خطوات نقل ملكية سيارة في المرور
* اول حاجة لازم يكون معاك عقد مسجل فى الشهر العقارى , يا اما صاحب العربية باعهالك بعقد , او عملك توكيل و انت بعت لنفسك , لو صاحب العربية باعلك بعقد , ساعتها متمضيش فى خانة المشترى و سيبها فاضية علشان لو مضيت هيكون العقد مدته 30 يوم فقط تعمل نقل ملكية فى المرور فى خلالهم , و لو ملحقتش بيكون العقد لاغى , لو هتبيع لنفسك , لازم تمضى فى خانة المشترى و تعمل نقل الملكية فى خلال 30 يوم .
* تانى حاجة عملية نقل الملكية من مرور العربية الحالى للمرور التابع له رخصتك.
* بتروح المرور الجديد (بتاعك) - شباك نقل الملكية , هيطلب منك تشترى ملف وورق فحص وورق تجديد بعدد السنين اللى انت عايزها و شوية نماذج من الخزنة , وترجعله , هيقولك روح ارفع البصمة.
* هتروح مكان الفحص و تخلى الفنى يرفعلك بصمة الموتور و الشاسيه , بعد كده يكتب المهندس على ظهر الورقة طلب مطابقة بصمة من المرور القديم , اووووعى تنسى تختم البصمة ختم النسر من رئيس الوحدة.
* هترجع الشباك يقولك روح اعمل مطابقة بصمة من مرورك القديم.
* هتروح مرورك القديم اللى فيه ملف العربية حاليا , و تروح شباك مطابقة البصمة , تطابق البصمة اللى معاك بالبصمة الموجودة فى ملف العربية , و اوووووعى تنسى تانى تختم المطابقة بختم النسر من رئيس الوحدة.
* و انت فى المرور القديم , اطلع على نيابة المرور , طلع شهادة مخالفات (براءة زمة) , و لو العربية عليها حاجة , ادفعها و هات شهادة مخالفات نضيفة.
* لو رخصتك منتهية طلع شهادة بيانات من المرور القديم بالمرة (لازم).
* صور بطاقتك و رخصة العربية و العقد و اطلع على المرور الجديد.
* هتدخل على شباك نقل الملكية , هيتمم على الورق و الاختام و يقولك روح افحص , تكون شايل الفيميه و الستائر و الزينون و مظبط الانوار و مفيش خبطات و تمام , و موتورك مبيدخنش , مهندس الفحص هيمضيلك و يختملك , تكشف على الطفاية و انت و حظك , لو انتهت هتشترى واحدة و تختم ورقة الطفاية , و لو المرور عندك بيأكد على المثلث و شنطة الاسعافات هتشتريهم بالمرة.
* هترجع الشباك هيجهزلك وصل الفلوس.
- ضريبة التجديد
- غرامة لو رخصة منتهية
- تأمين لوحات لو أول مرة تركب نمر جديدة (120 جنيه تقريبا)
- ضريبة رفاهية عن كل عربية تانية باسمك غير دى (120 فى السنة)
* هتدفع , و لو هتركب نمر جديدة او هتنقل من محافظة لأخرى , يبقى هتسلم النمر اللى معاك و تاخد ورقة انك سلمتها
* هترجع الشباك تديله وصل الفلوس و ايصال تسليم النمر , هيقولك استنى لما ننده عليك تستلم الرخصة
* هتستلم الرخصة و بيها تروح تستلم النمر الجديدة و تركبها smile رمز تعبيري
* فى الحقيقة مش هتكون رخصة اوى , هتكون حاجة اسمها تصريح (شبه الرخصة بالظبط) , 3 شهور او 6 شهور انت و حظك , لحين ما ييجى ملف العربية من مرورك القديم للجديد , بعد ما التصريح يخلص بتروح المرور , لو الملف جه هيدوك رخصة لو مجاش هيدوك تصريح تانى
* و مبروك العربية الجديدة .