100 سؤال وجواب حول برنامج تكافل وكرامة
أسئلة واجابات حول برنامج تكافل وكرامة
معنى برنامج "تكافل وكرامة" وشروط ومستندات التقديم
1. هو ايه الفرق بين معاش "تكافل" ومعاش "كرامة"؟
تكافل هو معاش أسري بيستهدف الأسر اللي مستواها المعيشي ضعيف جداً ودخلها قليل وماعندهاش أملاك أو حيازات على شرط أن الأسرة دي تكون عندها أطفال من سن (0-18 سنة) والأطفال اللي فوق 6 سنين مُسجلين في التعليم ومنتظمين في الحضور بنسبة 80% على الأقل. أما كرامة فهو استحقاق فردي بيستهدف الأفراد المُسنين اللي عندهم 65 سنة أو أكثر وبيستهدف كمان الأشخاص اللي عندهم اعاقة أكتر من 50% بشهادة من القوميسيون الطبي.
2. اقدم فين على معاش "تكافل وكرامة"؟
في الوحدة الاجتماعية اللي في منطقة السكن الخاصة بكم.
3. ايه هي شروط التقديم لتكافل؟
1. تكون الأسرة عندها أطفال (على الأقل طفل واحد) من سن الميلاد وحتى سن 18 سنة. الأطفال من سن 6 سنوات لازم تتسجل في المدارس وتحضر بانتظام بنسبة ماتقلش عن 80% من أيام المدرسة.
2. لازم تكون الأسرة اللي بتقدم أصلاً مستواها المعيشي متواضع جداً يعني تكون فقيرة أوي.. يعني مايكونش عند الأسرة أراضي أكتر من نصف فدان ومايكونش عندها أملاك كبيرة زي حيازات.. سيارات.. جرارات.. بيوت..
3. لازم تكون الأسرة مابتاخدش معاش ضماني أو معاش كبير من جميعات أهلية.. ومايكونش رب الأسرة أو زوجته بياخدوا معاش تأميني أو معاش مُحول أكتر من 325 جنيه.
4. ايه هي شروط التقديم لبرنامج كرامة؟
1. أن يكون الفرد ذو الاعاقة عنده عجز يمنعه عن العمل بشكل منتظم مايكفيش مصاريف معيشته أو علاجه، على أن تكون نسبة الاعاقة أكثر من 50% بشهادة معتمدة من القوميسيون الطبي.
2. المريض بمرض مُستعصي يعجزه عن العمل، ويثبت درجة المرض من القوميسيون الطبي.
3. لازم يكون الفرد والأسرة اللي هو منها مستواها المعيشي متواضع.. يعني مايكونش عند الأسرة أراضي أكتر من نصف فدان ومايكونش عندها أملاك كبيرة زي سيارات أو بيوت تانية أو جرارات.. الخ.
4. لازم يكون الفرد مابياخدش معاش اعاقة أو عجز من الضمان الاجتماعي ولا بياخد معاش تأميني أو معاش مُحول أكتر من 325 جنيه.
5. هو التقديم للحصول على معاش تكافل وكرامة بيبقى امتى؟ هل فيه وقت مُعين وبعدين التقديم يقفل؟
البرنامج بيدأ الأول في المراكز الأفقر وبعدين يتنقل بالتدريج للمراكز الأقل فقراً في المحافظات المختلفة. علشان كده البرنامج بدأ في الوجه القبلي قبل الوجه البحري لأن الصعيد أفقر بكتير. في حالة انه فتح في أي مركز خلاص مش هايقفل أبداً يعني ممكن يتم التقديم في أي وقت. دايماً اسألوا في الوحدة اذا كان بدأ في المركز بتاعكوا ولا لسه.
6. هو التقديم على برنامج تكافل وكرامة بفلوس. يعني لازم ندفع أي مبالغ عند التسجيل؟
التقديم على برنامج تكافل وكرامة مجاناً ولا يتطلب دفع أي مبالغ. لو أي حد طلب منكم مبالغ علشان التسجيل.. رجاء الابلاغ عن اسم الموظف الذي طلب منكم فلوس فوراً في الوحدة الاجتماعية.
7. هو المفروض مين الشخص اللي يقدم على معاش تكافل وكرامة؟
بالنسبة لبرنامج تكافل.. المفروض اللي يقدم الزوجة أم الأولاد ويكون معاها شهادة الزواج وشهادات ميلاد الأطفال.
أما في برنامج كرامة.. اللي بيقدم اما الشخص نفسه لو وضعه يسمح أو ولي أمره على أن يحضر صاحب الاعاقة على الأقل أول مرة ساعة التقديم.
8. هي ايه الأوراق اللي المفروض تكون معايا لما أقدم على تكافل أو كرامة؟
في حالة تكافل المفروض يتقدم 1) بطاقة الرقم القومي السارية للزوج وللزوجة 2) وثيقة الزواج أو الطلاق أو الوفاه 3) شهادات ميلاد الأطفال 4) شهادات من المدارس اللي متسجل فيهم الأطفال تشهد أن الأطفال منتظمين في الدراسة 5) ثلاث وصلات كهرباء 6) شهادة من الوحدة الزراعية تشهد بحجم أي حيازة زراعية تملكها الأسرة أو التي لا تملك 7) شهادة من مكتب التأمينات تشهد بوضع مقدم الطلب وزوجها. 😎 رقم بطاقة التموين لو المتقدم عنده بطاقة تموين.
في حالة كرامة.. بيتقدم نفس الأوراق المكتوبة فوق بالاضافة لشهادة طبية حديثة تثبت نوع ودرجة الاعاقة بيتم استخراجها من القوميسيون الطبي.
9. هو لو تكافل وكرامه ممكن يتصرف للشباب المتزوج برضه ولا للكبار فقط؟
• برنامج تكافل لأي أسرة عندها أولاد ومافيش شرط للسن بس يكون مستواها المعيشي ضعيف جداً. يعني حتى لو سن الزوج أو الزوجة صغير ممكن يستحقوا لو انطبقت عليهم الشروط.. بس الوزارة ممكن تعرض فرص عمل على الشباب اللي سنه صغير عشان يُفضل أنه يشتغل مش ياخد معاش.
• أما برنامج كرامة للمسنين اللي عندهم 65 سنة فأكثر أو لذوي الاعاقة في أي سن.. المهم يكون عنده الاعاقة اكتر من 50% وحالته المعيشية فعلاً فقيرة بتأثر على قدرته انه يجيب علاج أو يعيش عيشة كريمة.
10. هو معاش تكافل وكرامة مدى الحياة؟
• بالنسبة لمعاش تكافل لو الأسرة حالها ماتغيرش المعاش بيستمر لغاية ما الأطفال يخلصوا تعليمهم يعني لما يبقى عندهم 18 سنة. وبيتم مراجعته كل 3 سنين وبيتم دراسة وضع الأسرة من جديد. في أثناء الثلاث سنين ممكن يحص جديد في حياة الأسرة يحسن وضعها المادي وكمان ممكن الوزارة تكون ساعدتها في زيادة مستوى الدخل عن طريق فرصة عمل أو مشروع صغير..
• أما بالنسبة لمعاش كرامة فاذا كان بياخده مُسن 65 فأكثر فهو مدى الحياة. اما اذا كان بياخده عنده اعاقة ففي أنواع من الاعاقات بتاخده مدى الحياة وفي أنواع اعاقات مابتمعش صاحبها يشتغل ده بيتم مراجعته دورياً علشان الوزارة تشوف تجدده له المعاش ولا توقفه.
11. الناس اللي بتقدم على تكافل وكرامة بتسجل في الوحدة ومافيش حد شايف تفاصيل بيوتهم وعيشتهم.. يا ترى ممكن الوزارة تعرف الحقيقة ازاي؟
بعد التسجيل.. فيه زيارات تحقق بتتم على عينة من الأسر اللي سجلت وبتتأكد ان البيانات اللي مكتوبة في الاستمارات بالفعل حقيقية. لو البيانات حقيقية بنكمل الاجراءات ولو مش حقيقية بيتلغي اسم الأسرة وبيتحط عليها علامة انها كذبت في بياناتها. أما لو الأسرة صرفت وبعدين الوزارة اكتشفت ده بيحمل الأسرة اللي صرفت المسئولية القانونية عن الادلاء ببيانات غير صحيحة.
12. هو لو الأسرة بلغت ببيانات وهي بتسجل لتكافل وكرامة اتضح ان بعض هذه البيانات مش حقيقي.. ايه اللي ممكن يحصل؟
الأسرة أو الفرد المستفيد من معاش تكافل أو كرامة بيوقع على ورقة عند الصرف وبيبصم عليها كمان. والورقة دي بتحمله مسئولية ان الكلام اللي ادلى بيه في الاستمارة كله صح. في حالة وجود بيانات مش صحيحة تجعله مستفيد من المعاش وهو غير مستحق فعلياً بيتوقف المعاش فوراً وبيتبعت له انذار قانوني بدفع المبالغ اللي استردها دون وجه حق أو التحويل لقضية يتحمل فيها هو المسئولية.
13. انا متزوج وحالتي المادية صعبة وليس لدي اطفال فهل استحق معاش تكافل او لا؟
شروط التقديم لا تنطبق على حضرتك لان هذا البرنامج مخصص للأسر التى لديها أطفال من عمر الميلاد وحتى سن 18 سنة. ممكن تتقدم للوحدة علشان تحولك على مساعدات مالية أخرى. ممكن تساعدك تلاقي فرصة عمل.
14. انا لدي حيازة زراعية صغيرة... ينفع اقدم في تكافل وكرامة؟
ينفع تقدم لو كانت الحيازة أقل من نصف فدان.. أما اذا كنت تتقبل أو تترفض ماحدش يعرف لأن ده بيتم بناءً على دراسة مستوى وده بيتحسب بطرق الوزارة بس اللي تعرفها.
15. احنا عندنا بيت ملك أنا واخواتي بس والله فقير ومش عارف اكفي العيال. ممكن اقدم على تكافل؟
رجاء التفضل للتقديم في الوحدة ويكون معاك سند ملكية البيت علشان يتحسب نصيبك فيه.. ويتحسب مستوى المعيشة على كل حاجة علشان تتحدد فعلاً نسبة الفقر ويمكن تستحق ويمكن لأ.
16. طيب في حالة الطلاق ومابين الزوجين أطفال... مين اللي بيقدم على تكافل؟
في حالة الطلاق.. اللي بيقدم هو اللي الأطفال في حضانته سواء الأم أو الأب. لازم بس يكون معاه الأوراق الرسمية اللي بتثبت الطلاق.
17. وفي حالة وفاة الزوجة.. الزوج يعمل ايه لو عايز يقدم على تكافل؟
في حالة وفاة الزوجة واذا كانوا الأطفال في حضانة الأب يبقى لازم الأب هو اللي يقدم باسمه ولازم يكون معاه شهادة الوفاة بالاضافة للأوراق المطلوبة أصلاً.
18. واذا كانت بطاقتي أو بطاقة زوجتى غير ساريه فهل هذا يمنع التقديم على معاش تكافل وكرامة؟
لابد من تجديد بطاقة الزوجة على نفس محل اقامة الزوج.. من غير مستندات مميكنة وسارية ماينفعش التقديم لمعاش تكافل وكارمة أصلاً.
19. أنا مقدمه على بطاقة رقم قومي مميكنه بس لسه ماستلمتهاش ومعايا الوصل اللي استلمها بيه. هل ينفع اقدم لبرنامج تكافل وكرامة بالوصل؟
لا يمكن التقديم بوصل البطاقة الرقم القومي ولكن جميع المستندات لازم تكون مُستخرجة بالفعل وهم بيصوروا كل المستندات دي ساعة التقديم. رجاء الانتظار لحين استخراج بطاقة الرقم القومي بالفعل والتقديم مستمر على طول.
20. لو عندي أطفال كتير برضه لازم أقول بياناتهم في التسجيل للحصول على معاش تكافل؟ مش انتوا بتصرفوا لثلاث أطفال بس؟
حتى لو بنصرف لثلاثة بس وشرط انهم يكونوا منتظمين في المدرسة.. لازم تذكروا بيانات الأطفال كلها لأن عدد الولاد مهم لما مستوى معيشة الاسرة بيتحسب عشان يتحدد هي تستحق أم انها لا تستحق.
21. في حالة وجود أيتام.. هل لهم الحق في التقديم على تكافل؟ ومين اللي مطلوب انه يقدم؟
أيوه في حالة وجود أيتام من سن الميلاد لحد سن 18 سنة.. ممكن يقدم اللي بيعولهم من الدرجة الأولى يعني الجد أو الجدة.. العم أو العمة.. الخال أو الخالة.
وبيكون لهم الحق في التقديم لتكافل. ولازم الأسرة تقدم نفس الورق المطلوب زيهم زي أي أسرة بتقدم لها ولولادها.
22. أسرة مستحقة لبرنامج تكافل بس عندها طفل ذو اعاقة.. هل يمكن اقدم له على كرامة؟
ممكن الأسرة الواحدة تجمع بين "تكافل" وكمان تاخد كرامة اذا كان عندها فرد "ذوي اعاقة" ونسبة اعاقته تكون أكتر من 50% أو اذا كان عندها فرد عمره 65 سنة أو اكتر... باختصار ممكن الأسرة تاخد تكافل ولغاية 3 كرامة لو عندها ذوي اعاقة أو مسنين.
23. هو احنا بنطلع شهادة القوميسيون الطبي منين؟ وايه الأوراق اللي بناخدها معانا علشان نطلعها؟
شهادات القوميسيون الطبي الاخصائية الاجتماعية في الوحدة الاجتماعية بتاخد بياناتك وبيجي لك مكالمة تقول لك ميعاد الكشف. لما يجي ميعاد الكشف.. لازم اللي عنده اعاقة يروح بنفسه على الأقل مرة في الأول علشان يتكشف عليه وتتحدد درجة اعاقته. كمان لازم يكون موجود معاه الآتي شهادة الميلاد 2) بطاقة الرقم القومي اذا كان سنه فوق 16 سنة 3) شهادة فيها كشف عليه من المستشفى العادية أو العيادة ويكون فيها أي تحاليل أو أشعة تدل على حالته.
24. هو استخراج شهادات القوميسيون الطبي بفلوس؟
استخراج الشهادة هايكلف المواطن من 10 الى 20 جنيه.. ده بالاضافة الى تكاليف الكشف والتحاليل أو الأشعة.
25. طيب لو مش معايا فلوس علشان اعمل الكشف بالأشعة أو التحاليل وكمان تكلفة استخراج شهادة القوميسيون.. اعمل ايه؟
بلغي رئيس الوحدة وهم هايدرسوا حالة أسرة صاحب الاعاقة وهايساعدوه من خلال جمعيات أهلية وخيرية موجودة وبلغوا ان الأسرة معهاش تكشف على الشخص اللي عنده اعاقة. من غير شهادة القوميسيون مش هاينفع التقديم على معاش كرامة.
26. أخويا عايش مع أمي وأبويا... وقدم على معاش كرامة واترفض علشان درجة اعاقته أقل من 50%.. هل هو اترفض علشان كده والا علشان هو قاعد مع أمي وأبويا؟
اترفض مبدئياً علشان درجة اعاقته اقل من 50% ودي درجة تسمح لصاحبها بالعمل. يعني هو يقدر يشتغل مش بالضرورة كل فرد عنده اعاقة بسيطة يقعد وياخد معاش الا لو حالته الصحية ماتسمحش.
27. الشخص للي عنده اعاقة واترفض علشان نسبة اعاقته أقل من 50% ومش هاينفع ياخد معاش كرامة.. يعمل ايه علشان يشتغل؟
يزور مكتب التأهيل التابع لوزارة التضامن الاجتماعي ويشرح لهم حالته وياخد معاه شهادة القوميسيون.. وهم هايعملوا له قياس قدرات ويطلعوا له شهادة تأهيل ويعطوا له الخدمات المناسبة ويعرضوا عليه فرصة تدربب أو تأهيل أو عمل.
28. هل لازم اللي ياخد معاش تكافل وكرامة يكون مابيشتغلش؟
لأ ممكن اللي يقدم يكون بيشتغل بس مش شغل قطاع حكومي أو عام.. طريقة حساب الأسرة مستحقة أم لا بيتم بناءً عىل دراسة حالة الأسرة من أكتر من ناحية.. سن الزوجين وعدد أفراد الأسرة ومدى وجود عمل أو لأ ومصدر موارد المعيشة بتاعتها ومكان السكن ومواصفات البيت واذا كان عندها أملاك ولا لأ ومستوى تعليم الأبوين وواذا كانت الأسرة بتقبض معاش من حتة تانية... وحاجات كتير تانية. بالعكس الوزارة بتشجع الناس جداً على الشغل.
29. انا زوجى بيشتغل في الخارج ومعايا اولاد ينفع اقدم لمعاش لتكافل؟
سفر الزوج أو الزوجة للعمل بالخارج يمنع الأسرة من الحصول على المعاش حتى لو الأسرة قدمت. وده لأن السفر معناه أن في موارد مالية بتتحول للأسرة أو أن الأسرة الى حد ما مستواها المعيشي معقول والبرنامج بيستهدف الأسر الفقيرة مش اللي حالها متوسط او غنية.
30. مع ان برنامج تكافل وكرامة فتح في المحافظة بتاعتي.. كل ما آجي اقدم في المركز بتاعي يقولوا لي لسة المرحلة بتاعة مركزكم ماجتش؟ هو ممكن مركزنا مايجيش في الدور؟
البرنامج مستمر على طول وهايدخل كل المحافظات والمراكز.. بس بيدخل المناطق الفقيرة أوي الأول وبعدين الأقل فقر لغاية ما يفتح في الجمهورية كلها ومافيش مراكز مش هاتتغطى.
كمان هايبقى في برامج تانية بتساعد في توفير فرص عمل عشان اللي يقدر يشتغل أحسن له ولأسرته.
31. لو قدمت مرة ثانية على معاش تكافل بعد زوال سبب رفض طلبي هل سيقبل الجهاز بيناتى؟
لو حصل التقديم والرفض ممكن الأسرة تقدم تظلم في الادارة أو المديرية أو حتى الوزارة ويكون معاك بطاقة الرقم القومي بتاعتك. أما لو نفس الأسرة هاتقدم من جديد وكأنها ماقدمتش قبل كده.. هيبان في تسجيل البيانات ومش هايتم قبول الاستمارة.
32. هل يمكن تسجيل الاستمارات الخاصة بتكافل وكرامة فى جهاز اخر غير الايباد ام لا؟
المواطن مش هو اللي بيسجل البيانات.. يا اما الاخصائي الاجتماعي أو الباحث. الاستمارات بيتم تسجيلها على الآيباد... ولكن هناك مناطق ممكن يتم تسجيلها على الورق وبعدين ندخل البيانات على الآيباد برضه.
33. في ناس بتقول ان في جمعيات أهلية هاتسجل تكافل وكرامة علشان تساعد الحكومة لأن الضغط كبير على الحكومة. هل ده صحيح؟
الجمعيات الأهلية الشريكة ممكن تساعد الوزارة في بعض حالات التحقق لكن مش في التسجيل الأولي.. وفي حالة مساعدة الوزارة لازم تكون الجمعية موقعة مع الوزارة اتفاقية علشان تساعد في حالات التحقق على الأسر المستفيدة والتأكد من ان البيانات اللي الأسرة بتقولها صحيحة فعلاً.
34. في نواب برلمان بيلموا أسماء ناس علشان يجيبوا لهم فلوس من برنامج تكافل وكرامة؟
في بعض نواب بيتعاونوا مع الوزارة ولكن مش ممكن يجيبوا فلوس للأسر من البرنامج. هم مشكورين ممكن يدلونا على الأسر الفقيرة أو اللي محتاجة مساعدة واحنا نروح نسجلها وتدخل زيها زي أي أسرة في اختبارات معادلة احصائية. مافيش حد أصلاً ممكن يقول الأسرة دي تاخد أو لأ الا بحسابات الاستمارة بتاعة الأسرة نفسها.
35. انا من سوهاج طالب بالفرقة الرابعه بالجامعة متزوج ولدى ابنه تبلغ ٦ شهور من العمر أسكن مع والدى بالمنزل لحالة فقر شديدة.. هل ينفع أقدم في برنامج تكافل؟
تنطبق عليك شروط التقديم . ولكن شروط الاستحقاق لها اجراءات ومعايير بناءً على حساب مستوى معيشة الأسرة وده بتحسب بطرق الوزارة بس اللي تعرفها. الوزارة بتابع حالتك لأنك شاب صغير وهي بتساعد الشباب لغاية مايلاقوا فرصة عمل في أقرب وقت ممكن.
36. امرأه معها ٣ اولاد فى المدرسه وزوج سائق وممتلكاته سياره وله ٥٥ سنة هل تستحق تكافل؟
أصحاب الأملاك زي أراضي أو عقارات أو سيارات لا يستحقوا لأن البرنامج بيستهدف الأسر اللي مستواها ضعيف جداً يعني فقيرة أوي مش متوسطة أو غنية.
37. اتجوزت جديد والأطفال اللي عايشين معايا ولاد زوجي مش ولادي.. هل ممكن أقدم على تكافل؟
في حالة أن الأطفال أمهم مُطلقة أو متوفيه.. يبقى اللي يقدم في الحالة دي لازم يكون أبوهم ده لو عايشين معاه. أسمك مش هايظهر في شهادة الميلاد بتاعتهم وبالتالي مش هايقبلوا الورق.
38. أنا متجوز من واحدة عندها طفلين وأنا كمان عندي ثلاث أطفال. يعني معى في البيت خمس أطفال. هي بتقبض تكافل على ولولادها.. هل ينفع أنا أقدم على تكافل لي ولولادي؟
ينفع تقدم بس لازم تبلغ الوحدة لأن اسمك ظاهر انك زوجها وانتوا عايشين في نفس العنوان. لازم تثبت الحالة في الوحدة علشان يوضحوا ده للمكتب المركزي اللي بيحسب استحقاق الأسر من عدمه.
39. انا تاجر وخسرت فلوسي كلها في صفقة كنت عاملها وخسرت.. هو ممكن أقدم على معاش تكافل علشان زوجتي وأولادي بس لغاية ما أقف على رجلي؟
لو الشروط تنطبق عليك وعلى اسرتك من حقك تقدم في كل الأحوال.. بس غالب الظن أن مواصفات بيتك وأسرتك ممكن تخرجك من الاستحقاق ولو أنه مش أكيد. ممكن يكون في طرق آخرى لمساعدتك للخروج من أزمة خسارة تجارية.
40. أبويا كان بياخد معاش كرامة ومات. أنا عايشة لوحدي معاه وماعنديش أولاد. كده أنا أكمل في كرامة؟
معاش كرامة كان للمرحوم والدك وسيتوقف مباشرة فور وفاته. أما اعانتك على مصاريف الحياة لوحدك كسيدة ليس لديها أطفال أو وظيفة ليس في كرامة ولكن اتستفسري من الوحدة لامكانية استفادتك من معاش ضمان.
موقف برنامج "تكافل وكرامة" من الحصول على معاشات أو مساعدات أخرى
41. أنا بآخد معاش ضماني لأسرتي.. هل ينفع أقدم على معاش تكافل وكرامة؟
لا ماينفعش تاخد تكافل وانت بتاخد معاش ضماني لأنك كده تكون بتاخد معاشين من الحكومة. معاش تكافل هو شكل جديد من المعاش الضماني بس بشروط تانية. ينفع تقدم لمعاش كرامة لو الأسرة عندها فرد عنده اعاقة فوق 50% بس مايكونش بياخد معاش اعاقة أو عجز. وممكن لو الأسرة عندها فرد مسن 65 سنة فأكثر ومابياخدش معاش مسن يقدم على كرامة.
42. أختي بتاخد معاش ضماني لأنه عندها حالة عجز.. هل ينفع تحول من الضمان لمعاش كرامة؟
ممكن تقدم على كرامة ولو اتقبلت تحول لكرامة.. بس في الحالة دي لازم هاتسيب الضمان لآن ماينفعش نفس الشخص ياخد معاشين مره من الضمان ومره من كرامة.
43. لو عندنا في الأسره شخص ذوي اعاقة والأسرة التي ترعاه بتاخد معاش ضماني.. هل ينفع نقدم لصاحب الاعاقة على كرامة؟
أيوه ينفع ممكن يقدم. لو الشخص مالوش نصيب في المعاش الضماني للأسرة مش هايتخصم من المعاش الضماني حاجة. أما لو الشخص له نصيب فيه الجزء ده هايتخصم من الأسرة لآن الشخص هياخد معاش كرامة بشكل مستقل عن الأسرة.
44. انا على المعاش وباقبض معاش تأميني كل شهر.. ممكن اقدم في برنامج "كرامة"؟
لو بتاخد المعاش التأميني أقل من 325 جنيه.. ينفع تقدم.
45. أنا بيتحول لي معاش عن زوجي المتوفي 500 جنيه ومعايا طفلين.. هل ينفع أقدم لبرنامج "تكافل"؟
لا مايتفعش اللي بياخد معاش تأميني ياخد معاش تكافل وكرامة الا لو كان معاشه التأميني أقل من 325 جنيه. ممكن يتم التقديم للمساعدة في البحث عن مصدر زيادة للدخل الأسرة.
46. المؤمن عليه في قطاع 5 أو قطاع 8 في التأمينات.. ينفع يقدم على تكافل وكرامة؟
المؤمن عليهم في قطاع 5 أو قطاع 8 ماينفعش يقدموا إذا كان الاجر التأمينى لكل منهم أكثر من 325. أما إذا كان الاجر التأمينى أقل من 325 جنيه وتنطبق عليهم باقي الشروط ينفع يقدموا ولكن لا نعلم اذا كانوا يستحقوا أم لا.
47. أنا باشتغل سواق على عربية مش بتاعتي.. وعندي تأمين سواق بسيط هل ممكن أقدم على تكافل؟
أيوه ممكن تقدم على تكافل ومعاشك البسيط هايظهر لنا في قاعدة البيانات.. لو كان أقل من 325 جنيه في الشهر لك الحق انك تقدم على تكافل ولو كان أكبر من 325 جنيه ماينفعش تقدم.
48. أنا عامل محارة وبيتأمن وعايز آمن على نفسي تأمينات بس خايف لاحسن يقطعوا عن أسرتي تكافل؟
عمال الانشاءات الوزارة بتعمل لهم تسهيلات علشان يأمنوا.. احنا بتشجع الناس يأمنوا وبندور على مصالحهم في اكتر من جهة.. ده مش بالضرورة يمنع تكافل لأن اشتراكك التأميني بيبقى بسيط.
49. أنا كنت باشتغل في قطاع السياحة ومؤمن علي.. ودلوقتي الشركة فلست وأنا باشتغلش.. هل ينفع اقدم على تكافل لغاية ما الاقي شغل؟
لازم اللي توقف عن العمل يقفل اشتراكه التأميني ويجيب مستند يثبت ذلك وفي الحالة دي ينفع على طول يقدم على برنامج تكافل. لو قدم من غير الورقة دي ملفه هايترفض.
50. المرأة الوصيه علي اخ لها اصغر منها وبالتالي اسمها مسجل فى التامينات بحكم الوصايه علي اخوها بس برضه هي صاحبة أسرة فقيرة.. هل ممكن تقدم على تكافل؟
اذا كان هذا المعاش مخصص لاخيها فقط وهى القائم بالصرف عنه هي بتبلغ بكده والوزارة بتتحقق من ذلك مع التأمينات .. وفي الحالة دي يحق لها التقديم فى برنامج تكافل.
51. عندي ٤٣ سنة وكنت شغال في القطاع الخاص ومُؤمن علي وبعدين أنهوا عقدي.. أنا دلوقتي مش لاقي شغل. هل ينفع أقدم للحصول على معاش تكافل؟
إذا كان التأمين مستمر يبقى ماينفعش تقدم. اما اذا تم اغلاق الملف التأمينى واتقدمت بمستند رسمي صادر من مكتب التأمينات ومختوم يثبت أنك خلاص مش مُؤمن عليك وملفك اتقفل.. يبقى ينفع تقدم.
52. أنا بآخد معاش من جمعية أهلية بس معاش ساعات منتظم كل شهر وساعات لاً.. هل ده يمنع اني اقدم على برنامج تكافل؟
معاش الجمعيات الأهلية المنتظم كل شهر ويكون أكبر من 200 جنيه .. ممكن نكمل عليه والمتقدم ياخد برضهز أما لو معاش أقل من 200 جنيه أو مش منتظم مافيش مشكلة ممكن تقدم عادي. الوزارة حالياً بتجمع البيانات من الجمعيات الأهلية علشان تتحقق من كل المبالغ اللي بتتصرف سواء من الحكومة أو من القطاع الأهلي علشان ماحدش يجمع مبالغ من جهات كتيرة وفي أسر تانية مابتاخدش حاجة خالص.
الالتزامات والشروط التعليمية والصحية
53. لازم الاطفال يكونوا بيروحوا المدرسة علشان أقدم على تكافل؟
نعم .. برنامج تكافل هو مخصص لضمان الحفاظ على حقوق الأطفال الصحية والتعليمية.. من سن الميلاد لغاية ما يبقى عندهم 18 سنة. الطفل اللي مش هايروح المدرسة أو يتسرب منها هيتخصم المبلغ اللي هو مستحقه في معاش تكافل. ولازم يتقدم ورقة من المدرسة تثبت انتظام الطفل في المدرسة.
54. هل لو في اسره لديها اطفال ليسوا فى سن المدرسه يجوز لها تقدم على "تكافل" علما بانها لا تملك شيئا؟
الأسرة التى لديها أطفال ليسوا فى سن المدرسة من عمر الميلاد حتى 6 سنوات يحق لها التقديم فى البرنامج إذا انطبقت عليها باقي الشروط
55. الأسره التي بها فتيات اتمت الدراسه وبها اولاد لم يتموا ومازالو فى التعليم يجوز لهم؟
طبعا برنامج تكافل لكل الأسر الفقيرة التى لديها لديها بنات أو أولاد. اللي هايدخل المدرسة الأسرة هتاخد عليه مساعدة أما اللي لسه مادخلش المدرسة أو متسرب منها الأسرة مش هتاخد عليه مساعدة.
56. عندي خمسة اطفال منهم اتنين في مدرسة وصرفت بهم المستحق عن معاش تكافل والعام القادم في ولد هايدخل المدرسة... هل اضافة الولد بتحصل من عندكم ولا لازم ابلغ؟
لازم يتم تقديم شهادة ميلاد الولد الجديد لو ماكنتش اتقدمت قبل كده.. ولازم كمان تقديم ورقة من المدرسة تثبت أن الولد التحق بيها.. ويكون اسم المدرسة واضح.
57. أنا مستفيدة من معاش تكافل وعندي ولدين. ابني تعب وماحضرش المدرسة لمدة شهرين.. يعني اكتر من 20% من أيام الدراسة؟ هل كده نصيبه من المعاش يتخصم؟
لازم تجيبي شهادة طبية تقول هو كان عنده ايه وليه غاب الفترة دي كلها.. وتتختم من المدرسة وتتقدم للوحدة الاجتماعية اللي مسكنك تبعها. لو ماجبتيش الورقة دي ايوه نصيبه في المعاش هايتقطع.
58. أحد اطفالي الثلاث اللي انا باقبض عليهم في تكافل مش راضية تروح المدرسة خالص.. هل معنى كدة ان نصيبها في المعاش هايتقطع؟
بلغي الوحدة الاجتماعية علشان اخصائية أو رائدة اجتماعية تنزل تبحث المشكلة معاكي علشان لو نقدر نساعدك.. بس لو البنت أو أي من الولاد بطلوا يروحوا المدرسة.. أيوه نصيبهم في المعاش هايتقطع.
59. لو مافيش مدرسة قريبة جنبنا.. كده مش هاعرف أسجل لولادي في المدرسة. أعمل ايه علشان اسجل في تكافل؟
في الحالة دي.. ممكن يروحودا مدرسة مجتمع.. لو مافيش بلغي الوحدة الاجتماعية فوراً.
60. طيب ما ممكن الطفل يبقى متسجل في المدرسة بس مش بيروح.. كده برضه معاش تكافل يستمر؟
الوزارة بتابع مع المدارس اذا كان الأطفال بيروحوا المدرسة ومنتظمين فيها ولا لأ.. على الأقل بنسبة 80% حضور. في حالة أن الطفل ماكانش بيروح المدرسة والأسرة بتاخد فلوس عليه.. الوزارة بتسترد الفلوس دي وبتحمل الأسرة المسئولية القانونية انها اخدت فلوس دون وجه حق.
61. فيه ولاد بيروحوا المدرسة ومش بيتعلموا كويس.. يعني ملهاش لازمة في الحالة دي ويشتغل أحسن؟
طفل لو الطفل متعثر ممكن حد يساعده من المدرسة أو ياخد مجموعات بالفلوس اللي بتتصرف له كل شهر من تكافل.. كمان ممكن الجمعيات الأهلية أو جمعيات تنمية المجتمع تساعد انها تعمل فصول تقوية. الطفل في سن المدرسة لازم يدرس.. هايشتغل لما يكبر ويشد عوده شوية.
62. عندى ابن فى معهد ابتدائى ازهرى خاص هل يمنع ذلك التقدم للحصول على معاش تكافل؟
البرنامج بيشترط أن الطفل تحت سن 18 سنة لازم يكون مُسجل في أي مدرسة حكومية أو تجريبية أو أزهرية أو خاصة أو مدرسة مجتمع. أما استحقاق الاسرة للمساعدة النقدية من عدمه فده بيتحسب بمعادلات احصائية علشان يحدد مستوى معيشة الأسرة وده بتحسب بطرق الوزارة بس اللي تعرفها.
63. ايه الشروط الصحية اللي لازم الأسرة تلتزم بيها علشان معاش تكافل مايقفش؟
الأم لو حامل لازم تكون بتابع الحمل بتاعها في الوحدة الصحية أو في مستشفى أو في عيادة ويكون معاها كارت المتابعة متسجل فيه 3 مرات على الأقل. وبعد ما تولد عليها انها تعمل متابعة على الأقل مرتين بعد الولادة.
أما الأطفال من أول سن الميلاد لازم الأبوين يعملوا لهم كارت متابعة يثبت أن الأطفال أخدوا الخدمات الصحية دي
1. التطعيمات اللازمة لسن الأطفال والمناسبة لعمرهم.
2. متابعة نمو الطفل يعني طوله ووزنه وكده.
64. طيب والخدمات الصحية دي اللي الأسرة لازم تعملها للأم والطفل.. هتكلف الأسرة فلوس؟
لا الخدمات الخاصة برعاية الأم الحامل والأطفال ببلاش في الوحدة الصحية. الدولة بتقدمها ببلاش علشان الأجيال اللي جايه تبقى صحتها كويسة تعرف تنتج وتفيد نفسها وتفيد البلد. أما لو الأسرة راحت تاخد الخدمة من عيادة خاصة هاتبقى بفلوس.
65. طيب ولو رحنا ناخد الخدمات الصحية زي ما بيقولوا لنا في تكافل.. والوحدة طلبت مننا فلوس.. نعمل ايه؟
بلغوا الوحدة الاجتماعية فوراً والوحدة هاتتحرى معاكوا ليه الوحدة الصحية طلبوا فلوس.. يمكن فيه خدمات اضافية. أما لو ماطمئنتوش وحسيتوا انه ممكن يكون فيه شبهة مصلحة أو فساد.. اكتبوا تظلم فوراً للادارة الاجتماعية وبلغوا عن اسم اللي طلب منكم فلوس.
66. سمعنا ان هايبقى في جلسات توعية تابعة لتكافل وكرامة.. هي الجلسات دي عن ايه؟
الجلسات دي هاتبقى موضوعاتها الأساسية الصحة والتغذية.. يعني الأم تتعلم أكتر عن صحتها وصحة أطفالها من أول الرضاعة الطبيعية لغاية ما الأطفال يكبروا. كمان الجلسات هاتوعي الأم على الأكل الصحي اللي يخللي العيال تتغذى كويس علشان ماتعياش.. وعن النظافة الشخصية ونظافة الأطفال والبيت.
67. جلسات التوعية اللي هاتتقدم تبع برنامج تكافل وكرامة هاتتقدم فين؟
الجلسات دي اما هاتتقدم تبع الوحدة الصحية اللي تقع في مجال سكنكم أو تبع جمعيات أهلية متدربة على موضوعات الصحة والتغذية.
الاستحقاق والصرف
68. هو احنا ازاي بنعرف اذا كانت اسرتنا مستحقة في تكافل وكرامة ولا لأ؟
في حالة تكافل بيتعرف كل ثلاث شهور.. 15 مارس و15 يونيه و15 سبتمبر و15 ديسمبر.. بتسألوا في الوحدة اذا كانت الأسماء وصلت ولا لأ وهم بيقولوا لكم. وفي حالة كرامة بتعرفوا كل نصف شهر.
كمان ممكن حد يساعدكوا تدخلوا على الشبكة بتاعة الوزارة وتشوفوا رقم البطاقة بتاعة الشخص اللي مقدم موجوده ضمن قوائم المقبولين ولا لأ وكمان ممكن تعرفوا المبلغ الظبط.
69. هو الصرف بيتم منين علشان المستحقين يقبضوا في معاش تكافل وكرامة؟
الصرف بيتم من مكتب البريد اللي تابع للسكن بتاعكم على العنوان اللي الأسرة كاتباه في استمارة تسجيل تكافل وكرامة. الوزارة دلوقتي ماشية في اجراءات انها ممكن تحول الصرف للأسر على أحد المحلات اللي جنبه وهو يصرف من عنده.. ممكن الأسرة اللي عايزه كده تبلغ بس هايتخصم منها من 3-5 جنيه.
70. هل ممكن صرف تكافل وكرامة من جمعية أهلية؟
لا يتم الصرف من خلال جمعية أهلية أبداً ولكن الجمعية يمكن أن تساعد في الاستدلال على الأسر. يتم صرف تكافل وكرامة الا من خلال مكاتب البريد وحالياً الوزارة بتدرس امكانية صرفه من خلال بنك أو من عند محلات تموين أو بقاله جنب مكان اقامة المستفيدين من المعاش والأسر تشتري بالمبلغ اللي هي عايزاه.
71. ايه الأوراق اللي لازم أقدمها ساعة ما آجي أصرف معاش كرامة من البريد؟
كارت الفيزا والرقم السري وبطاقة الرقم القومي بتاعة الشخص صاحب الفيزا.
72. هو ممكن حد يصرف بدل حد في تكافل وكرامة لو صاحب الفيزا تعبان؟
في حالة تكافل لا ماينفعش حد يصرف لحد.. يستنى لما يقوم بالسلامة. في حالة كرامة.. ممكن المسن أو اللي عنده اعاقة بيبلغ قبلها باسم الشخص اللي هايقبض عنه وبيكون الكلام ده موثق في الوحدة وفي البريد.
73. أنا مستفيدة من معاش تكافل لأسرتي.. نا كل مرة اقبض مبلغ مختلف من البريد. ايه السبب؟
كل مرة المبلغ المفروض يبقى هو نفسه المره اللي بعدها ولو حد خصم كل مرة منكم مبلغ شكل نرجو الابلاغ عن هذه الشخص.
الحالات الوحيدة اللي ممكن يتخصم فيها مبلغ كبير شوية هي أن واحد من الأطفال خرج من المعاش علشان سنه عدى 18 سنة.. أو علشان الأسرة مالتزمتش بالشروط الصحية أو التعليمية وبالتالي تم خصم نصيب الطفل في معاش تكافل. دي بس الحالات اللي ممكن يتخصم فيها مبلغ وتبقى مختلفة عن الأشهر اللي قبلها. غير كده مافيش.
74. هو قبض تكافل وكرامة كل شهر ولا ثلاثة اشهر؟
بالنسبة لمعاش تكافل يتحسب كل شهر بس بيتصرف كل ثلاث شهور في مارس ويونيه وسبتمبر وديسمبر.
أما بالنسبة معاش كرامة فبيتم صرفه كل شهر.
75. لو اسمي موجود ضمن القوائم المتعلقة امام الوحدة والموظف بيقول لي ان مافيش كارت تكافل باسمي.. اعمل ايه؟
بلغ الادارة الاجتماعية فوراً.. وممكن كمان تكلمي الخط الساخن تشوفي صدر كارت باسمك ولا لأ.
76. الوحدة عطتني الكارت والرقم السري بس أنا ضيعت الرقم السري.. اعمل ايه؟
كلمي الخط الساخن.. بس الصرفيه اللي بعدها هايتخصم منك مبلغ 6 جنيه.
77. لو كارت الفيزا بتاع تكافل أو كرامة ضاع مننا نعمل ايه؟
كلموا الخط الساخن.. بس الصرفيه اللي بعدها هايتخصم منك مبلغ 25 جنيه ثمن الكارت. هو بيتاخد ببلاش أول مرة بس.
78. هل ممكن الاستيلاء على كارت الفيزا بتاع تكافل ولا هى بتبقى باسم صاحبها او بالرقم القومى؟
أي فيزا بتبقى باسم صاحبها ولازم علشان يصرفها يقدم الرقم القومي بتاعه.
أما اذا تم الاستيلاء على الفيزا والرقم القومي مع بعض وتم الصرف.. تصبح مسئولية صاحب الفيزا ولا يمكن استرداد الأموال المسروقة. نرجو حفظها في مكان آمن هي والرقم القومي.
79. الصراف اللي في البريد بعد ما قبضني معاش تكافل .. خصم حوالي 20 جنيه ومرة تانيه خصم مبلغ تاني مختلف. هي الفلوس المخصومة دي بتاعة ايه؟
المبالغ دي مافيش أي الزام لخصمها. كل كارت بيتخصم منه حوالي 2,50 جنيه كل مرة لكرامة ومبلغ لا يتخطى خمسه جنيه كل مرة تكافل. لو بتاع البريد خصم مبالغ كبيرة لازم الابلاغ عنه في الوحدة الاجتماعية.
80. أسماء الأسر المستحقة في تكافل وكرامة نزلت في الوحدة بس اسمنا مانزلش.. ده معناه ايه؟
لو انتوا مسجلين لسه قريب من شهر ولا اثنين يبقى استنوا الصرفيه اللي بعدها وشوفوا اسمكم.. لكن لو انتوا مسجلين من فترة تزيد على ثلاثة أشهر ففي الحالة دي يبقى الأسرة مرفوضه مش مقبولة. في حالة لو عايزين تعرفوا أسباب الرفض ممكن تقدموا تظلم وتستنوا النتيجة.
81. أنا قدمت على معاش كرامة ومارضيوش يقبولوا الشهادة الطبية اللي جايباها من الوحده الصحية. المفروض اطلع الشهادة الصحية منين؟
المفروض الشهادة اللي تطلع هي شهادة القوميسيون الطبي من اللجنة الطبية المتخصصة أو من مستشفى عام على شرط أنه يكون مكتوب نوع الاعاقة ونسبتها علشان نتأكد أن المتقدم للحصول على المعاش غير قادر على العمل بشكل منتظم ومستمر وبالتالي هو يستحق معاش كرامة.
82. سمعنا ناس بتقول ان الموظفين في الوحدة الاجتماعية بتقبل قرايبهم في تكافل وكرامة وباقي المواطنين مش بيبقلوهم.. نعمل ايه؟
الموظفين مالهمش أي دخل في القبول أو الرفض لأن عملية حساب مستوى معيشة الفرد وتحديد مستوى المعيشة بيتم مركزياً من خلال الكمبيوتر ومش من خلال الموظف على الاطلاق. يعني ماحدش يعرف يعمل حاجة لقريبه.. ولو عنده قريب فقير جداً من حقه يقدم زيه وي أي مواطن.
83. انا من اسيوط مركز ابو تيج روحت بالامس لكى اصرف معاش كرامة الموظف قالى ان مفيش قبض دى اتوقفت خالص... عايز اعرف اذا كان ده بجد؟
ممكن تكون الفيزا اتوقفت لأنه بالتحقق من حالتك ثبت ان اسرتك مش مستحقه.. دايماً اطلبوا معرفة سبب وقف الفيزا. اما اذا ماكانش فيه سبب للوقف يبقى الأسرة لازم تقدم تظلم للإدارة الاجتماعية فوراً والادارة هاتراسل الوزارة وسيصلك الرد بالسبب أو هايتم استردادها لو كان في أي خطأ.
84. ليه بيبعتوا زى جواب استدعاء لبعض الناس اللي عندها فيزا تكافل أو كرامة... ايه المطلوب؟
ما يتم ارساله هو جواب إنذار لكل اللى حصل على فيزا وهو غير مستحق. ممكن تكون الأسرة بلغت بيانات مش صحيحة في استمارة تسجيل تكافل وكرامة أو قدمت أوراق مش حقيقية.. فبيجي لهم انذار انهم يردوا المبالغ اللي خدوها من غير وجه حق.
85. شفت ناس من الوزارة جايين يزوروا اللي عندهم فيزا تكافل او كرامة؟ هم يبزوروهم ليه؟ وهل ممكن يوقفوا الفيزا بعد ما الناس تاخدها.
دي اسمها زيارات تحقق وهي بتتعمل بشكل دوري علشان الوزارة تتأكد أن الكلام اللي الأسرة بلغت بيه في الاستمارة صحيح وفعلاً مطابق للواقع. لو الأسرة بلغت بيانات غلط والزيارة اثبتت كلام مش حقيقي بيتم وقف كارت الفيزا فوراً والفلوس اللي الأسرة قبضتها الوزارة بتطالبها بيها قانوناً.