إزاي املأ بيانات إيصال الامانه ؟
موضوع بسيط جداً لكن بعض الناس بتغلط فيه للاسف ، فـ حبيت اوضحه في نقاط بإيجاز شديد
* فيه دفاتر بتتباع في المكتبات ، فيها إيصالات مطبوعه ( زي اللي في الصوره ) ، وتقدر برضه تكتبه في ورقه عاديه لو مفيش معاك إيصال مطبوع
* فيه دفاتر بتتباع في المكتبات ، فيها إيصالات مطبوعه ( زي اللي في الصوره ) ، وتقدر برضه تكتبه في ورقه عاديه لو مفيش معاك إيصال مطبوع
ونقدر نحدد أهم العناصر وفق الترقيم اللي في الصوره كما يلي :-
- خانه ( ١ ) بتكتب فيها إسم الشخص اللي إنت هتمضيه علي إيصال الأمانه ، يعني الشخص اللي خد منك الفلوس
- خانه ( ٢ ) بتكتب فيها عنوانه بالتفصيل من واقع بطاقه الرقم القومي بتاعته
- خانه ( ٣ ) بتكتب فيها رقم بطاقته بالكامل ( ١٤ رقم )
- خانه ( ٤ ) بتكتب فيها تاريخ صدور البطاقه ، وده بيكون في أعلي اليسار في خلفيه البطاقه ، عباره عن الشهر والسنه
- خانه ( ٥ ) بتكتب فيها إسم حضرتك
- خانه ( ٦ ) بتكتب فيها المبلغ بالارقام ثم بالحروف
- خانه ( ٧ ) بتكتب فيها إسم الشخص التابع ليك ، اللي المفروض هيستلم الفلوس من الشخص الموقع علي الإيصال
- خانه ( ٨ ) توقيع الشخص رقم ١ اللي إستلم منك الفلوس
خانه ( ٩ ) البصمه بتاعت نفس الشخص اللي استلم الفلوس ، رقم ١
- الخطوط الحمراء دي المكان اللي بتقطع منه أصل الايصال عن كعب الايصال رقم ( ١٠ ) وده المفترض انه بيكون موجود في دفتر ايصالات الامانه ، زي الشيكات كدة
ملحوظات هامه :-
* الأفضل إن الإيصال كله يحرر بخط من وقعه
* ضروري جداً ان الإيصال كله يتملي في ذات لحظة كتابته ، وبنفس القلم ، يعني متمضيهوش إيصال علي بياض وتيجي إنت تكتب الصُلب بعدها بشهور
* ضروري تحتفظ بصوره بطاقه الرقم القومي لشخص الموقع علي الايصال
* متكتبش تاريخ علي الإيصال ، لإنك لو كتبت تاريخ ومر عليه ثلاث سنوات لم تُرفع الإيصال خلالها ، هتكون الدعوي سقطت بالتقادم ، وانا عارف إن فيه رأي فقهي بيقول إن العبره بتاريخ الامتناع عن تسليم المبلغ وليس بتاريخ تسلمه شبيه بقايمه المنقولات كدة ، لكن الاتجاه المضطرد في المحاكم إنه بعد ثلاث سنوات من تاريخ الإيصال المحكمه بتحكم بإنقضاء الدعوي
* لو مفيش واقعة تسليم حقيقيه لفلوس ، وكان الايصال مجرد ضمان لأي معامله ، فـ خلي بالك من حاجتين :-
اولا : المبلغ اللي إنت هتكتبه يكون متناسب مع الواقع بقدر الإمكان ، يعني متكتبش أرقام مبالغ فيها وغير منطقيه ، يعني مثلا مينفعش راجل عاطل لا يعمل وحالته فقيره يكتب إنه سلم شخص مبلغ إتنين مليون عشان يوصلهم لحد ، لان الفكره مش منطقيه
ثانيا : الشخص في الخانه رقم ( ٧ ) ، لازم يكون من المنطقي إنك ترسله الفلوس عن طريق شخص الموقع علي الإيصال ، يعني مينفعش تكتب إن زيد إستلم منك خمسين الف عشان يوصلهم لزوجتك المقيمه معاك في نفس المنزل ، لإنها فكره غير منطقيه
هتقولي هو طالما وقع إنه إستلم يبقي خلاص !؟
هقولك لأ مش شرط ، لإن فيه دفع دايماً المتهم بيدفع بيه وهو ( إنتفاء ركن التسليم ) وده معناه انه بينكر انه إستلم منك الفلوس أصلا ً - حتي لو كان وقع علي الإيصال - وهيقول إن الإيصال ده كان ضمان لأي معامله اخري ، وهيعزز هذا الدفع - ضمن ما يعززه - بالمنطق ، زي مثلا إنه من غير المنطقي إن المتهم اللي من مكان بعيد يستلم منك فلوس عشان يسلمها لزوجتك أو إبنك المقيمين معاك في نفس المنزل
وفيه دفوع ثانيه ممكن المتهم يدفع بيها التهمه عن نفسه ، والمحكمه تحكم ببراءته حتي لو كان الإيصال مذيل بتوقيعه
* وموضوع خيانة الأمانه ده فيها كتب ومجلدات ، لا يتسع المقام لشرح كل تفاصيلها ، لكن حبيت استعرض الطريقه المثلي لملأ بيانات الايصال لغير المتخصصين
والجريمه بتحكمها الماده ٣٤١ عقوبات ، والتي حددت لها عقوبه الحبس ( بشكل مطلق ) ، فـ يكون طبقاً لحده الادني ٢٤ ساعه وحده الآقصي ثلاث سنوات .