وحسين حاجز لي ف نفس الفندق اللي هو قال عليه!..
- اتفضل اثبت لي؟
= انتي اولا بيتك في شارع (...) عمارة رقم 9 الدور التالت.. قاعده مع مامتك واخوكي ( يوسف) الصغير اللي عنده 12 سنة.. وباباكي ميت من سنتين! ممكن تبصي ع الجريدة دي!
فتحت الجريدة عشان الاقي اللي صدمني! كانت صورتي وانا ع السرير بفستان الفرح وحرفيا شكلي مفزع جدا! الفستان مليان دم! والسرير كمان كل حاجة دم! وكان مكتوب فوق الصورة:
" الجريمة الغامضة و القاتل مجهول مصرع شابة يوم زفافها!"
كان مكتوب تفاصيل الحادثة دي.. اللي المفروض اكون انا بعد الفرح اهلي جولي يوم الصباحية عشان يتفاجئه بأن تحت العمارة ف عربيات شرطه كتير وإسعاف! الشرطة منعتها تدخل بس امي وخالاتي طلعو بالعافية بعد ما قالو بنتي فوق ف الدور التالت! ولما طلعو شافوا المنظر اللي صدمهم! انا كنت مرمية ع السرير وغرقانه دم وصدري مفتوحة ومتاخد منه القلب !...
انا والله كنت واقفه ومش عارفه اقول ايه؟ مصدومه من اللي شيفاه.. الخبر كان بتاريخ ( 23/8/2022) يعني تاني يوم فرحي! يوم الصباحيه بتاعتي! التاريخ ده اصلا لسه موصلناش ليه!..
- ممكن بقى تفهمني انت مين؟ جبت الجريدة دي ازاي؟ انا هتجنن لو مقولتش انت مين و ايه حكايتك بظبظ!
= مش هقدر اقولك انا مين! كل اللي اقدر اقوله ليكي انك خدي بالك من نفسك اوي وماتأمنيش لخطيبك حسين! حسين مش زي ما انتي فاكره... حسين ده شيطان ومش من العالم بتاعك اصلا! ولا أنا من العالم بتاعك... انا جايلك مخصوص عشان اقولك الكلمتين دول.. مجيتي ليكي هتكلفني كتير اوي! انتي مش هتشوفيني تاني..
هتصدقونى لو قلت لكم ان بعد ما قال آخر جملة ( مش هتشوفيني تاني) ابص حواليا ملقاهوش اصلا واقف!انا لقيت نفسي واقفه وناس كتير ملمومة حولين مني! رجالة وستات.. بيبصوا عليا ب استغراب! ولا كأني واحدة مجنونة ماشيه تشد ف شعرها ف الشارع!....
...
الجزء التاني
↚
ملك الجن العظيم أصلي لك.. ادعوك بالحضور...
بسم الأحمر ابن مُرة أحضر الآن وسنقدم لك القربان..
دم انسية طاهر.. قلب الخلود.. القربان لك! قدم لي المعرفه.. اقدم لك الخلود.. قدم لي علوم الماضي والمستقبل.. اقدم لك ولائي وطاعتي الى الابد!
فضل يردد الكلام ده كتير اوي عشان بعدها باب الحمام يتفتح مره وحده وبعنف! بعدها شوفت ...... مكنش حسين خالص كان شيطان طالع من الحمام لابس نفس لبس حسين لكن وشه اسود اوي!... أول ما شفت منظره مقدرتش اتكلم ولا انطق بجملة واحدة! رجلي ثبتت ع الارض وبعدها ماحستش بنفسي غير وانا بقع من طولي!..
فتحت عيني لقيت نفسي في الاوضة وع السرير.. عشان بعدها بشوية حسين الاقيه داخل عليا الاوضة.. حسين مكنش داخل عليا الاوضة لوحده؟! حسين كان معاه اغرب حاجة شفتها.. اول ما شفت المنظر ده اترميت ع الأرض! بعدها محستش بنفسي غير وانا بفتح عيني و اشوف اكتر حاجة فزعتني نايمة جنبي ...
اللي كان نايم ع السرير جنبي... كانت انا! .. ايوه انا بنفس شكلي ونفس فستان الفرح اللي لابساه! كأنها توأمي! والأغرب من ده كان حسين واقف ومعاه كائن شكله مفزع اوي! كان قزم أسود ورأسه رأس قطه وجسمه زي جسمنا.. بس كان مختلف عننا ان راسه راس قطه! وكان قصير اوي بس شكله وحش جدا صرخت اول ما شوفته!..
حسين كان واقف جنب الكائن.. ومكنش شكله مختلف.. بالعكس كان هو حسين وبالبدلة السودة كمان.. أما اللي كانت نايمة جنبي على السرير اللي هي نسخة مني..بطنها ولحد صدها كان مفتوحين بالطول! حسين راح عليها وراح دخل ايده ف صدرها ونزع القلب واداه للقزم! القزم اخد القلب وقربه لبوقه وفضل يشم فيه جامد وبعدها عمل حاجة غريبة اوي! فضل يردد كلام مش عارفه منه ولا حرف.. كلام غريب جدا وكان رافع القلب ده بايده الاتنين لفوق! وفضل يركع وهو عمال يردد الكلام ده وراح أكل القلب! بمجرد ما أكل القلب بقه انسان زينا بس المختلف فيه عينيه الاتنين! كان عين منهم فيها زي الحبايه حاجة مدوره زي العنبه وبارزه من عينه وعينه التانية سليمه! قرب لحسين وراح نطق جملة واحدة بس وهي ( الالتحام) اول ما قالها لقيت اغرب حاجة حصلت! حسين والكائن الغريب ده حصل ما بينهم التحام جسدي يعني دخلو ف بعض! انا مكنتش فاهمة اي حاجة! ايه اللي بيحصل ده؟ حاسه اني جوه فيلم رعب.. حسين بعدها بشوية اتكلم وقال اغرب كلام ممكن تسمعه:
- انتي طبعا مش فاهمة اي حاجة من اللي بتحصل؟ وعايزه تعرفي انا مين بظبط.. انا جوزك حسين ولا مين بظبط؟ بصي يا هبه الموضوع بيبدأ من زمان اوى من أيام قابيل وهابيل.. قابيل كان حاقد على أخوه هابيل اللي اخد حبيبته؟! قابيل قتل اخوه ( هابيل) عشان ياخد حبيبته منه! هو كان ظلم ل قابيل اشمعنى هابيل يتجوز واحده حلوه.. وانا اتجوز واحده مشوها؟ انا قتلته... بس من بعدها بقيت ملعون في الأرض.. محدش حبني خالص.. أهل قومي كلهم تجنبوا التعامل معايا.. انا سبتهم ومشيت مكان بعيد اوي.. مكان مفيش بني ادم هيقدر يوصله.. فضلت ماشي كتير الف مدن كتير لحد ما رحت لجزيرة في البحر وشفت فيها حاجة عجيبة جدا! شوفت عرش كبير محطوط ع الماء وكان قاعد كائن بقرنين كبار ف نص راسه وجسمه كان لونه احمر وليه ديل طويل جدا! وحوالين اقزام وكائنات تانين شكلها اغرب اللي براس قط وجسم بني آدم وفي منهم الكلاب الضخمة وفي منهم التعابين والحيات! الكائن اللي قاعد ع العرش لقيته بيقولي:
- اقترب يا قابيل... اقترب لنتحد وننتقم ممن ظلمك
قربت له وصعدت للعرش وقعدت جنب منه.. عرفت ان ده عزازيل المطرود من جنة الله! قالي مصيرنا واحد.. أنت مطرود من الأرض وانا مطرود من جنة الخلد... انت ظلمك بني ادم اخاك ( هابيل) وأنا ظلمني أبو البشر ( آدم) هدفي اغوائهم والانتقام منهم وانت ايضا هدفك الانتقام! نتحد مع بعضنا البعض لنصل إلى لهدفنا وهو اغواء بني ادم والسيطرة مرة أخرى على الأرض ومن عليها!...
وافقت اننا نتحد.. اتحدنا وكتبنا العهد.. انا هكون خالد في الأرض ألفها واغوي بني آدم... جولاتي في الأرض كانت كتير جدا... في رحلتي الطويلة وصلت لأحد الكهوف.. دخلتها ووصلتني لمكان عجيب جدا! وصلت لجنة! مدينة كاملة تحت الأرض وعرفت ان اسمها مدينة ( اغارثا) كانت أقوامها مخلوقات عجيبه.. ضخام الجسم رؤوسهم مختلفة.. منهم اللي براس كلب ومنهم اللي براس قط! منهم الأقزام! اتعرفت عليهم وعرفت انهم من قبيلة ( ياغوغ) اتجوزت منهم وعملت علاقات معاهم وبقيت من سكان المدينة... سنين كتير عشتها معاهم.. خلفت طفل وسميته (ماغوغ) مكنش بيشوف وهو طفل لكنه لما بقي عنده 10 سنين فجأة لقيته جايلي وبيقولي انه شاف رؤيا ولما صحي من النوم بقى بيشوف! وقالي كمان انه لما صحي من النوم كان بيسمع صوت هاتف غريب جاي من مكان مجهول؟ سألته ايه الهاتف ده؟ رد وقال ان ف هاتف بيقولي اروح لبحر الظلمات؟!..
بحر الظلمات هو مكان عرش ( عزازيل)! هو عايز ايه من ابني ماغوغ ايه؟ اكيد في مهمة هيديها لماغوغ؟
الحلقة الجاية هتكون عن رحلة ( ماغوغ) في بحر الظلمات وهنعرف عزازيل عايز منه ايه؟!